Փաստ ինֆո

«Ընդդեմ կենսաթոշակային պարտադիր վճարների»  նախաձեռնության անդամ քաղաքացիները  նամակներ են ուղղել ԱԺ պատգամավորներին և խմբակցություններին` պահանջելով վեր կանգնել կուսակցական շահերից և նախաձեռնել ստորագրահավաք՝ ԱԺ արտահերթ նիստ գումարելու և Օրենքը փոփոխելու նպատակով (վերացնել ՊԱՐՏԱԴԻՐՈՒԹՅԱՆ բաղադրիչը):

Հակառակ պարագայում, եթե չհաջողվի հավաքել անհրաժեշտ 44   ստորագրություններն արտահերթ նիստ գումարելու համար,  քաղաքացիները խնդրում են  հավաքել  27 ստորագրություն՝  Սահմանադրական դատարան դիմելու համար: Հաշվի առնելով այն  հանգամանքը, որ ժամանակին Օրենքին դեմ են քվեարկել ավելի քան 30 պատգամավորներ,  նման ստորագրահավաքի նախաձեռնումը  իրատեսական է: Հիմնախնդրին լուծում  տալու   ակնկալիքով՝  Նախաձեռնության  ջանքերով կազմակերպվել է ստորագրահավաք, որի արդյունքում ավելի քան 2700 քաղաքացիներ դիմել  են ՀՀ վարչապետին, ով սակայն, հարցը վերահասցեագրել է Սոց. Ապ. նախարարություն:  Դիմում-նամակ է   հղվել նաև Մարդու իրավունքների պաշտպանին` խնդրելով վիճարկել Օրենքի  սահմանադրականությունը Սահմանադրական դատարանում:

Սույն նախաձեռնությանը միացած ավելի քան 7000 քաղաքացիներ վճռականություն  են հայտնում պայքարը շարունակել ՀՀ Սահմանադրությամբ և օրենքներով չարգելված բոլոր  օրինական, այդ թվում՝ հրապարակային միջոցառումների, երթերի ու ցույցերի միջոցով:

«Մենք ակնկալում ենք բոլոր մտահոգ քաղաքական և քաղաքացիական ուժերի, ինչպես նաև անհատ քաղաքական գործիչների ու պատգամավորների դրական արձագանքը և համախմբումը այս կարևորագույն հարցի շուրջ՝ հայտնելով բոլոր մտահոգ ուժերի հետ համագործակցելու մեր պատրաստակամության մասին: Մենք գիտակցում ենք, որ Ձեզանից յուրաքանչյուրը կամ Ձեր կողմից ներկայացվող քաղաքական ուժերը կարող են ունենալ որոշակի տարաձայնություններ այս կամ այն հարցի շուրջ: Սակայն մենք խնդրում ենք վեր կանգնել այդ տարաձայնություններից, քանի որ խոսքը գնում է կարևորագույն հարցի մասին: Մեր պայքարը չի ճանաչում կուսակցական պատկանելություն կամ նախասիրություն»,- նշվում է բաց նամակում:

«Կուտակային կենսաթոշակների մասին»  ՀՀ օրենքով սահմանված  պարտադիր կուտակային վճարներ կատարելու պարտավորությանը վերաբերող դրույթներն  ուժի մեջ են մտնում 2014 թվականի հունվարի 1-ից: «Ընդդեմ կենսաթոշակային պարտադիր  վճարների»  քաղաքացիական նախաձեռնությունն իր սկզբունքային անհամաձայնությունն է  հայտնել Օրենքով սահմանված վճարների պարտադիրության գաղափարի և մի շարք այլ  դրույթների վերաբերյալ, քանի որ այն ոչ միայն չի բխում ՀՀ-ում առկա սոցիալ-տնտեսական իրականությունից, այլև հակասում է ՀՀ Սահմանադրությանը և կենսաթոշակային բարեփոխումների գաղափարին:  «Ըստ էության, ՀՀ կառավարությունն անհաջող փորձ է կատարել տեղայնացնելու  «միջազգային փորձը», և հերթական անգամ քաղաքացիների շահերը ստորադասվել են ֆինանսական կառույցների շահերին: Օրենքի կիրառումը 2014թ. հունվարի 1-ից նշանակում է քաղաքացիների ընթացիկ աշխատավարձի փաստացի նվազում մոտավորապես 6-13%-ով  և սա պաշտոնապես 40 տոկոս աղքատություն արձանագրած երկրում, որտեղ 2013թ-ի ինը ամիսների ընթացքում մոտ 120 հազար մարդ արդեն լքել է հայրենիքը»,- նշում են նախաձեռնության անդամները:

Ըստ էության, քաղաքացիների գնահատմամբ, կառավարությունը փորձում է իր կողմից կենսաթոշակային վճարումներ կատարելու  ֆինանսական բեռը տեղափոխել քաղաքացու վրա: Կառավարությունը, ունենալով  նվազագույն սոցիալական կենսաթոշակ վճարելու պարտավորություն, անհասկանալիորեն և  ոչ իրավական եղանակով փորձում է պարտադրել անձին վճարել հավելյալ գումար՝ նվազագույն (սոցիալական) կենսաթոշակից ավել թոշակ ստանալու համար:Մինչդեռ, նվազագույնից ավել թոշակ ստանալը կարող է իրականացվել միայն կամավոր հիմունքներով, այլ ոչ թե պարտադիր կարգով: Որևէ մեկը իրավունք չունի անձին  պարտադրել անելու որևէ գործողություն նվազագույնից ավել կենսաթոշակ ստանալու համար: Այսինքն, Օրենքի այս պարտադիր բաղադրիչը չունի իրավական հիմնավորում և ակնհայտ հակասում է ՀՀ Սահմանադրությանը:

Օրենքը պարտադրում է 1974թ.-ից հետո ծնված բոլոր անձանց կատարել վճարումներ անհայտ ծագումով ֆոնդերին, որպեսզի քաղաքացին տարիներ անց ստանա կենսաթոշակ՝  իր իսկ վճարած գումարի հաշվին: Ընդ որում, այդ տարիների ընթացքում անձը չի ստանում իր վճարած գումարի դիմաց բանկային տոկոսադրույք (այլ միայն գնաճային տոկոս), մինչդեռ  ֆինանսական ֆոնդերը կառավարող կառույցները ՀՀ քաղաքացիների գումարները ներդնելու են արտերկրում, ստանալու են գերշահույթ, զարգացնելու են այլ պետությունների տնտեսությունը, իսկ ՀՀ կառավարությունը երաշխավորելու է քաղաքացիների կատարած վճարումների միայն 30 տոկոսը՝ այն էլ պետբյուջեի հաշվին, որը գոյանում է հենց նույն քաղաքացու կամ գործարարի հարկային վճարումներից: Կառավարությունը փորձել է կրկնօրինակել աշխարհում տարածում գտած, երկու բաղադրիչ ունեցող մոդելը (այն է՝ պետական նվազագույն կամ սոցիալական կենսաթոշակ –100 տոկոս պետբյուջեից ֆինանսավորվող և կամավոր), սակայն երկու բաղադրիչի փոխարեն ներդրել է 3 բաղադրիչ ունեցող համակարգ, ու արհեստականորեն ավելացրել է միջանկյալ մի բաղադրիչ՝ պարտադիր բաղադրիչ պետության և քաղաքացու կողմից 50/50 մասնակցությամբ:

Նախաձեռնության անդամները պարզաբանում են, որ գրեթե ամբողջ աշխարհում գոյություն ունի սոց. վճարը որպես  հարկատեսակ (social security), որը  ՀՀ-ում  եկամտային միասնական հարկի սոց. վճարի մասն  է, և կամավոր կենսաթոշակային վճար, երբ պետությունը կամ գործատուն քաղաքացու  վճարած կամավոր գումարի չափով ևս վճարում է կատարում (matching): Սա կամավոր  վճարի խրախուսման մեխանիզմն է:  «Սակայն մեր պարագայում կառավությունը կիրառել է միջանկյալ պարտադիր matching: Նման լուծումը անարդարացի է և ոչ իրավաչափ, քանի որ  ստացվում է՝  մենք վճարում ենք և սոց. վճար և պարտադիր մասնակցում մեր թոշակի  ձևավորմանը, որն ըստ էության կրկնակի հարկում է»,- նշվում է բաց նամակում: «Մենք լուրջ մտավախություն ունենք, որ կառավարությունը փորձում է «սահուն կերպով» ավելացնել քաղաքացիների ֆինանսական բեռը, առայժմ բավարարվելով 1974թ.–ից հետո ծնված անձանցով»: