Փաստ ինֆո

«Հին Էրիվանի սեփականատեր» Մանվել Տեր-Առաքելյանի ներկայացուցիչ, փաստաբան Դավիթ Դանելյանը վճռաբեկ բողոք է ներկայացրել ընդդեմ դատավոր Արմեն Բեկթաշյանի` հրապարակայնորեն ներողություն խնդրելու պահանջի մասին հայցադիմումով գործի շրջանակում:

Ինչպես «Փաստինֆո»-ի թղթակիցը տեղեկացավ ձեռնարկատեր Մանվել Տեր-Առաքելյանի մամուլի կենտրոնից, Դավիթ Դանիելյանը խնդրում է վճռաբեկ բողոքն ընդունել քննության և բեկանել (վերացնել) ՀՀ վերաքննիչ քաղաքացիական դատարանի որոշումը:

Վերաքննիչ քաղաքացիական դատարանը՝ դատավոր Գոհար Մատինյանի նախագահությամբ, անփոփոխ էր թողել «Հին Էրիվանի» սեփականատեր Մանվել Տեր-Առաքելյանն ընդդեմ դատավոր Արմեն Բեկթաշյանի հայցի վերաբերյալ առաջին ատյանի դատարանի որոշումը: Ավան և Նոր Նորք վարչական շրջանների դատարանը՝ դատավոր Նաիրա Մարգարյանի նախագահությամբ, որոշում էր կայացրել` հայցը վարույթ չընդունելու մասին: Ըստ հիշյալ որոշման, հայցն ընդդատյա չէ առաջին ատյանի դատարանին:  

Գործարարը դատարան էր դիմել պատվի ու արժանապատվության պաշտպանության հայցապահանջով: Դատավորը, քննելով ձեռնարկատեր Մ.Տեր-Առաքելյանի հայցն, անհիմն դուրս է հրավիրել Մ.Տեր-Առաքելյանին դատարանի դահլիճից. ձայնագրառման մեջ լսվում է, թե ինչպես դատավորն ասում է՝ «խուժան»:
 
Մ.Տեր-Առաքելյանի ներկայացուցիչը գտնում է, որ ՀՀ վերաքննիչ քաղաքացիական դատարանի հիշյալ որոշումը կայացվել է դատավարական նորմերի կոպիտ խախտումներով, որի արդյունքում խախտվում է Մանվել Տեր-Առաքելյանի դատական պաշտպանության սահմանադրական իրավունքը:

Ըստ հայցվոր կողմի՝ Վերաքննիչ դատարանի որոշման «պատճառաբանական մասը» որևէ պատճառաբանություն չունի: Որոշման մեջ բոլորովին տեղին չէ նաև «Վերլուծության արդյունքում» արտահայտությունը, քանի որ հոդվածների հիշատակումից բացի որոշման մեջ ոչինչ նշված չէ:

«Այնպիսի տպավորություն է, որ որոշումը վերացնելու հիմքերն առկա են, սակայն դրանք բավարար չեն, իսկ ինչու բավարար չեն` անհայտ է»,- նշվում է վճռաբեկ բողոքում:

Վերաքննիչ դատարանի որոշմամբ՝ պատճառաբանված չէ, թե ինչու տվյալ վեճը ենթակա չէ դատարանում քննության: Դատարանը, ըստ էության, կամայականորեն սահմանելով ակնհայտորեն դատարանի ենթակայությանը հանձնված վեճի դատարանի քննությանը ենթակա չլինելու մասին՝  բացառել է բողոքաբերի իրավական պաշտպանության արդյունավետ, իրացվելի և գործուն դատական պաշտպանության միջոց ստանալու իրավունքը: 

«Տպավորություն է ստեղծվում, որ ՀՀ դատական համակարգը (առնվազն դրա երկու  ատյանը) հետևողականորեն և միտումնավոր փորձում են սահմանափակել Մանվել Տեր-Առաքելյանի դատական մատչելիության իրավունքը, ինչը հիմնարար իրավունք է և ենթակա չէ սահմանափակման (մի քանի բացառիկ դեպքերի բացառությամբ)»,- եզրահանգում է Դավիթ Դանիելյանը:

Ըատ փաստաբանի՝ վճռաբեկ բողոքը քննության ընդունելու համար առկա է առնվազն օրենքի միատեսակ կիրառությունն ապահովելու անհրաժեշտություն, ինչպես նաև  առկա է դատական սխալ, որն արտահայտվել է վեճը դատարանի քննությանը ենթակա չլինելու մասին հետևությունը որևէ կերպ չպատճառաբանելու, չհիմնավորելու ձևով: Դա  ազդել է գործի ելքի վրա, քանի որ քաղաքացին զրկվել է դատական պաշտպանության իրավունքից:
 
 «Փաստինֆո»-ն արդեն տեղեկացրել է, որ դատավորի վերոհիշյալ գործողությունների առնչությամբ Մ.Տեր-Առաքելյանը դիմել էր նաև ՀՀ արդարադատության խորհրդին, ՀՀ արդարադատության նախարարությանը, Դատարանների նախագահների խորհրդի էթիկայի հանձնաժողովին:

Արդարադատության նախարարությունից դիմումատուին տեղեկացրել էին, որ «Ձեր բողոքը դատավոր Բեկթաշյանի դեմ ընդունվել է վարույթ», իսկ ՀՀ արդարադատության խորհուրդն ու Դատարանների նախագահների խորհրդի էթիկայի հանձնաժողովն առայժմ քար լռություն էին պահպանում: Այս պահի դրությամբ որևէ այլ տեղաշարժ այս հարցում առայժմ չկա: