Փաստ ինֆո

ՀՀ կառավարության այսօրվա նիստում վարչապետ Հովիկ Աբրահամյանը համապատասխան կառույցների ղեկավարներին հանձնարարեց ուսումնասիրել հայաստանյան ապրանքային շուկայում գրանցված գնաճն ու դրա իրական չափերի մասին զեկուցել կառավարության հաջորդ նիստում՝ մեկ շաբաթ հետո:

Մինչ այդ, սակայն, լրագրողներն, այսօրվա նիստի ավարտին Էկոնոմիկայի նախարար Կարեն Ճշմարիտյանից փորձեցին ճշտել, թե ի վերջո ի՞նչ չափերի է հասնում մեր երկրում արդեն երկրորդ ամիսը շարունակվող գնաճը:

«Նախ առաջինը մեկ- երկու խանութում, կամ մեկ- երկու վաճառողի մոտ եթե բարձրացում է նկատվում, միանգամից այդ լրատվությունը հաղորդվում է, բայց խնդիրն ամբողջ Հայաստանի տնտեսական դաշտին է վերաբերում, որովհետև դա ավելի մասնագիտական մոտեցում է պահանջում: Օրինակ՝ այդ նույն տվյալները ներկայացնողները չգիտեն, չէ՞, ասենք, Գյումրիում, կամ Տավուշում, կամ հարավում՝ Մեղրիում, Ագարակում ի՞նչ իրավիճակ է: Այնպես որ սա միջինացված ցուցանիշ է: Միգուցե ավելի բարձր սպառում ունեցող ՀՀ տարածքներում, կամ թեկուզ նույն Երևանի ներսում, հնարավոր է, որ տարբերություններ լինեն»,- ասաց նախարարը՝ խորհուրդ տալիով չշտապել գնահատականների հարցում և սպասել պաշտոնական տվյալներին:

Ինչ վերաբերում է դրամի փոխարժեքի դրսևորած տատանողականությանը, էկոնոմիկայի նախարարը վստահեցրեց, որ դա մեր տնտեսության իրական վիճակի օբյեկտիվ արտացոլումը չէ:

«Միգուցե և այդտեղ կան որոշակի սպեկուլյատիվ երևույթներ, որի կանխարգելումը և դրա հետևանքների վերացումը Կենտրոնական բանկը իր գործիքներով կարող է անել»,- ասաց Կարեն Ճշմարիտյանն ու հավելեց. «Ես համոզված եմ, որ ԿԲ-ի և՛ պահուստները, և՛ նրա ունեցած դրամային և դոլարային ծավալը, և՛ մեր բանկերի մոտ եղած դոլարային ծավալը թույլ են տալիս եզրակացնելու, որ սա մի քանի օրվա խնդիր է, և ամեն ինչ կկարգավորվի»:

Լրագրողները նախարարին հիշեցրեցին, որ վերջին օրերին նույն այդ բանկերը, որոնք բավական պաշարներ ունեն, հրաժարվում են քաղաքացիների հետ փոխարժեքի փոխանակման գործարքներ կատարել՝ պահելով իրենց պաշարները, ապա հարցրեցին, թե տնտեսագիտության մեջ ԿԲ-ի կիրառած այս «գործիքն» ի՞նչ անուն է կրում:

«Այդպիսի սահմանափակում չկա»,- ասաց Կարեն Ճշմարիտյանն ու հիշեցրեց, որ ԿԲ փոխնախագահ Ներսես Երիցյանն այսօր կառավարության նիստի ընթացքում զեկուցել էր իրենց կողմից կիրառվող գործիքների մասին: Իսկ ինչու՞ շուկայում դոլար չկա լրագրողների հարցին Կարեն Ճշմարիտյանը դժվարացավ հստակ պատասխան տալ, լրագրողների պնդմանն ի պատասխան էլ խոստացավ ԿԲ-ի հետ ճշտել, թե որ բանկերն են հրաժարվում դոլարային գործարքներ կատարելուց:

Էկոնոմիկայի նախարարի հետ ճեպազրույցում լրագրողները խնդրեցին մեկնաբանել նաև այն լուրերը, թե ՀՀ շուկայում դոլարային դեֆիցիտն առաջացել է այն պատճառով, որ մի շարք ռուսական ընկերություններ Հայաստանից մեծ քանակությամբ կանխիկ դոլար են արտահանել:

Նախարարը նախ նշեց, որ նման տեղեկություն չունի, ապա կարծիք հայտնեց, որ նման բան չի կարող լինել հետևյալ պատճառով. «Եթե որևէ տեղ իրենց ազգային արժույթն ավելի անկայուն է, ոչ մի գործարար չի ձգտի իր ունեցած արժույթը տեղափոխել այդ տարածք: Եթե ասեիք որևէ այլ երկիր, գուցե և հավատայի, բայց տանել Ռուսաստան, որտեղ դու չգիտես, թե ինչ գործիքներ կկիրառվեն, դու վաղը կարող ես կորուստներ կրել: Եթե որևէ մեկը նույնիսկ մտադրվել է որևէ սպեկուլյատիվ քայլ անել, նա ինքն էլ է վտանգված»:

«Ես կոչ կանեի, որ այդպիսի քայլերի չգնային»,- հավելեց Կարեն Ճշմարիտյանը:
 

Լուսանկարը՝ Armenpress-ի