Փաստ ինֆո

«Ավարտելով Վարդան Պետրոսյանի հարցաքննությունը, մենք տուժողներին զրկում ենք ամբաստանյալին հարցեր ուղղելու իրավունքից»,- այսօր դատարանում հայտարարեց տուժողների շահերի ներկայացուցիչ Ռուբեն Բալոյանը` ակնարկելով, որ տուժողներն այսօր կայացած նիստին ներկա չեն եղել և նախապես չեն իմացել, որ Վարդան Պետրոսյանը մտադիր է ցուցմունք տալ: Ուստի Ռուբեն Բալոյանը դատարանին միջնորդեց հետաձգել Վարդան Պետրոսյանի հարցաքննությունը մինչև հաջորդ դատական նիստը, որպեսզի նրանք էլ կարողանան ամբաստանյալին հարցեր ուղղել:

Վարդան Պետրոսյանի պաշտպան Նիկոլայ Բաղդասարյանը, սակայն, առակեց այս միջնորդության դեմ` ասելով. «Դատաքննությունը սկսելուց առաջ նախագահող դատավորը հարցրեց. «ցանկանում ենք առանց տուժողների անցկացնենք դատավարությունը», մեր հարգարժան կոլեգան ասաց, որ իրենք են պնդել առանց իրենց մասնակցության կատարել»: «Հարցերն ավարտելուց հետո հարցաքննությունն ավարտվում է, ըստ Քրեական դատավարության օրենսգրքի»,- ասաց Նիկոլայ Բաղդասարյանը, հավելելով`«ավարտված դատավարական գործողությունը հետաձգել տրամաբանորեն հնարավոր չէ»:

Տուժողների ներկայացուցչի բարձրացրած հարցի մասին դատարանում իր կարծիքը հայտնեց նաև Վարդան Պետրոսյանը: «Ահա թե ինչ է նշանակում տուժողներին բերել: Տուժողներին միշտ բերել են օգտագործելու համար, հոգեբանական ճնշումներ բանեցնելու առումով: Այո’, տուժողներին բերեն, հայհոյեն, գոռգոռան»,- ասաց Վարդան Պետրոսյանը` նշելով, որ ինքը դեմ է Ռուբեն Բալոյանի միջնորդությանը:

Ռուբեն Բալոյանն էլ, արձագանքելով ամբաստանյալի խոսքերին, հայտարարեց. «Ես ոչ մեկին չեմ օգտագործել» և կոռեկտության կոչ արեց ամբաստանյալին` միաժամանակ հավելելով. «Ձեզ են օգտագործում»:

Փոխադարձ հայտարարություններից հետո դատավոր Վաղինակ Մկրտչյանը որոշեց մերժել Վարդան Պետորսյանի հարցաքննությունը հետաձգելու Ռուբեն Բալոյանի միջնորդությունը: Տուժողների շահերի ներկայացուցիչն էլ հայտնեց, որ ինքը հետագայում հանդես կգա լրացուցիչ հարցաքննություն անցկացնելու միջնոդությամբ:

Վարդան Պետրոսյանի հարցաքննությունն ավարտելով, դատարանը որոշեց նիստը շարունակել Եղվարդի ոստիկանության հատուկ պահպանվող տարածքում, որտեղ կողմերը  զննեցին վթարված ավտոմեքենաները: