Փաստ ինֆո

ՀՔԾ ընդհանուր բնույթի հանցագործությունների վարչության պետի տեղակալ Վահագն Մուրադյանը հենց «Նուբարաշեն» ՔԿՀ-ում` ներկաների ու տեսախցիկի առաջ ծեծի է ենթարկել իր վարույթում քննվող քրեական գործով կալանավորված Սրապիոն Արթենյանին: Այս մասին «Փաստինֆո»-ին հայտնեցին կալանավորի հարազատները` հավելելով, որ դեպքը տեղի է ունեցել հարցաքննության սենյակից դուրս գալուց հետո` միջանցքում, և արձանագրվել է տեսախցիկներով:

«Քրեակատարողական հիմնարկում արդեն հարցաքննությունն ավարտած են լինում, ճանապարհին, պաշտպանն է լինում, ուղեկցողներն են լինում` ՔԿՀ-ի աշխատակիցները, քննիչը տեսախցիկների առկայությամբ, հարվածում է Սրապիոնին», -մեզ հետ զրույցում պատմեցին Սրապիոնի մայրն ու եղբայրը:

«Քննիչն անընդհատ Սրապիոնին ստիպել է, որ իր ուզածը գրի, Սրապիոնն էլ ասել է՝ միակողմանի քննություն ես տանում, քննիչը դրանից կատաղել ու հարվածել է որդուս»,- պատմեց Մարիամ Արթինյանը:

Դրանից հետո, մարմնական վնասվածքներ ստացած Սրապիոնին, ըստ հարազատների, տեղափոխում են խուց, «մի քանի անգամ բժիշկ է գալիս նրա մոտ, էլի նորից  ասում է գլխացավեր ունեմ, դեղեր են տալիս»:

Տեղի ունեցածի մասին տեղեկանալով` կալանավորի հարազատները դիմել են պատկան կառույցներին:

«Մենք դիմեցինք ԱԱԾ»,- ասաց կալանավորի եղբայրը և հավելեց, որ որոշ ժամանակ անց այնտեղից արդեն պատասխան են ստացել. «Սրապիոնին գրություն է եկել ԱԱԾ-ից, որ պաշտոնեական լիազորությունների անցումով ու ևս մեկ հոդվածով քրեական գործ է հարուցվել քննիչի հետ կապված: Մեզ էլ գրություն է եկել, որ ձեր հաղորդման հիման վրա քննությունն է կատարվում, ընթացքի մասին կտեղեկացնենք»:

Հիշեցնենք, ՀՔԾ քննիչի նկատմամբ հարուցված այս քրեական գործին նոյեմբերի 5-ին  արդեն անդրադարձել ենք` նշելով, որ քրեական գործը հարուցվել է ՀՀ քրեական օրենսգրքի 309-րդ հոդվածի հատկանիշներով, այն է` պաշտոնեական լիազորություններն անցնելը: Մեր այս տեղեկությունները, սակայն, մինչ այս պահը ո՛չ ԱԱԾ-ից և ո՛չ էլ ՀՔԾ-ից ո՛չ հերքել են, ո՛չ էլ հաստատել:
Ի դեպ, ինչպես մեզ հայտնեց կալանավոր Սրապիոն Արթենյանի մայրը, ՀՔԾ քննիչի ապօրինություններն այսքանով չեն սահմանափակվում: Մինչ իր որդուն ծեծի ենթարկելը, Վահագն Մուրադյանն, իր խոսքով, արդեն մի շարք ապօրինություններ է կատարել քրեական գործի նախաքննության ընթացքում:

«Քննիչը ապօրինություններ շատ է կատարել: Օրինակ իմ առերեսման ժամանակ ինձ ասում էր` արագացրու, քեզ ընդամենը 5 րոպե ժամանակ, որպեսզի առերեսումը վերջացնենք, կամ էլ դու հարցերը գրիր, տուր ինձ, ես կպատասխանեմ այդ հարցերին»,- մեզ հետ զրույցում պատմեց Մարիամ Արթենյանը: Ի դեպ, կինը նաև  հավելեց, որ Վահագն Մուրադյանի նկատմամբ քրեական գործի հարուցումից հետո իր որդու նկատմամբ հարուցված քրեական գործի նախաքննությունը հանձնվել է ՀՔԾ մեկ այլ քննիչի վարույթ:

Ի դեպ, որ Սրապիոն Արթենյանին մեղադրանք է առաջադրված ՀՀ քրեական օրենսգրքի 316-րդ հոդվածով, այն է` իշխանության ներկայացուցչի նկատմամբ բռնություն գործադրելը:
Իսկ թե ում նկատմամբ և ինչ պայմաններում է Սրապիոնը բռնություն գործադրել, և ինչ նախապատմություն է նախորդել այս քրեական գործի հարուցմանը, մենք կանդրադառնանք մեր առաջիկա հրապարակումներում:

Իսկ մինչ այդ նշենք, որ Սրապիոն Արթինյանն այս մեղադրանքով արդեն 3 ամիս է, ինչ կալանավորված է: