Փաստ ինֆո

Թմրամիջոցների ապօրինի շրջանառության գործով ամբաստանյալ Արայիկ Շահումյանը դատապարտվել է 9 տարվա ազատազրկման՝ առանց գույքի բռնագրավման, իսկ Արտեմ Գուլոյանը՝ 2 տարվա ազատազրկման:

 

Կոտայքի մարզի ընդհանուր իրավասության դատարանը՝ դատավոր Մ.Մակյանի նախագահությամբ, հուլիսի 15-ի դատավճռով Ա.Շահումյանին մեղավոր է ճանաչել ՀՀ Քրեական օրենսգրքի 266-րդ հոդվածի 3-րդ մասի 2-րդ կետով և 215-րդ հոդվածի 2-րդ մասով՝ իրացնելու նպատակով առանձնապես խոշոր չափերի թմրամիջոցների ապօրինի շրջանառություն և մաքսանենգություն, իսկ ամբաստանյալ Արտեմ Գուլոյանին՝ ՀՀ Քրեական օրենսգրքի 268-րդ հոդվածի 3-րդ մասով՝ առանց իրացնելու նպատակի թմրամիջոցների կամ հոգեներգործուն նյութերի ապօրինի շրջանառություն:

 

Դատարանն արձանագրել է՝ պատժի կրման ընթացքում Արայիկ Շահումյանը կարիք ունի հարկադիր բուժման` «Ափիոնային թմրամոլության»  դեմ, որի համար հակացուցումներ չկան:

 

Գործով իրեղեն ապացույց հանդիսացող ընդհանուր` 260.093 գրամ մաքուր քաշով 610 հատ դեղահաբերը և սպիտակ գույնի տարբեր մանրացվածության աստիճանի զանգվածը, ինչպես նաև ընդհանուր` 273.606 գրամ մաքուր քաշով 694 հատ միասնական, ամբողջական դեղահաբերը և 8 հատ ոչ ամբողջական դեղահաբերը դատավճռով  թողնվել են  ՀՀ ԱԱԾ քննչական վարչության կողմից անջատված քրեական գործում`   իրավասու մարմնի կողմից հետագայում օրենքով սահմանված կարգով տնօրինելու համար:

 

Դատավճռով` հօգուտ պետական բյուջեի` Արայիկ Շահումյանից պետք է բռնագանձվի  74.196  ՀՀ դրամ, իսկ Արտեմ Գուլոյանից՝ 37.098  ՀՀ դրամ` որպես դատական ծախսեր:

 

Առաջադրված մեղադրանքում դատաքննության ընթացքում  ամբաստանյալ Արտեմ Գուլոյանն իրեն մեղավոր է ճանաչել լիովին, իսկ ամբաստանյալ Արայիկ  Շահումյանն իրեն մեղավոր է ճանաչել մասնակի՝  ընդունել ՀՀ քրեական օրենսգրքի 215-րդ հոդվածով առաջադրված մեղադրանքը, իսկ 266-րդ հոդվածով առաջադրված մեղադրանքում իրեն մեղավոր չի ճանաչել. տեղափոխված թմրամիջոցներն ինքն իրացնելու կամ որևէ անձի հյուրասիրելու նպատակ չի ունեցել, այդ դեղահաբերը նախատեսված են եղել իր օգտագործման համար:

 

Ըստ նրա ցուցմունքի`տարիներ ի վեր օգտագործում է թմրամիջոցներ,  չկարողանալով լուծել իր` Ֆրանսիայում մշտապես բնակվելու թույլտվություն ստանալու հարցերը և տեղեկաանալով, որ տեղի իշխանություններն իրեն ցանկանում են արտաքսել` խորթ հորը՝ Համլետ Հովհաննիսյանին, խնդրել է, որպեսզի իր հավաքած դեղահաբերն ինչ-որ կերպ ուղարկի ՌԴ, որտեղից էլ ինքը կվերցնի այն: Դրանից հետո Համլետ Հովհաննիսյանն իր խնդրանքով այդ դեղահաբերն ուղարկել է ՌԴ` Տանյա անունով մի աղջկա, ումից էլ ինքը հետագայում վերցրել է դրանք: Նշել է, որ այդ դեղահաբերն իր հետ անցկացրել է ՌԴ-ից Վրաստանի, Վրաստանից էլ Հայաստանի սահմաններով, և դեղահաբերը եղել են նախատեսված իր անձնական օգտագործման համար, դրանք իրացնելու մտադրություն կամ նպատակ երբևէ չի ունեցել:

 

Ի պատասխան դատարանում իրեն տրված հարցերին` ամբաստանյալը նշել է, որ գիտի, որ նշված դեղահաբերը եղել են «սուբոտեքս, Բ8»   տեսակի, որոնցից ինքը սովորաբար օգտագործել է օրական երեք հատ, 7 հատ դեղահաբի համար հիմնականում վճարել է մոտավորապես 15-25 եվրո:

 

Ըստ ամբաստանյալի  նախաքննական ցուցմունքների` իր խորթ հայր Համլետ Հովհաննիսյանն իրեն  ասել է, որ նշված հաբերը պետք է տանի Հայաստան, որտեղ էլ կասի, թե ում պետք է տա: Ըստ պայմանավորվածության` հաբերը Հայաստան հասցնելուց հետո, ինքը պետք է տեղեկացներ Համլետին, որ ամեն ինչ կարգին է: Հետագայում արդեն Համլետն ասել է, որ դրանք փոխանցի իր աներոջը՝ Խաչիկին, սակայն Խաչիկը թմրամիջոցների գոյության մասին ոչինչ չի իմացել:  Դոնի Ռոստով-Երևան ավտոբուսով ժամանել է Հայաստան՝ հասնելով Աշտարակ-Երևան մայրուղու` դեպի Եղվարդ քաղաք տանող խաչմերուկի մոտ, երբ ավտոբուսը կանգնել է, իրեն են մոտեցել ՀՀ Ազգային անվտանգության ծառայության աշխատակիցները, իջեցրել են իրեն նշված ավտոբուսից և ուղեկցել ՀՀ ԱԱԾ Աբովյանի բաժանմունք, որտեղ էլ իր մոտից հայտնաբերվել է վերը նշված թմրամիջոցը: Նախաքննության ընթացքում ամբաստանյալը նշել էր, որ Համլետի կողմից ուղարկված թմրամիջոցը Հայաստան բերելու համար նրանից գումար չի ստացել, սակայն դրանցից մի քանի դեղահաբն ինքը պետք է օգտագործեր անձամբ:

 

Դատարանը  գտել  է, որ ամբաստանյալ Արայիկ  Շահումյանի` դատարանում տված անարժանահավատ, իրար հակասող ցուցմունքները,  երբեմն էլ առաջադրված հարցերին պատասխանելուց խուսափելու միտումը հետապնդում են լոկ պատասխանատվությունից ու ակնկալվող խիստ պատիժներից խուսափելու նպատակ, քանի որ «Արայիկ Շահումյանի կողմից հանցավոր ճանապարհով, իրացման նպատակով թմրանյութեր ձեռք բերելու, պահելու և ՀՀ մաքսային սահմանով տեղափոխելու հանգամանքները հաստատվել են ինչպես նրանց նախաքննական ցուցմունքներով, այնպես էլ` դատաքննության ընթացքում իրավական պատշաճ ընթացակարգի սահմաններում հետազոտված ապացույցներով»: