Փաստ ինֆո

«Արմավիա» ավիաընկերության դեմ հայցերը գնալով ավելանում են: Այս անգամ դատարան դիմողը մասնավոր ընկերություն է:

«Կարկոմավտո» ՍՊԸ-ն դիմել է Մալաթիա-Սեբաստիա վարչական շրջանի ընդհանուր իրավասության դատարան` պահանջելով «Արմավիա»-ից բռնագանձել 6 տարվա վաղեմության պարտքը:

Բանն այն է, որ «Կարկոմավտո»-ն և «Արմավիա»-ն դեռևս 2008թ. մայիսին 8.280.000 ՀՀ դրամի չափով գովազդային ծառայությունների մատուցման պայմանագիր են կնքել:

Սակայն, ինչպես նշում է «Կարկոմավտո» ընկերությունն իր դատական հայցում, առ այսօր «Արմավիա»-ի կողմից ո'չ ծառայությունն է մատուցվել, ո'չ գումարը վերադարձվել:

Հետաքրքրական է, որ 8.280 000 դրամ պարտք «Կարկոմավտո»-ին իրականում պարտք է եղել Միխայիլ Բաղդասարովին պատկաող մեկ այլ ընկերություն` «Միկա մարզական համալիր» ՓԲԸ-ն, բայց 2008թ. «Կարկոմավտո» ՍՊ ընկերության, «Արմավիա ավիաընկերություն» ՍՊ ընկերության, «Միկա մարզական համալիր» ՓԲ ընկերության և «Միկա Քորփորեյշն» ՓԲ ընկերության միջև կնքված պայմանագրով այդ պարտքը փոխանցվել է «Արմավիա»-ին, որն էլ պարտավորվել է այն մարելч գովազդային ծառայություններ մատուցելով:

Հետաքրքիր է նաև այն, որ բռնագանձման պահանջով «Կարկոմավտո»-ն դատարան է դիմել միայն 2013թ. ապրիլին, այսինքն` այն բանից հետո, երբ հայտնի դարձավ «Արմավիա»-ի ֆինանսական դժվարությունների մասին, և ավիաընկերությունը դադարեցրեց իր գործունեությունը:

Ի դեպ, 8 մլն դրամ պարտքի դիմաց ընկերությունը դատական հայցով պահանջում է կրկնակի ավել գումար` վկայակոչելով պայմանագրի այն կետը, որի համաձայն` գովազդը չտեղադրելու դեպքում «Արմավիա»-ն պարտավոր է կրկնակի չափով փոխհատուցել դրա արժեքը:

Մալաթիա-Սեբաստիա վարչական շրջանի ընդհանուր իրավասության դատարանում կայացած դատաքննությանը «Արմավիա» ավիաընկերությունը չի ներկայացել, գործը քննվել է նրա բացակայությամբ, և դատարնը որոշել է բավարարել «Կարկոմավտո»-ի հայցը:

Այսպիով՝ «Արմավիա» ավիաընկերությունից հօգուտ «Կարկոմավտո» ՍՊԸ-ի առաջիկայում կբռնագանձվիել 16.560.000 դրամ, ևս 331 200 դրամ էլ կբռնագանձվի հօգուտ ՀՀ պետական բյուջեի` որպես հետաձգված պետական տուրքի գումար:

Դե իսկ դատարանի վճիռը կամովին չկատարելու դեպքում այն կկատարվի ՀՀ ԱՆ ԴԱՀԿ ծառայության միջոցով: