Փաստ ինֆո

Դատարանն այսօր մասնակի բավարարել է ցմահ ազատազրկման դատապարտված Սողոմոն Քոչարյանի ներկայացուցիչ Ռոբերտ Ռևազյանի բողոքը՝ պարտավորեցնելով գլխավոր դատախազությանը վերացնել դատապարտյալի իրավունքների խախտումը:
 
Սողոմոն Քոչարյանը նախ մահապատժի է դատապարտվել, ապա մահապատիժը փոխարինվել է ցմահ ազատազրկման` Գորիս-Կապան ավտոմայրուղում Իրանի Իսլամական Հանրապետության քաղաքացի Իրաջ Փուր Միրզա Բեկի նկատմամբ ավազակություն կատարելու և նրան սպանելու, ինչպես նաև ապօրինի հրազեն պահելու համար:

Դատապարտյալի ներկայացուցչի բողոքի համար հիմք է ծառայել 2014թ. մայիսի 19-ին «Հետաքննող լրագրողներ» հասարակական կազմակերպության նախագահի կողմից ՀՀ գլխավոր դատախազին հասցեագրված հաղորդումը: Դրանում վկայակոչվել է Սողոմոն Քոչարյանի վերաբերյալ քրեական գործով ՀՀ Գերագույն դատարանում մեղադրանքը պաշտպանած դատախազ Ժիրայր Խառատյանի` «Դատախազը» վավերապատման մեջ տեղ գտած հայտարարությունն այն մասին, որ ինքը մեղադրանքի պաշտպանությունն իրականացնելիս համաձայն չի եղել Սողոմոն Քոչարյանի նկատմամբ մահապատիժ նշանակելուն, սակայն ՀՀ գլխավոր դատախազ Ա.Գևորգյանը համոզել է իրեն` բացատրելով, որ խստագույն պատիժը պայմանավորված է Հայստանում Իրանի դեսպանի պահանջով:

Վերոգրյալի հիման վրա հաղորդման մեջ խնդրվել է հարուցել նոր երևան եկած հանգամանքով դատավճռի վերանայման վարույթ:

2014թ. մայիսի 31-ին ՀՀ գլխավոր դատախազությունը որոշում է կայացրել նոր երևան եկած հանգամանքով վերանայման վարույթ հարուցելը մերժելու մասին:

ՀՀ գլխավոր դատախազությունը գտել է, որ ոչ սպառիչ հանգամանքները դրանք հաստատող օրինական ուժի մեջ մտած դատավճռի առկայություն չեն ենթադրում, այդ հանգամանքները դատական ակտը վերանայելու հիմք կարող են հանդիսանալ, եթե դրանք ինքնին կամ մինչև այդ պարզված հանգամանքների հետ ապացուցում են ոչ թե դատավճռի անհիմն լինելը, այլ ավելի կոնկրետ` դատապարտյալի անմեղությունը կամ նրա կատարած հանցանքի նվազ ծանր կամ ավելի ծանր լինելը, քան այն, որի համար նա դատապարտվել է, ինչպես նաև ապացուցում են արդարացվածի կամ այն անձի մեղավորությունը, որի նկատմամբ քրեական հետապնդումը դադարեցվել է, կամ գործով վարույթը կարճվել է:

Ըստ դատախազության՝ «Հաղորդմամբ ներկայացված չէ նաև որևէ այնպիսի հանգամանք, որն ինքնին կամ այլ հանգամանքների հետ կհաստատի Սողոմոն Քոչարյանի անմեղությունը, կամ նրա կատարած հանցանքի նվազ ծանր, կամ ավելի ծանր լինելը, քան այն, որի համար նա դատապարտվել է»:

Հաղորդման մեջ, ըստ գլխավոր դատախազության, ընդամենը վկայակոչված է գործով մեղադրողի հայտարարությունը` անձի նկատմամբ նշանակվող պատժի տեսակի կամ չափի կապակցությամբ իր անհամաձայնության մասին:

Գլխավոր դատախազությունը եզրահանգել է, որ բացի այն, որ դատապարտյալի նկատմամբ նշանակված պատժի վրաբերյալ մեղադրողի դիրքորոշումը չի տեղավորվում օրենքով նախատեսված նոր երևան եկած հանգամանքների շրջանակներում, նաև ինքնին որևէ կերպ չէր կարող կանխորոշել դատավճռով նշանակվող պատժի տեսակը կամ չափը:

