Փաստ ինֆո

Երևանի Տերյան փողոցում ուսանող Տիգրան Հայրապետյանի սպանության գործով մեղադրող Հակոբ Մելքոնյանն այսօր միջնորդեց անչափահաս ամբաստանյալ Հայկ Աղամալյանին մեղավոր ճանաչել՝ ՀՀ քրեական օրենսգրքի 104-րդ հոդվածի երկրորդ մասի 10-րդ կետով՝ խուլիգանական դրդումներով սպանություն և 258-րդ հոդվածի  4-րդ մասով՝ զենքի կամ որպես զենք օգտագործվող առարկաների գործադրմամբ խուլիգանություն, և դատապարտել ընդհանուր առմամբ 10 տարվա ազատազրկման:

Մեղադրողը միջնորդեց ամբաստանյալ Դավիթ Մանուկյանին մեղավոր ճանաչել ՀՀ քրեական օրենսգրքի 258-րդ հոդվածի 3-րդ մասի 1-ին կետով՝ մի խումբ անձանց կամ կազմակերպված խմբի կողմից կատարված խուլիգանություն, և 334-րդ հոդվածի 1-ին կետով՝   հանցագործությունը պարտակելը, և դատապարտել ընդհանուր առմամբ երեքուկես տարվա ազատազրկման, ապա համաներման որոշման կիրառմամբ՝ ազատել նրան պատժի կրումից, իսկ «ստորագրություն չհեռանալու մասին» խափանման միջոցը վերացնել: 

Մեղադրողը հիմնավորված համարեց մեղադրանքներն՝ ամբողջ ծավալով: Մասնավորապես, անհերքելի ապացույցներով հիմնավորված է, որ Հայկ Աղամալյանն աջ կողմից մոտեցել է հանգամանքների պատահական զուգորդմամբ դեպքի վայրում հայտնված Տիգրան Հայրապետյանին ու դանակով հարվածել նրան ու մահ պատճառել:

Մասնավորապես, վկա Մարտին Գևորգյանը տեսել է այդ պահը և բացականչել՝ «Հայկ, էս ի՞նչ արեցիր, Կոմիտասը պայթեցնելու եմ»: 

Հիմնավորված է նաև, որ ամբաստանյալ Դավիթ Մանուկյանը տեսել է գետնին ընկած Հայկ Աղամալյանի արյունոտված դանակը, վերցրել այն ու փոխանցել այլ անձի՝ հանցագործությունը պարտակելու նպատակով: Իսկ Հայկ Աղամալյանի հայտարարությունն առ այն, որ տուժողի լուսանկարը տեսնելուց հետո է հասկացել, որ ինքն այլ անձի է հարվածել, սոսկ պատասխանատվությունից խուսափելու նպատակ ունի:

Մեղադրողն ընդգծեց, որ ամբաստանյալի նախաքննական խոստովանական ցուցմունքները համընկնում են գործով հիմնավորված փաստական հանգամանքների հետ:  

Մեղադրողը նկատեց, որ պաշտպանական կողմը ոչ միասնական դիրքորոշում է արտահայտել՝ նպատակ ունենալով «կառչել ամեն հնարավոր մանրուքից»:

Մեղադրողը խնդրեց դատարանից որպես ծանրացուցիչ հանգամանք հաշվի առնել Հայկ Աղամալյանի առանձնապես ակտիվ դերակատարությունը դեպքին: Մեղադրողը նկատեց նաև, որ Հայկ Աղամալյանի  բնութագիրը համեստ, գթասիրտ լինելու, մարդկային ջերմ վերաբերմունք ունենալու և այլնի  մասին բախվում է փաստերին՝ տևական ժամանակ դանակ է կրել, չնչին առիթով բռնություն գործադրել և այլն:

Տուժողի իրավահաջորդ Պատվական Հայրապետյանը համոզմունք հայտնեց, որ «հանցագործությունը կատարվել է Հայկ Աղամալյանի կողմից»: Տուժողի իրավահաջորդն ընդգծեց, որ «կտրել են խաղաղ, հանգիստ ապրող ընտանիքի ծուխը և փորձում են դրանից հետո արդարանալ»:

Տուժողի հայրը խնդրեց դատարանից օրենքով սահմանված առավելագույն պատիժները նշանակել, որպեսզի «ժամանակ ունենան մտածելու, թե ինչ են արել»:

Պաշտպանական կողմը 20 օր ժամանակ խնդրեց պաշտպանական ճառերը նախապատրաստելու համար: Դատարանը բավարարեց միջնորդությունները: