Փաստ ինֆո

Այս տարվա հունվարի 17-ին հայտնաբերված մոտ մեկ տոննա հերոինի գործը դատարանում է, սակայն դատական առաջին նիստը, որը նշանակվել էր օգոստոսի 14-ին, հետաձգվել է: Այս մասին է գրում «Հայկական Ժամանակ»-ը:

Լրատվամիջոցը հիշեցնում է, որ գործի շրջանակներում մեղադրանք է առաջադրվել Թուրքիայի քաղաքացի Օսման Ուգուրլուին և Վրաստանի քաղաքացի Ավթանդիլ Մարտիաշվիլուն՝ ՀՀ քրեական օրենսգրքի 215-րդ հոդվածի 2-րդ մասով և 266-րդ հոդվածի 3-րդ մասի 2-րդ կետով:

Ճիշտ է, նախաքննությունն ավարտվել է, բայց չի հայտնաբերվել, թե ով է եղել այդ մեկ տոննա թմրամիջոցի պատվիրատուն:

Թղթակցի հետ զրույցում Ուգուրլուի պաշտպան Արտակ Գարոյանն ասել է, որ նախաքննական մարմնի դիրքորոշմամբ՝ բավարար ապացույցներ չկային՝ պատվիրատուի նկատմամբ հետախուզում հայտարարելու համար:

Սակայն նա միաժամանակ ասել է, որ իր պաշտպանյալը պատվիրատուի մասին որոշակի տվյալներ հաղորդել է: Մասնավորապես՝ նա իմացել է պատվիրատուի միայն մականունը և այն, որ նա ասիական երկրներից մեկի քաղաքացի է:

Պատվիրատուի հետ Ուգուրլուն հեռախոսային խոսակցություն չի ունեցել, նրանք հանդիպել են սրճարանում: Իսկ Մարտիաշվիլին վարձու աշխատող է եղել այն ընկերությունում, որը հիմնել է Ուգուրլուն:

Ըստ Գարոյանի՝ իր պաշտպանյալին պատվիրատուն ասել է, թե ավազ պետք է տեղափոխեն: Բայց երբ նա մեքենայի բանալիները տվել է պատվիրատուին, վերջինս ավազի փոխարեն հերոին է բեռնել:

Ուգուրլուի պաշտպանի ասելով՝ իր պաշտպանյալը չի իմացել, որ բեռնատարում թմրամիջոց կա, սակայն իմացել է, որ հաջորդ անգամ հաշիշ պիտի տեղափոխի:

Այդ պայմանավորվածության համար Օսման Ուգուրլուն պատրաստ է պատասխանատվություն կրել:

«Նախաքննական մարմինը գտավ, որ առանց պատվիրատուի էլ գործը երկու մեղադրյալով եփված է, պատրաստ է դատական քննության համար»,- ասել է Արտակ Գարոյանը:

Միաժամանակ պաշտպան նա սել է, որ նախաքննական մարմինը շատ անելիքներ ուներ, որովհետև անհնար է, որ հայաստանյան կրիմինալ աշխարհը  նախապատրաստվող հանցագործության մասին չիմանար և աջակցություն չլիներ կրիմինալի աշխարհից: Կարելի է պարզել՝ Հայաստանում ո՞վ է աջակցել:

Հոդվածն ամբողջությամբ կարող եք կարդալ «Հայկական Ժամանակ» օրաթերթի` 29.08.2014թ. համարում: