Փաստ ինֆո

 

Արմավիրի մարզի ընդհանուր իրավասության առաջին ատյանի դատարանը՝ դատավոր Վահե Խալաթյանի նախագահությամբ, 2013 թվականի օգոստոսի 22-ի դատավճռով Արագածոտնի մարզի Արագածավան գյուղի բնակիչ Գուրգեն Գասպարյանին մեղավոր է ճանաչել ՀՀ քրեական օրենսգրքի 175-րդ  հոդվածի 3-րդ մասի 3-րդ կետով՝  ավազակությունը՝ առողջությանը  ծանր վնաս պատճառելով: Ամբաստանյալը դատապարտվել է  ազատազրկման 10 տարի ժամկետով՝ առանց գույքի բռնագրավման։ Դատավճռով ամբաստանյալ Գուրգեն Գասպարյանից հօգուտ քրեական գործով տուժողներ Մոսկով  Ռավոյանի և Փորսոր  Նավոյանի պետք է բռնագանձվի  400 եվրոյին   համարժեք  ՀՀ դրամ որպես հանցագործությամբ պատճառված նյութական վնասի հատուցում։ 

 

Գուրգեն Գասպարյանն Արագածավան գյուղում ձեռնարկատիրական գործունեություն իրականացնելիս իր «Տաքսի» ծառայությունում շահագործել է ավտովարկավորմամբ ձեռք բերած երկու հատ «ՎԱԶ 2107» մակնիշի ավտոմեքենա, մեկ հատ «ՎԱԶ 2106», մեկ հատ «ԳԱԶ 3110» և մեկ հատ «Ռենո» մակնիշի ավտոմեքենաներ։ Բացի այդ  «ԱԿԲԱ-ԿՐԵԴԻՏ-ԱԳՐԻԿՈԼ ԲԱՆԿ»  ՓԲ ընկերությունից 85.000 ԱՄՆ դոլար վարկ է վերցրել։ Վարկը Գ.Գասպարյանը վերցրել է ԱՄՆ դոլարով, երբ 1 դոլարի փոխարժեքը ՀՀ դրամի նկատմամբ կազմել է մոտ 300 ՀՀ դրամ։ 2009 թվականի տարեսկզբին համաշխարհային ճգնաժամի հետևանքով  1 դոլարի փոխարժեքը բարձրացել է մինչև 450 ՀՀ դրամ, որի հետևանքով վարկը մարելու համար ավելի շատ գումար է ծախսվել, և  Գ.Գասպարյանը հայտնվել է ֆինանսական խնդիրների առջև։

 

Դատարանը հիմնավորված է համարել մեղադրանքն, ըստ որի 2009 թվականի նոյեմբերի 2-ին, իր ընկեր Մանուկ Մանուկյանի առաջարկով, Գուրգեն Գասպարյանն ավազակային հարձակում կատարելու և ուրիշի գույքը հափշտակելու նպատակով, նախնական համաձայնության է եկել  համագյուղացի Արսեն Գրիգորյանի,  Թալին քաղաքի բնակիչ Ռոմեն Բարսեղյանի և  իր քենակալ Անուշավան Սահակյանի հետ։ Նոյեմբերի լույս 3-ի գիշերը գնացել են Էջմիածին քաղաքի «Զվարթնոց» թաղամասի մի տան մոտ։։ Ռոմեն Բարսեղյանը մնացել է ավտոմեքենայի մեջ, իսկ Գուրգեն Գասպարյանը, Մանուկ Մանուկյանը, Արսեն Գրիգորյանը և Անուշավան Սահակյանը, դուրս գալով մեքենայից` դանակով և Գուրգեն Գասպարյանի 9 մմ տրամաչափի «ATMAGA-2004-LIGHT»  տեսակի  գազային  ատրճանակով զինված, Մանուկ Մանուկյանի կողմից նախապես բերած դիմակներով դիմակավորված  տան պարսպի վրայով անցել են բակ, ոտքով հարվածել, բացել տան մուտքի դուռը, և ապօրինի մուտք են գործել բնակարան։

 

Նրանք տանը քնած ամուսիններ Փորսոր Նավոյանի և Մոսկով Ռավոյանի ձեռքերն ու ոտքերը կապել են կպչուն ժապավենով, վերջիններիս կյանքի և առողջության համար վտանգավոր բռնություն գործադրելով, հարվածներ են հասցրել նրանց մարմնի տարբեր մասերին, որի հետևանքով Մոսկով Ռավոյանի առողջությանը պատճառել են ծանր վնաս, պահանջել են տանը եղած ողջ գումարն ու ոսկյա զարդերը, հակառակ դեպքում սպառնացել են սպանել նրանց ու այրել տունը։ Տանը գտնելով միայն խոշոր չափերի` 908.000 ՀՀ դրամին համարժեք 1.600 եվրո, 10.000 ՀՀ դրամ գումար, 1 հատ 25.000 ՀՀ դրամ արժողության «Սամսունգ»  տեսակի բջջային հեռախոս` հափշտակել են դրանք ու դիմել փախուստի։ 

 

Գուրգեն Գասպարյանն, ինչպես նշվում է դատավճռում, ավազակային հարձակում կատարելուց հետո` 2009 թվականի դեկտեմբերի կեսին դիմել է փախուստի` մեկնելով ՌԴ Կուրսկ քաղաք։ 2010 թ.  հոկտեմբերի 13-ին որոշում է կայացվել Գուրգեն Գասպարյանին Հայաստանի Հանրապետության քրեական օրենսգրքի 175-րդ  հոդվածի 3-րդ մասի 3-րդ կետով որպես մեղադրյալ ներգրավելու մասին, նրա նկատմամբ որպես խափանման միջոց է ընտրվել կալանավորումը  և հայտարարվել  հետախուզում, Գուրգեն Գասպարյանը ՌԴ իրավապահ մարմինների կողմից  հայտնաբերվել է,  ձերբակալվել ու տեղափոխվել  Հայաստան: 

 

Առաջադրված մեղադրանքում, քրեական գործի նախաքննությամբ, Գուրգեն  Գասպարյանն իրեն մեղավոր չի ճանաչել: Ըստ նրա ցուցմունքի, 2009 թվականի նոյեմբերի լույս 3-ի գիշերը գտնվել է տանը, Էջմիածին քաղաքում տեղի ունեցած ավազակային հարձակմանը չի մասնակցել, այլ պարզապես այդ գիշեր իր «Ռենո» մակնիշի ավտոմեքենան տրամադրել է Անուշավան Սահակյանին և Արսեն Գրիգորյանին, ովքեր իրեն ասել են, որ միասին տեղ են գնում։  

 

Ամբաստանյալ Գուրգեն Գասպարյանը քրեական գործի դատական քննությամբ նույնպես  իրեն մեղավոր չի ճանաչել և դատարանին հայտնել է, որ «նախաքննության ընթացքում ճիշտ քննություն չի կատարվել»։ Իրականում ինքն ավազակային հարձակում չի կատարել, իր դեմ մեղադրանք է սարքվել` հնարավոր է բռնությամբ և սպառնալիքներով, ինքն այդպես է մտածում....»։ 

 

Տուժող Մոսկով  Ռավոյանի ցուցմունքի համաձայն, փայտյա դուռը կոտրելու միջոցով իրենց տուն են ներս մտել չորս անձինք, որոնք եղել են դիմակավորված ու ձեռնոցներով, իրենց ձեռքերում ունեցել են լապտերներ, նրանցից մեկի ձեռքին եղել է դանակ, իսկ մյուսի ձեռքին` ատրճանակ։ Նշված անձինք թույլ չեն տվել, որ ինքը միացնի սենյակի լույսը, և իրեն լապտերների լույսի տակ ծեծի են ենթարկել, իրեն ու մահճակալին պառկած Փորսոր Նավոյանին, կպչուն ժապավենով կապել են իրենց ձեռքերն ու ոտքերը։

 

Միաժամանակ այդ ընթացքում իրենից պահանջել են տանը եղած գումարն ու ոսկյա զարդերը, հակառակ դեպքում սպառնացել են սպանել իրեն և այրել տունը։ Հանցագործներից մեկն էլ ծեծի ենթարկելու ընթացքում ատրճանակը դրել է իր քթի վրա` սպառնալով սպանել։ Ինքը նրանց պահանջով մատնացույց է արել իր անկողնու ներքնակի տակ եղած 1.600 եվրո և կոստյումի գրպանում եղած 10.000 ՀՀ դրամ գումարը, որը նրանք վերցրել ու շարունակել են տան բոլոր սենյակներում գումար և ոսկյա զարդեր փնտրել։  Այդ ողջ ընթացքում իրենց տուն ներխուժած չորս տղամարդիկ տակնուվրա են արել իրենց տան բոլոր սենյակներում գտնվող իրերը և փորձել են ոսկյա զարդեր ու գումար գտնել, ոչինչ չգտնելով` հափշտակել են նշված 1.600 եվրո, 10.000 ՀՀ դրամ գումարը և իրեն պատկանող «Սամսունգ»  տեսակի բջջային հեռախոսը, ու իրենց թողնելով կապված վիճակում` դիմել են փախուստի։ 

 

Տուժող Փորսոր Նավոյանն ևս տվել է նույնաբովանդակ ցուցմունքներ: Տուժողը նշել է, որ Գ.Գասպարյանին չի ճանաչում, քանի որ նրանք դիմակավորված են եղել։ «Ով որ արել է` թող բերդում փտի` եթե իրենք են։ Նրանք սպառնացել են իրեն և ամուսնուն, հայհոյել են։ Այդ ընթացքում հեռախոսազանգ է եկել մեկին, նա անջատել է, երկրորդ զանգից հետո հայհոյել է։ Դրանով բռնվեցին։ Այդ ընթացքում ամուսինը գիտակցությունը կորցրել է` այնքան են ծեծել։ Դանակի ծայրով իր աչքին են կպել. «Կհանենք, փողերի տեղն ասա...»,- ասում էին։ 

 

Նշենք, որ գործով ևս երեք մեղադրյալներ նույնպես դատապարտվել են տևական ժամկետով ազատազրկման: 2009 թվականի նոյեմբերի 13-ին Մանուկ Մանուկյանը ձերբակալվել է, ապա նաև կալանավորվել, նրան մեղադրանք է առաջադրվել Հայաստանի Հանրապետության քրեական օրենսգրքի 175-րդ  հոդվածի 3-րդ մասի 3-րդ կետով, Արմավիրի մարզի ընդհանուր իրավասության առաջին ատյանի դատարանի 2010 թվականի նոյեմբերի 18-ի դատավճռով Մանուկ Մանուկյանը մեղավոր է ճանաչվել հիշյալ հոդվածով  և դատապարտվել  ազատազրկման 12 տարի ժամկետով։ 

 

2010 թվականի հուլիսի 15-ին ձերբակալվել են  նաև Ռոմեն Բարսեղյանը և Արսեն Գրիգորյանը։ Ռոմեն Բարսեղյանին մեղադրանք է առաջադրվել Հայաստանի Հանրապետության քրեական օրենսգրքի 175-րդ  հոդվածի 2-րդ մասի 1-ին կետով՝ մի խումբ անձանց կողմից նախնական համաձայնությամբ ավազակություն  և 268-րդ  հոդվածի 1-ին մասով՝ առանց իրացնելու նպատակի թմրամիջոցների կամ հոգեներգործուն նյութերի ապօրինի շրջանառություն, իսկ Արսեն Գրիգորյանին`   Հայաստանի Հանրապետության Քրեական օրենսգրքի 175-րդ  հոդվածի 3-րդ մասի 3-րդ կետով, նրանք կալանավորվել են։ Դատարանը  Ռոմեն Բարսեղյանին  դատապարտել է  6 տարի 6 ամիս ժամկետով, իսկ Արսեն Գրիգորյանին` 10 տարի ժամկետով ազատազրկման։