«Ինչպես գործող, այնպես էլ նախկին (վիճարկվող դատական ակտը կայացնելու պահին գործած) ՀՀ քրեական դատավարության օրենսգրքերն ամբաստանյալի նկատմամբ նշանակվող պատժի տեսակն ու չափը որոշելը, ի թիվս այլ հարցերի՝ վերապահում են դատարանի` որպես գործի լուծման գործառույթն իրականացնող մարմնի բացառիկ իրավասությանը: Դատարանը կաշկանդված չէ ինչպես ամբաստանյալի մեղավորության, այնպես էլ՝ նրա նկատմամբ նշանակվող պատժի հարցերի վերաբերյալ մեղադրողի դիրքորոշմամբ»,- վերլուծում է Գլխավոր դատախազությունը:
 
Ռոբերտ Ռևազյանն իր հերթին գտել է, որ «Հետաքննող լրագրողներ» հասարակական կազմակերպության նախագահի կողմից ՀՀ գլխավոր դատախազին հասցեագրված հաղորդման հիման վրա գործի բազմակողմանի, լրիվ և օբյեկտիվ քննություն չի կատարվել, օրենքի ոչ ճիշտ մեկնաբանում է եղել:

Մասնավորապես, ըստ դատապարտյալի ներկայացուցչի, գործով մեղադրողի հայտարարությունը ոչ թե անձի նկատմամբ նշանակվող պատժի տեսակի կամ չափի կապակցությամբ իր անհամաձայնության մասին է, «ինչպես մեղմորեն ներկայացրել է դատախազությունը», այլ ավելին` հայտարարություն է՝ արդարադատության իրականացմանը և քննությանը խոչընդոտելու մասին: Ավելին, նա հայտարարել էր, որ Սողոմոն Քոչարյանի մահապատժի դատավճիռը քաղաքական ճնշման հետևանք է եղել, ընդ որում՝ քաղաքական պատվերն ու ճնշումը եղել են մեկ այլ պետության կողմից:

Ընդգծելով, որ ինչպես գործող, այնպես էլ (վիճարկվող դատական ակտը կայացնելու պահին գործած) ՀՀ քրեական օրենսգրքերը նախատեսում են պատասխանատվություն գործի բազմակողմանի, լրիվ և օբյեկտիվ քննությանը խոչընդոտելու նպատակով դատախազի գործունեությանը ցանկացած ձևով միջամտության համար, ակնհայտ է, որ  գործով դատախազի նկատմամբ տեղի է ունեցել միջամտություն:

Դատապարտյալի ներկայացուցիչը գտնում է նաև, որ հիմնավորված չէ Գլխավոր դատախազության այն պնդումը, թե հաղորդմամբ ներկայացված չէ նաև որևէ այնպիսի հանգամանք, որը կհաստատի Սողոմոն Քոչարյանի կատարած հանցանքի նվազ ծանր լինելը:

«Արդյո՞ք գործով մեղադրողի հնչեցրած հայտարարությունը չի խոսում այն մասին, որ Սողոմոն Քոչարյանի արարքն իրականում եղել է նվազ ծանր, քան ներկայացվել է և որի համար պահանջվել է մահապատիժ: Իսկ եթե գործով մեղադրողը հայտարարեր ոչ թե արարքը նվազ ծանր լինելու մասին, այլ այն մասին, որ Սողոմոն Քոչարյանը եղել է անմեղ, արդյո՞ք գլխավոր դատախազությունը նույնպես պետք է պնդեր, որ դա նոր երևան եկած հանգամանք չէ»,- գտնում է փաստաբանը:

Հիմնվելով վերոհիշյալ փաստարկների վրա՝ Ռոբերտ Ռևազյանը խնդրել է վերացնել ՀՀ գլխավոր դատախազության՝ 2014թ. մայիսի 31-ի որոշումը և պարտավորեցնել նոր երևան եկած հանգամանքով հարուցել վերանայման վարույթ:

Լուսանկարը՝ hetq.am-ի