Փաստ ինֆո

 

Կոռուպցիայի դեմ պայքարի հիմնական պատասխանատուն կառավարությունն է, սակայն մասնավոր հատվածը ևս պետք է լինի պահանջատեր ու շահառու,  քանի որ կոռուպցիայի պայմաններում չի կարող զարգանալ տնտեսությունը, հետևաբար նաև՝ բիզնեսը:

 

«Մասնավոր հատվածը կոռուպցիայի դեմ պայքարի արդի մարտահրավերների դեմ հանդիման» աշխատաժողովի բացմանն այսօր հայտարարեց ՀՀ արդարադատության նախարարի տեղակալ-Հակակոռուպցիոն ծրագրերի ազգային համակարգող Սուրեն Քրմոյանը՝  հավելելով, որ աշխատաժողովը կազմակերպել է արդարադատության նախարարությունը՝  Թրանսփերենսի Ինթերներշնլ հակակոռուպցիոն կենտրոնի մտահղացմամբ ու Եվրոպական միության աջակցությամբ:

 

Սուրեն Քրմոյանը նշեց, որ երեկ կայացավ Կոռուպցիայի դեմ պայքարի խորհրդի անդրանիկ նիստը, որի ընթացքում ներկայացվել է հանրային ոլորտում կոռուպցիոն ռիսկերի նվազեցմանն     ուղղված  2015-18թթ. միջոցառումների ծրագիրը:

 

Խորհուրդը նախատեսել է պարբերաբար իր նիստերին հրավիրել բիզնեսի ներկայացուցիչներին՝ լսել նրանց, թե ինչ խոչընդոտներ են առկա բիզնեսի զարգացման համար, լսել նաև նրանց առաջարկությունները:

 

«Ակնկալում ենք նաև քաղաքացիական հասարակության և բիզնեսի՝ մասնավոր հատվածի մասնակցությունը կոռուպցիայի դեմ պայքարում»,- ասաց փոխնախարարը: Ս.Քրմոյանը գոհունակություն հայտնեց, որ ինչպես խոշոր, այնպես փոքր ու միջին բիզնեսում կան ընկերություններ, որոնք  ստեղծել են հակակոռուպցիոն ներքին ընթացակարգեր: 

 

Փոխնախարարը կարևորեց, որ բացասական երևույթների հետ մեկտեղ խոսվի նաև դրական օրինակների մասին, դա նույնպես կնպաստի կոռուպցիայի դեմ արդյունավետ պայքարին:

 

Հայաստանում Եվրամիության ներկայացուցիչ Ալեսանդրո Ձանոտան  իր բացման խոսքում նշեց, որ Հայաստանի կառավարությունը նշել է, որ կոռուպցիայի դեմ պայքարն իր գործունեության կարևոր ուղղություններից մեկն է: Ինչպես բոլոր երկրները, այնպես էլ Հայաստանը զերծ չէ կոռուպցիայից, որը խոչընդոտում է տնտեսական  աճին ու զարգացմանը, կոռուպցիայի գոյությունը հանգեցնում է տնտեսության թերզարգացածությանը: 

 

Եվրամիությունը պատրաստակամ է սատարել ինչպես ողջ աշխարհում, այնպես էլ, մասնավորապես, Հայաստանում կոռուպցիայի դեմ պայքարին: ԵՄ ներկայացուցիչը կոռուպցիայի դեմ արդյունավետ պայքար մղելու տեսանկյունից կարևորեց կառավարության հստակ հանձնառությունը, ԵՄ-ն քաջալերում է, որ ՀՀ կառավարությունն առավել արագ ընդունի կոռուպցիայի դեմ պայքարի ռազմավարությունը:  Ա.Ձանոտան կարևորեց նաև քաղաքացիական հասարակության դերը կառուպցիայի դեմ պայքարում: 

 

Լրագրողների հետ զրույցում Թրանսփերենսի Ինթերնեշնլ հակակոռուպցիոն կենտրոնի գործադիր տնօրեն Վարուժան Հոկտանյանը նշեց, որ եթե արդյունավետ պայքար տարվի կոռուպցիայի դեմ, միջոցներ կգտնվեն, որ հնարավոր լինի բավականին արդյունավետ ինստիտուցիոնալ համակարգ ստեղծել: Այդ ամենը կաշխատի, եթե լինի քաղաքական կամք: 

 

«Եթե չլինի քաղաքական կամք, մենք չենք ունենա որևէ էֆեկտիվ պայքար կոռուպցիայի դեմ, կոռուպցիայի նվազեցում, խելքին մոտ հակակոռուպցոն քաղաքականություն և այդ ամենը նորից կարող է վերածվել իմիտացիայի, որը մենք դժբախտաբար տեսել ենք նախորդ Խորհրդի գործունեության ընթացքում՝ սկսած 2004թ. հունվարից մինչև իր գոյության պաշտոնապես դադարելը՝ այս տարվա մարտին»,- ասաց Վ.Հոկտանյանը՝ փաստելով, որ նախորդ Խորհրդի ակտիվությունը շատ արագ մարեց, որովհետև պարզ դարձավ, որ չկա քաղաքական կամք, ցանկություն:  Հակակոռուպցիոն կենտրոնի գործադիր տնօրենը արձանագրեց նաև, որ առայժմ խոսքերը կան, սակայն երբ դրանք կվերածվեն գործի, կերևա ոչ միայն օրենսդրական ակտերի ընդունումից, այլև պրակտիկայի, արմատացած գործելաձևի  փոփոխությունից:

 

Հայաստանի կոռուպցիայի վիճակը, նրա գնահատմամբ, «վատ է»,   «բավականին տխուր է»: Կոռուպցիայի համաշխարհային բարոմետրի վերջին՝  2013թ. ուսումնասիրության համաձայն, Հայաստանում առավել կոռումպացված են գնահատվել դատական համակարգը, պետական ծառայությունը և առողջապահության ոլորտը: