Փաստ ինֆո

Օֆշորի գործով այսօրվա դատական նիստում շարունակվեց 32 հատոր կազմող գործի գրավոր ապացույցների հետազոտումը: 

Մասնավորապես, հետազոտվեց  ամբաստանյալ Աշոտ Սուքիասյանի կողմից բանկին գրավադրած անշարժ գույքի գնահատման փաստաթուղթը:  Տուժող Փայլակ Հայրապետյանի ներկայացուցիչ Շալիկո Փիրուզյանը  դատարանի ուշադրությունը հրավիրեց փաստաթղթում նշված  անշարժ գույքի ցածր լիկվիդացիոն արժեքի վրա, ըստ նրա,  ամբաստանյալն որևէ շահագրգռություն չի դրսևորել,  այլ դրսևորել է  անգործություն: Երբ դատարանի կողմից դիտարկում հնչեց քաղաքացիաիրավական հարցը քրեաիրավականի հետ շփոթելու մասին,  տուժողի ներկայացուցիչը նշեց, որ խարդախության սկիզբը հենց այդտեղ էլ եղել է: «Կազմակերպված խաբեության մասին է խոսքը»,- ասաց նա:

Պաշտպանական կողմը, հակառակը, գտնում է, որ փաստաթուղթն որևէ ապացուցողական նշանակություն չունի: Ա.Սուքիասյանի պաշտպան Յուրիկ Խաչատրյանը նշեց, որ գրավադրվել է ոչ միայն Փայլակ Հայրապետյանի, այլ նաև ևս  երկու անձանց գույքը:

Մեղադրողն էլ իր հերթին ընդգծեց, որ փաստաթուղթը հափշտակության առարկա գույքի չափի մասին է, որևէ այլ  առնչություն մեղադրանքի հետ չունի:

Դատարանում հետազոտվեց նաև Կիպրոսի Հանրապետության կողմից իրավական օգնություն ցուցաբերելու շրջանակում  Հայաստանի Հանրապետության իրավասու մարմինների միջնորդությունների կատարման  արդյունքների զննության վերաբերյալ արձանագրությունը: Դրանում, մասնավորապես, տեղ են գտել տեղեկություններ Կիպրոսի Հանրապետությունում գրանցված երեք կազմակերպությունների, փոխանցումների շարժի մասին: Տուժողի ներկայացուցիչն ընդգծեց, որ վարկի գումարից ոչ մի լումա կամ ցենտ չի գնացել բիզնես ծրագրի նպատակին, ըստ նրա, դա փողերի լվացում  է ու խարդախություն:

Պաշտպան Խաչատրյանը հակադարձեց՝   Աշոտ Սուքիասյանը խարդախություն անելու ո՛չ նպատակ, ո՛չ էլ մտադրություն չի ունեցել՝ հանքը եղել է, մարդիկ աշխատել են: Ըստ նրա, մեծ հեռավորության վրա՝ Աֆրիկայում,  հնարավոր չէ  բիզնեսն այնպես կարգավորել, որ ամեն ինչ ժամացույցի պես աշխատի:  Պաշտպանն ընդգծեց, որ որևէ փաստ չկա, որ իր պաշտպանյալը վարկային գումարները ծախսել է անձնական կարիքների համար:

Հիշեցնենք,  ամբաստանյալ Աշոտ Սուքիասյանը  մեղադրվում է ՀՀ քրեական օրենսգրքի 190-րդ հոդվածի  3-րդ մասի 1-ին կետով՝ առանձնապես խոշոր չափերով հանցավոր ճանապարհով ստացված եկամուտներն օրինականացնելը (փողերի լվացումը), 178-րդ հոդվածի 3-րդ մասի 1-ին կետով՝ առանձնապես խոշոր չափերի խարդախություն, և 205-րդ հոդվածի 2-րդ մասով՝ առանձնապես խոշոր չափերով հարկերը վճարելուց չարամտորեն խուսափելը:

Ըստ մեղադրանքի՝ Աշոտ Սուքիասյանը խարդախությամբ ուրիշի առանձնապես խոշոր չափերով գույքի նկատմամբ իրավունք է ձեռք բերել, օրինականացրել հանցավոր ճանապարհով ստացված առանձնապես խոշոր չափերով եկամուտներ, ինչպես նաև չարամտորեն խուսափել է առանձնապես խոշոր չափերով հարկեր, տուրքեր և պարտադիր այլ վճարումներ կատարելուց: