Փաստ ինֆո

Սյունիքի մարզպետի առանձնատան մոտ արյունալի միջադեպի աղմկահարույց  քրեական գործի շրջանակում մի քանի հոգին անցյալ տարվա հունիսի 2-ից սկսած շարունակ ժխտում են տարբեր ակնհայտ փաստեր: Այս մասին «Փաստինֆո»-ի թղթակցի խնդրանքով մեկնաբանելով «yerkir.am» կայքին տված հարցազրույցում Սյունիքի մարզպետ Սուրիկ Խաչատրյանի ժխտողական պատասխանը, նշեց  հիշյալ գործով միակ ամբաստանյալ Արտակ Բուդաղյանի պաշտպան, փաստաբան Հայկ Ալումյանը:

Պաշտպանը՝ որպես դատարանի անկախությունը կասկածի տակ դնելու փաստարկ, դատարան էր ներկայացրել վերանշանակված  մարզպետի պաշտոնամուտի արարողության տեսաձայնագրությունը, որում վերջինս շնորհակալություն է հայտնել իր չորս հենասյուներից, այդ թվում՝ դատարանի նախագահին՝ իր անձնակազմով: Մարզպետը, սակայն, լրագորղի հետ հարցազրույցում ժխտել է տեսաձայնագրությունն անգամ՝ «Դատարանի մասին չենք խոսել»:

Հայկ Ալումյանը տեսակետ հայտնեց, որ մարզպետի այս պատասխանը կոնտեքստի մեջ շատ լավ տեղավորվող վարքագիծ է.  «ժխտել ինչ-որ ակնհայտ է, չբացատրել, չասել՝ ինչ որ տեղ սխալվել ենք, այդ չպետք է ասեինք, ուրիշ բան պետք է ասեինք, ուղղակի ժխտել այն, ինչ-որ գրված է, տեսագրված է, հաստատված է»:

Այդպես է նաև բուն քրեական գործի շրջանակում. խոսակցություններ կան մարզպետի առանձնատան խոհանոցում՝ ժխտվում են, տեսագրության մեջ ինչ-որ բաներ են երևում՝ ժխտվում են:

Հիշյալ հարցազրույցում իր անձի հանդեպ հանրային հետաքրքրությունը մարզպետը պայմանավորել է սոսկ լրագրողների հետաքրքրությամբ, ընդ որում, մարզպետը հաշվել է լրագրողներին՝ նրանք հարյուրն են, ովքեր համառորեն չեն նկատում իր լավ ու բարի գործերը, իսկ «ամեն մի թեթև սխալն» էլ ամեն օր դարձնում շահարկման առարկա:
   
Մեկնաբանելով ասվածը սոսկ անցյալ տարվա հունիսի 1-ի միջադեպի կոնտեքստում՝ Հայկ Ալումյանը նկատեց, որ եթե ինչ-որ մեկը նայում է հայելու մեջ ու իրեն դուրս չի գալիս արտացոլումը, ինքը չպետք է հայելուն մեղադրի, նույնն է նաև լրատվամիջոցների պարագայում՝ եթե ինչ-որ մեկի մասին լրատվամիջոցները վատ կարծիք են հայտնում, ուրեմն ինքը պետք է մտածի ոչ թե լրատվամիջոցների մասին, այլ թե ինքն ինչ է արել, որ արժանացել է այդ կարծիքին:

«Լրագրողների հրապարակումները ճիշտ միջինացված արտացոլումն է նրա, ինչը որ գոյություն ունի: Հասարակական կարծիքն էլ այն հայելին է, որի մեջ մարդը պետք է նայի ու հասկանա, որ ինչ որ բան այն չէ,- նշեց Հայկ Ալումյանը՝ հավելելով,- կարելի է կարդալ տարբեր լրատվամիջոցներ, հասկանալ, որ մեկը մի ծայրահեղություն է, մյուսը՝ մեկ ուրիշ, երրորդն էլ օբյեկտիվ է, հետո միջինացված կարծիքը կլինի հենց այն օբյեկտիվ կարծիքն այն մասին, թե ինչ է իրականում մարդն իրենից ներկայացնում»: