Փաստ ինֆո

Ինչպես և սպասվում էր, մարդու իրավունքների պաշտպանը 2013թ-ի զեկույցի հրպարակումից հետ, ստիպված է պատասխանել նաև դրանում հիշատակված պետական մարմինների մեկնաբանություններին ու հակադարձումներին:

«ՏՄՊՊՀ նախագահ Արտակ Շաբոյանն անդրադարձել էր Օմբուդսմենի 2013թ. տարեկան զեկույցին, սակայն զեկույցը, ամենայն հավանականությամբ, հանգամանալից չի ուսումնասիրվել: Արտակ Շաբոյանը խոսում է օրենքի չիմացությունից, այն դեպքում, երբ  ՏՄՊՊՀ-ի կողմից Զեկույցը  սխալ է մեկնաբանվել, նենգափոխվել է դրանում բարձրացված խնդիրը և գերիշխող դիրքի առկայության մասին մտահոգությունը ներկայացվել է որպես Պաշտպանի կողմից պնդում, որ գերիշող դիրք ունենալն ինքնին  անօրինական է»,- ասված է ՄԻՊ-ի պատասխան արձագանքում: Ի դեպ, նախօրեին նույն ձևակեպմամբ էլ ՏՄՊՊՀ նախագահն էր ՄԻՊ-ին մեղադրել օրենքի չիմացության մեջ:

Հիշեցնենք, Պաշտպանի զեկույցում գերիշխող դիրքի չարաշահման մասին բերվում էր շաքարավազի շուկայի օրինակը և նշվում. «2013 թվականի միայն առաջին եռամսյակում իրացված շաքարավազի 99,8%-ը բաժին է հասել «Ալեքս Գրիգ» ընկերությանը, սակայն, ըստ Հանձնաժողովի, դա գերիշխող դիրքի չարաշահում չի հանդիսացել»: Զեկույցն անդրադարձել էր նաև միևնույն կամ նման խախտումներ կատարած ընկերությունների նկատմամբ տուգանքների չհիմնավորված տարբեր չափեր նշանակելու փաստին, օրինակ` մի ընկերություն տուգանվել է, իսկ մյուսը` միայն նախազգուշացում ստացել:

ՏՄՊՊՀ-ն հերքել էր, որ իր կողմից կիրառվել են երկակի ստանդարտներ, մինչդեռ, ՄԻՊ-ը շարունակում է պնդել, որ «Հանձնաժողովին տրված տուգանքի չափի որոշման չափազանց լայն հայեցողությունը, ինքնին պարունակում է չարաշահումների և տարբերակված մոտեցումների ռիսկեր, առավել ևս, երբ սահմանված չեն պատասխանատվության չափի որոշման հստակ չափանիշներ»:

Պաշտպանի զեկույցը նաև եզրակացնում էր, որ հանձնաժողովի նկատմամբ հասարակության վստահությունը չափազանց ցածր է, ինչի վկայությունը 2013 թվականի ընթացքում քաղաքացիների և տնտեսվարող սուբյեկտների կողմից հանձնաժողովին ուղղված ընդամենը 68 դիմում-բողոքներն են: Այս դիտարկմանը Արտակ Շաբոյանը պատասխանել էր. «Միայն դիմում բողոքների քանակով չէ, որ որոշվում է այս կամ այն պետական կառույցի հանդեպ հասարակության վստահության չափը: Բացի այդ, պարզ չէ, թե ինչ չափանիշով է դիմումների քանակը համարվում սակավաթիվ կամ ոչ սակավաթիվ, ինչ վիճակագրական տվյալների վրա է հիմնված այդ եզրահանգումը»: ՄԻՊ-ն էլ մեկնաբանել է, թե ինչ չափանիշներով է առաջնորդվել նման եզրահանգում անելիս:  «Երբ Հայաստանում կան տասնյակ հազարավոր ձեռնարկատերեր և միլիոնավոր սպառողներ, ՏՄՊՊՀ-ին 2013թ-ի ընթացքում վստահել է ընդամենը 68 դիմող (ամսական կտրվածքով՝ միջինը 6 դիմող): Մինչդեռ, տնտեսական մրցակցության խնդիրներով Օմբուդսմենը ստանում է բազմաթիվ բողոքներ: Արդյունքում, Հանձնաժողովի ստացած սակավաթիվ դիմումները վկայում են ոչ թե խնդիրների բացակայության, այլ Հանձանժողովի հանդեպ վստահության պակասի մասին»,- ասված է ՄԻՊ-ի` ՏՄՊՊՀ-ին ուղղված պատասխանի մեջ:

Ի դեպ, նշենք, որ ՄԻՊ-ն այսօր անդրադարձել է իր զեկույցին նաև այլ պետական մարմինների արդեն հրապարակված կամ սպասվող պատասխաններին: «Չնայած դրանցում տեղ են գտել արդեն ավանդական դարձած խայթոցներ ու բովանդակային անճշտություններ, սակայն պետական այդ մարմինների արձագանքը կիրթ է և հնարավորություն է ստեղծում ծավալել օգտակար հրապարակային բանավեճ»,-հայտարարում է ՄԻՊ գրասենյակն ու հավելում, որ անարձագանք կմնան միայն «էժանագին պիտակները»:

«Մեր կառույցին և արժեհամակարգին հարիր չէ մոլագարների կամ սադրիչների հետ լեզվակռիվը: Նման մարդիկ մեր կողմից պատասխանի չեն արժանանա, սակայն մեր պաշտպանությունն ինչպես միշտ մատչելի կլինի նաև նրանց համար»,- հայտարարում է ՄԻՊ-ը: