Փաստ ինֆո

Միջազգային օլիմպիական կոմիտեն հայցադիմում է ներկայացրել ՀՀ վարչական դատարան` ընդդեմ ՀՀ էկոնոմիկայի նախարարության մտավոր սեփականության գործակալության:

Օլիմպիական կոմիտեն պահանջում է չեղյալ հայտարարել տարիներ առաջ գործակալության կողմից գրանցված ապրանքային նշանը, քանի որ այն նախորդ հինգ տարիների ընթացքում չի օգտագործվել: Իսկ ապրանքային նշանը ուղիղ կապ ունի օլիմպիական խորհրդանիշի հետ և կրկնում է դրա 5 օղակների գույները:

Ի դեպ, դատական հայցը նոր չէ. ՄՕԿ-ը այն ներկայացրել է դեռևս կես տարի առաջ՝ ապրիլի 10-ին, բայց վարչական դատարանը հայցը 6 ամիս ուսումնասիրելուց հետո որոշել է այն վերահասցեագրել այլ դատարան:

«Ուսումնասիրելով հայցադիմումը և դրան կից փաստաթղթերը՝ դատարանը եկավ այն եզրահանգման, որ հայցադիմումը ենթակա է վերահասցեագրման ընդհանուր իրավասության դատարանին»,- ասված է վարչական դատարանի որոշման մեջ:

Իսկ պատճառաբանությունը հետևյալն է. ՙՎարչական դատարանում անձը կարող է բողոքարկել վարչական մարմնի այն գործունեությունը (անգործությունը), որը կատարվել է հանրային իրավունքի (ոչ մասնավոր) բնագավառում իրականացված վարչարարության շրջանակներում»։

Մինչդեռ, տվյալ հայցով, «ակնհայտորեն երևում է, որ հայցվորը չի վիճարկում վարչական մարմնի ոչ գործողությունը և ոչ էլ անգործությունը, իսկ թիվ 13843 ապրանքային նշանի պետական գրանցման վերացումը կապվում է ոչ թե հանրային իրավունքի բնագավառում վարչական մարմնի ոչ իրավաչափ գործելակերպով, այլ` մասնավոր-քաղաքացիական իրավահարաբերությունների շրջանակներից առնչվող որոշակի փաստի գոյությամբ (ապրանքային նշանը նախորդ հինգ տարիների ընթացքում օգտագործված չլինելու փաստը)»։

Այլ կերպ ասած՝ տվյալ հարցի շուրջ ՄՕԿ-ի և Էկոնոմիկայի նախարարության մտավոր սեփականության գործակալության միջև վեճը բխում է ոչ թե հանրային, այլ` մասնավոր-քաղաքացիական իրավահարաբերություններից, ուստի և՝ ընդդատյա չէ վարչական դատարանին:

Դատարանը որոշել է հայցը վերահասցեագրել Կենտրոն և Նորք-Մարաշ վարչական շրջանների ընդհանուր իրավասության դատարան, որտեղ հոկտեմբերի 15-ին արդեն նշանակվել է Միջազգային օլիմպիական կոմիտեի հայցով նախնական դատական նիստը:

Ի դեպ, նշենք, որ վեճի առարկա դարձած ապրանքային նշանը մտավոր սեփականության գործակալության կողմից գրանցվել է 2008թ. մայիսի 4-ին՝ 10 տարի ժամկետով՝ մինչև 2018թ. մայիսի 4-ը:

Օլիմպիական խորհրդանիշի հետ առնչություն ունեցող ապրանքային նշանի օգտագործման իրավունքը տրվել է Աբովյան քաղաքում գրանցված «Մարինա-Արթուր» ՍՊԸ-ին՝ ոչ ալկոհոլային և թույլ ալկոհոլային ըմպելիքների արտադրության նպատակով: Սակայն, ինչպես պնդում է միջազգային օլիմպիական կոմիտեն, ապրանքային նշանը գրանցման օրից այդպես էլ չի օգտագործվել:

Իսկ թե ինչու է այս պարագայում ՀՀ պետական մարմինը հրաժարվում կատարել միջազգային կռույցի պահանջը, թերևս պարզ կդառնա դատական քննության ավարտին: