Փաստ ինֆո

«Հույս ունենք մինչև ԱԺ արձակուրդ գնալն ամբողջությամբ ավարտել քննարկումները, ամռան ընթացքում ամփոփել և չի բացառվում, որ այդ դեպքում կարողանանք արդեն աշնանը նախագիծը ներկայացնել ընթարցումների»,- «Փաստինֆո»-ին ասել է  Արդարադատության նախարարի տեղակալ Արման Թաթոյանը` ներկայացնելով  քրեական դատավարության նոր օրենսգրքի նախագծի քննարկումների ընթացքը:

«Պայմանավորվածությունն այնպիսին է, որ մենք ամռան վերջին ԱԺ պետք է ներկայացնենք իրենց առաջարկությունների ամփոփաթերթը, հավանաբար նորից քննարկում կլինի, և ամփոփելով, պարզ կդառնա` աշնանը կանցնե՞նք ընթերցումների փուլ, թե՞ ոչ»,- նշեց փոխնախարարը:

Հիշեցնենք, մայիսի 16-ին ԱԺ պետաիրավական հարցերի մշտական հանձնաժողովն առանց քննարկման միաձայն ընդունեց  Քրեական դատավարության նոր օրենսգրքի նախագիծը ԱԺ-ի մեծ օրակարգում ընդգրկելու առաջարկությունը, քանի որ նախագիծն ԱԺ ուղարկելուց հետո օրենքով նախատեսված 1 տարին լրացել էր, և մեծ օրակարգում չընդգրկվելու դեպքում այն մեխանիկորեն դուրս կմնար օրակարգից ընդհանրապես:

Այսպիսով, արդեն մեծ օրակարգում ընդգրկվելուց հետո օրենսգրքի նախագիծը մանրամասն քննարկման առարկա է դարձել ԱԺ Պետաիրավական հարցերի մշտական հանձնաժողովում:

Արդարադատության փոխնախարար Արման Թաթոյանից փորձեցինք ճշտել ի՞նչ առաջարկություններ են ստացվել պատգամավորներից, ի՞նչ փոփոխություններ են նախատեսվում նախագծում:

«Շատ կառուցողական քննարկումներ են ընթանում, և մի քանի ինստիտուտների վերաբերյալ սկզբունքային առաջարկություններ կան, որոնք պետք է փոխվեն: Օրինակ` հարկադրանքի միջոցների վերաբերւալ, մասնավորապես` կալանքի կիրառումն այն հանցագործությունների վերաբերյալ գործերով, որոնցով ազատությունից զրկման հետ կապված պատիժ ընդհանրապես չի նախատեսվում, կամ նախատեված հնարավոր սանկցիայի ժամկետն ավելի փոքր է, քան անձը կարող է մնալ կալանքի տակ: Օրինակ` ոչ մեծ ծանրության հանցագործության համար նախագծով 2 ամիս կալանք է նախատեսվում, բայց կարող են լինել դեպքեր, երբ անձը դատարանի որոշմամբ դատապարտվի  ընդամենը 1 ամսվա ազատազրկման, որքանո՞վ է ճիշտ մարդուն սկզբում 2 ամիս կալանքի տակ պահել, եթե վերջում նա պիտի 1 ամսվա ազատազրկման դատապարտվի»,- ասաց Արման Թաթոյանը:

Հաջորդ հարցը, որ ԱԺ պետաիրավական հանձնաժողովի կողմից հատուկ ուշադրության է արժանացել, ըստ փոխնախարարի, օրենսգրքի նախագծով նախատեսված դեպոնացման ինստիտուտի հետ կապված դատավորի դերի ուժեղացման հարցն է:

Մեր հարցին, թե կա՞ն արդյոք առաջարկություններ, որոնց նախագծի աշխատանքային խումբը չի համաձայնել, Արման Թաթոյանը բացասական պատասխան տվեց: «Օրինակ դեպոնացման հետ կապված առաջարկվող լուծմանը անհամաձայնություն էր հայտնվել ԱԺ պատգամաորների կողմից, և միասին քննարկելուց հետո եկանք ընդհանուր լուծման: Ոչ թե ինստիտուտն էր կասկածի տակ դրվում, այլ մեխանիզմի օրենսդրական լուծումները»,- նշեց մեր զրուցակիցը:

Նա նաև անդրադարձավ կոնկրետ հարցի, որի շուրջ ԱԺ հանձնաժողովում բավական բուռն քննարկումներ են տեղի ունեցել: Խոսքը ծանր կամ առանձնապես ծանր հանցանք կատարելու մեջ մեղադրվող անձի սկզբնական կալանավորման մասին է: Գործող օրենսգրքով քննիչի հիմնավոր կասկածը բավարար է անձին 1-ամսյա սկզբնական կալանքի ենթարկելու համար: «Հիմա քննարկում ենք, որպեսզի դատարանը գնահատելու հնարավորություն ունենա, և եթե որակումն առերևույթ չի համապատասխանում քննիչի միջնորդության մեջ նշված փաստական հանգամանքներին, ապա կարող է մերժել: Բայց սա  դեռ քննարկման փուլում է»,- հիշեցրեց Արման Թաթոյանը:

Ի դեպ, ՔԴՕ նախագծի հասարակական քննարկման փուլում հատկապես լայն անդրադարձի արժանացան հենց խափանման միջոցների, հատկապես առաջարկվող նոր խափանման միջոցների ներդրման առաջարկները, ուստի փոխնախարարից հետաքրքրվեցինք, թե ինչպե՞ս դրանք ընդունվեցին ԱԺ պատգամավորների կողմից: «Միանգամայն դրական գնահատվեց խափանման միջոցների հենց այդ լայն շրջանակի նախատեսումը: Ավելին ասեմ` մենք, օրինակ, նախատեսել էինք, որ վարչական կալանքը, տնային հսկողությունը «կարող են» իրականացվել էլեկտրոնային միջոցներով, եթե դատարանը այդպես որոշի, այսինքն` այնպես չէ, որ պարտադիր էր, բայց ԱԺ-ի կողմից առաջարկություն եղավ, և մենք ընդունեցինք դա, որ ամեն դեպքում էլեկտրոնային միջոցներով վերահսկողություն իրականացվի, ինչը կբարձրացնի այդ խափանման միջոցի ադյունավետությունը»,- ասաց Արման Թաթոյանը` հավելելով, որ ԱԺ պետաիրավական հանձնաժողովի կողմից դրական արձագանքի են արժանացել  նաև կալանքը որպես խափանման միջոց կիրառելու նվազեցմանն ու ուղղված միջոցները: «Հատկապես «ձերբակալում, խափանման միջոցներ» հարցի վերաբերյալ ունենք շատ առաջարկություններ, մասնավորապես` հօգուտ անձի իրավունքների որոշակի փոփոխություններ կլինեն»,- նշեց Արման Թաթոյանը:

Արդարադատության փոխնախարարը  նշեց, որ օրենսգրքի նախագծում կլինեն նաև որոշ խմբագրական բնույթի փոփոխություններ, որոնք հենց նախագծի աշխատանքային խմբի կողմից են առաջարկվել: