Փաստ ինֆո

Ընդդեմ Կենտրոնական ընտրական հանձնաժողովի «Իրավունքի Եվրոպա» միավորման, «Թրանսփարենսի Ինթերնեշնլ»  հակակոռուպցիոն կենտրոն հասարակական կազմակերպության և Ժուռնալիստների «Ասպարեզ» ակումբ ՀԿ-ների հայցադիմումի գործով այսօրվա դատական նիստում պատասխանող կողմը դատարանի ուշադրությունը հրավիրեց տուժող կողմի ներկայացուցիչ Տիգրան Եգորյանի կողմից, իր կարծիքով,  թույլ տրված խախտումների վրա:

Ըստ ԿԸՀ անդամ Նունե Հովհաննիսյանի,  թեև դատարանը հայցադիմումը  մինչ վարույթ ընդունելը այն վերադարձրել է՝ դրանում առկա թերությունների պատճառով, սակայն դրանք չեն շտկվել:

Մասնավորապես,  ինչպես և նախկինում, չկա փաստաթուղթ առ այն, որ   «Ասպարեզ» ակումբի նախագահ Լևոն  Բարսեղյանը լիազորել է Տ.Եգորյանին հանդես գալ իր անունից՝  Լևոն Բարսեղյանը տեղյակ չի եղել, որևէ մեկին չի լիազորել հայցադիմում ներկայացնել: Ըստ Նունե Հովհաննիսյնի, թերությունը շտկված համարելու համար  հայցադիմումից կամ պետք է հանվեին Լ.Բարսեղյանի տվյալները կամ պետք է ներկայացվեր համապատասխան լիազորագիր, ինչը չի արվել:

ԿԸՀ ներկայացուցչի գնահատմամբ, առանց անձի իմացության հայցադիմում ներկայացնելը  ակնհայտ կեղծիք է:

Պատասխանողի ներկայացուցիչը նշեց նաև, որ հիմնավոր կասկած ունի, որ հայցվորի ներկայացուցիչը նաև խախտել է  հայցադիմումը վերադարձնելուց հետո  նորից դատարան ներկայացնելու  համար  օրենքով նախատեսված 24-ժամյա ժամկետը, քանի որ  ուղարկված հայցադիմումում բացակայում է գրառումն առ այն, թե երբ է հանձնվել հայցադիմումը դատարան՝ օպերատորի համարի  ու ամսաթվի վերաբերյալ տողն ընդհանրապես բացակայում է: Ուստի պատասխանողը միջնորդեց գործի վարույթը կարճել, մասնավոր որոշում կայացնել՝ ուղղված Փաստաբանների պալատին,  Տ.Եգորյանի վարքագծի մասին և հետաքննություն անցկացնելու համար դիմել իրավասու մարմիններին:

Դատարանը մերժեց միջնորդությունը՝ նշելով, որ դատարանը չունի, մասնավորապես,  ապացույց   առ այն, որ հայցվորի ներկայացուցիչը խախտել է 24-ժամյա ժամկետը:

Պատասխանող կողմը նշեց, որ   16.09.2015թ.  թիվ 59-Ա  ԿԸՀ որոշումն անվավեր ճանաչելուն  և վարչական վարույթներ հարուցելուն,  բոլոր դիմումատուներին դրան մասնակից դարձնելուն  և որպես հաղորդում դիտարկված դիմումներում վկայակոչված փաստական հանգամանքները պատշաճ քննարկման առարկա դարձնելուն պարտավորեցնելու մասին հայցադիմումն անհիմն է  և ենթակա է մերժման՝  ԿԸՀ-ն գործել է Ընտրական օրենսգրքի նորմերին համապատասխան, իր լիազորությունների շրջանակում և կայացրել  իրավաչափ որոշում:

Լրագրողների հետ զրույցում Նունե Հովհաննիսյանը նշեց, որ ԿԸՀ-ին ուղղված  դիմումը ներկայացվել է նույնպես այդ երեք կազմակերպությունների կողմից՝ կից ներկայացվել էին նաև թիվ 36 և 41 ընտրատարածքային հանձնաժողովներին ուղղված դիմումներ:  Տ.Եգորյանի՝ ԿԸՀ-ին ուղղված դիմումում ուղղակի գրված էր՝ քննեք կամ անհրաժեշտության դեպքում վերահասցեագրեք, այսինքն՝  «նա մեզ տալիս էր հանձնարարական, եթե դա կարելի է այդպես որակել»:

Նունե Հովհաննիսյանը նշեց, որ ինքը մնում է իր կարծիքին՝ հայցվորների ներկայացուցչի կողմից չարաշահվել է դիմելու սահմանադրական իրավունքը: «Երբ պատասխանող կողմը ծանոթացավ դատարանին ներկայացված նյութերին, շատ հստակ հայերենով սևով սպիտակի վրա գրված է, որ Լևոն Բարսեղյանը պատասխանել է, որ ես ոչ մեկին չեմ լիազորել հայցադիմում ներկայացնել, առավել ևս հանդես գալ իմ անունից: Սա ոչ այլ ինչ է, եթե ոչ կեղծիք, նրա դիմելու իրավունքի չարաշահում»,- ասաց ԿԸՀ անդամը: Անթույլատրելի կլիներ անգամ, եթե խոսք գնար  շարքային, հասարակ քաղաքացու, թեկուզ բարձրագույն կրթությամբ, բայց ոչ իրավաբանի մասին, ով չգիտե, որ այլ անձի անունից չի կարելի հայցադիմում ստորագրել: «Այս դեպքում խոսքը պրոֆեսիոնալ փաստաբանի մասին է, ով առաքելություն է վերցրել բոլորի գործողությունները բացահայտել: Ես կարող եմ ասել մեր մասով՝ 2012թ.-ից առայսօր սույն պարոնին անընդհատ բացատրում ենք, որ եթե խախտվել է դիտորդի իրավունքը, օրինակ՝ դիտորդը կարող է տեսանկարահանել քվեարկության ընթացքը, եթե նրան դա թույլ չեն տվել, ապա ինքը կարող է այդ հարցով վիճարկել տեղամասի գործողությունը ընտրատարածք: Եթե դիտորդը տեսնում է, որ օրինակ, ընտրողը որևէ խախտում թույլ տվեց, այստեղ դիտորդի սուբյեկտիվ իրավունքը՝ Ընտրական օրենսգրքով ամրագրված, չի խախտվում, նա կարող է այդ խախտումը արձանագրել իր զեկույցում ու ներկայացնել  ընդհանուր ընտրությունների գնահատման համատեքստում, բայց նա չի կարող ընտրողի փոխարեն բողոքարկել դա վերադաս հանձնաժողով, կամ առավել ևս՝ դատարան: Սա ընդգծված վարքագիծ է, որ ինքը պարբերաբար  մեր նկատմամբ համառորեն տանում է»,- ասաց ԿԸՀ անդամը: