Փաստ ինֆո

Նախագահի թեկնածու, «Ազատություն» կուսակցության նախագահ Հրանտ Բագրատյանի կենտրոնական շտաբի տեղեկացմամբ` ահազանգ է ստացվել Աջափնյակում գտնվող թիվ 07/27 ընտրատեղամասում թաղապետի նախկին տեղակալ Արմեն Բաղդասարյանի և թիվ 07/28 տեղամասում ոմն Կարապետի կողմից բաց քվեարկության անցկացման վերաբերյալ:

Գյումրիի թիվ 35/39 ընտրական տեղամասի հանձնաժողովի նախագահը, «Մեդիա կենտրոնի» փոխանցմամբ, ԶԼՄ ներկայացուցիչներին և դիտորդներին արգելում է մոտիկից դիտել ու հսկել քվեարթերթիկ հատկացնելու գործընթացը, տեսնել մատյանում գրանցման գործընթացը, մասնավորապես` այն, թե ընտրողն արդյոք իր անվան դիմա՞ց է ստորագրում քվեաթերթիկ ստանալիս: Նույն աղբյուրի հաղորդմամբ` հանձնաժողովի նախագահը պարտադրում է դիտորդներին ու վստահված անձանց նստել հատկացված տեղերում և չտեղաշարժվել տեղամասում: «Գյումրի-Ասպարեզ» օրաթերթը և «asparez.am» հայտարարում են, որ այսպիսով խոչընդոտվել է իրենց` ԶԼՄ ներկայացուցչի աշխատանքը նշված տեղամասում:

Գյումրու 41-րդ դպրոցում տեղավորված 34/06 տեղամասում «Գյումրի-Ասպարեզ» օրաթերթի ներկայացուցիչը ժամը 10:09-ի դրությամբ նկատել է, որ դիտորդական առաքելություններից մեկի երկու ներկայացուցիչ, ընտրողների մատյանները վարողների գլխավերևում կանգնած, քվեաթերթիկ ստացող ընտրողների ցուցակային համարները sms-ով ուղարկում են ինչ-որ համարի:

Գյումրու 41-րդ դպրոցում տեղավորված թիվ 34/06 ընտրատեղամասում «Գյումրի-Ասպարեզ» օրաթերթի ներկայացուցիչը ժամը 10:18-ի դրությամբ նկատել է, որ ընտրողներից մեկին փորձել են գրանցել և քվեաթերթիկ տալ բոլորովին ոչ իր անուն-ազգանվան դիմաց: Ահազանգել է հանձնաժողովի նախագահին, առաջարկելով արձանագրել միջադեպը, մինչդեռ հանձնաժողովի նախագահը սկսել է բողոքել, թե «…դու չէ, որ ինձ պիտի ասես, թե ինչ անեմ», և չի արձանագրել միջադեպը:

Iditord.org կայքի տեղեկացմամբ՝ ըստ Գավառից ստացված ահազանգի, երեկ Գավառի քաղաքապետարանը 5000-ական դրամ ընտրակաշառք է բաժանել՝ նախագահի թեկնածու Սերժ Սարգսյանին ձայն տալու համար: