Փաստ ինֆո

«Մոր և մանկան առողջության պահպանման գիտահետազոտական կենտրոն»-ի գլխավոր բժիշկ Գեորգի Օկոևը առանց հիվանդին և նրա ամուսնուն տեղյակ պահելու, առանց նրանց գիտության և համաձայնության, ընդ որում, նաև առանց անհրաժեշտության (չի եղել կյանքի ցուցում), հեռացրել է ձվարաններն ամբողջությամբ, փողերը, արգանդը: Ավելին. թույլ տալով բժշկական սխալ, անփութորեն կարել-փակել է միզածորանը: Այս մասին «Հենարան» մամուլի ակումբում այսօր լրագրողների հետ հանդիպման ժամանակ հայտարարեց վիրահատված կնոջ՝ Նունե Մաղաքյանի ամուսինը՝ Կարո Կարապետյանը։

Բանախոսի ներկայացմամբ՝ հեռացնելով կնոջ արգանդը՝ նրան զրկել են մայրանալու իրավունքից, հեռացնելով ձվարաններն ամբողջությամբ՝ ցմահ զրկել են սեռական կյանքով ապրելու իրավունքից:

«Ես ունեմ Գերմանիայի փորձաքննության պատասխանը, որտեղ գերմանացին (մի քանի կլինիկաների ղեկավար Տոբաս Եգերը.- Ա.Հ.) ասում է, որ, այնուամենայնիվ, դա կյանքի ցուցումով չէր, այսինքն` ինքը կարող էր և չհեռացնել,- ասաց Կ.Կարապետյանը:- Եթե չհեռացներ, նրան մահ չէր սպասվում, կարող է 6 ամիս, 1 տարի հետո ավելի դժվար, բարդ վիրահատություն լիներ, բայց պարտավոր էր տեղեկացնել», - ասաց Կ.Կարապետյանը:

Ըստ վերջինիս, Գեորգի Օկոևը պատճառաբանում է, թե արգանդը և մյուս օրգանները հեռացրել է օրենսդրության սահմաններում, քանի որ էնդոմենտոզ կիստաներ են եղել, մինչդեռ նույնիսկ ինտերնետից կարելի է իմանալ, որ էնդոմենտոզ կիստաների բուժման մեթոդներ գոյություն ունեն, հետևաբար բժիշկն ինչո՞ւ է առանց իրենց գիտության, հեռացրել նշված օրգանները:

Երբ միզածորանի կարված լինելու հետևանքով մեզը մի քանի օր կուտակվել է աջ երիկամում, դրա չափերը շատ մեծացել են, առաջացել են սուր ցավեր, պարոն Կարապետյանի տեղեկացմամբ, Օկոևն իր իսկ նախաձեռնությամբ Նունե Մաղաքյանին տեղափոխել է «Արմենիա» հանրապետական բժշկական կենտրոն: Այստեղ փորձել են կնոջ կողքից ծակել, արհեստական խողովակ տեղադրել, որպեսզի մեզը դուրս գա, ազոտը չանցնի արյան մեջ և չմահանա: Չորս օր փորձել են, բայց չեն կարողացել, բժշկական համապատասխան փաստաթղթում էլ գրել են, որ իրենց բազմաթիվ փորձերն անցել են ապարդյուն: Դրանից հետո Կ. Կարապետյանը կնոջն անմիջապես տեղափոխել է «Նաիրի» բժշկական կենտրոն, որտեղ վայրկյանների ընթացքում նկարել, պարզել և իրենց ցույց են տվել, որ միզածորանը կարված է, ինչն իրենք և մյուս բժիշկները մինչ այդ չեն իմացել:

Ըստ նրա, եթե միզածորանի կարված լինելու հանգամանքը մինչև 18 կամ առավելագույնը 24 ժամվա ընթացքում հայտնաբերվեր, այն դեռ չորացած չէր լինի ու հնարավոր կլիներ ուղղել բժշկական սխալը: Ավելին. թեև նման վիրահատությունների դեպքում միզածորանը սխալմամբ կարելը բժշկական պրակտիկայում 100 տոկոսով բացառված չէ, դեպքերի չնչին քանակություն լինում է, սակայն դա թաղանթի տակից կարելի էր հայտնաբերել թափահարմամբ, պերիստալիտիկ դիտարկման միջոցով:

Ի վերջո, միզածորանի կարված լինելու հետևանքով Ն. Մաղաքյանն երկու ընտրություն է ունեցել` կամ աջ երիկամում գոյացող մեզը հեռացնելու համար ամբողջ կյանքում կողքից դուրս եկող արհեստական խողովակ («կատետր») ունենալ և դրան միացված ու կողքին ամրացված պարկ կրել, կամ համաձայնել երիկամի հեռացմանը: Քանի որ Ն. Մաղաքյանը  աշխատել է «Յունիբանկի» Աշտարակի մասնաճյուղում, որտեղ առաջին տարբերակի ընտրության դեպքում չէին հանդուրժի այդ վիճակում հաճախորդների հետ շփվելը, ամուսնու ներկայացմամբ, ճարահատյալ գնացել են 2-րդ տարբերակի ընտրությանը` երիկամի հեռացմանը:

Վերոնշյալի հետևանքով Նունե Մաղաքյանը սկզբում 2-րդ, ապա նաև 3-րդ խմբի հաշմանդամ է դարձել, կորցրել է նաև աշխատանքը, քանի որ նրան աշխատանքից հեռացրել են բացակայության համար ՀՀ աշխատանքային օրենսգրքով սահմանված թույլատրելի օրերի առավելագույն քանակից ավելի բացակայելու համար:

Բժշկական սխալի համար 2010 թ. հունիսին ՀՀ ոստիկանության Կենտրոնի քննչական բաժնում քրեական գործ է հարուցվել Քրեական օրենսգրքի 130-րդ հոդվածի 1-ին մասի հատկանիշներով: Սակայն նշված բաժինը կամ այդ բաժնի այն քննիչը, ում վարույթում է քրեական գործը, հաշվի չի առել գերմանացի փորձագետի եզրակացությունը` պատճառաբանելով, որ Հայաստանը Գերմանիայի հետ իրավական փոխօգնության պայմանագիր չունի: Իսկ Հայաստանում երեք անգամ նշանակվել է դատաբժշկական փորձաքննություն և բոլորն էլ, ըստ բանախոսի, եզրակացրել են, թե բժիշկները ճիշտ են վարվել։ Նրա փոխանցմամբ, փորձաքննությունները կատարվել են Փորձաքննությունների ազգային բյուրոյում և ՀՀ ԱՆ «Դատական բժշկության գիտագործնական կենտրոն» ՓԲԸ-ում:

Կ. Կարապետյանը շնորհակալություն հայտնեց ՀՀ գլխավոր դատախազ Աղվան Հովսեփյանին, որն ընդառաջելով իր խնդրանքին, համապատասխան նյութերը փորձաքննության նպատակով ուղարկել է ՌԴ գլխավոր դատախազություն, որի հետ իրավական փոխօգնության պայմանագիր կա: Այժմ քրեական գործը ՀՀ քր. դատ. օր.-ի 31-րդ հոդվածի 1-ին մասի 1-ի կետի հիման վրա կասեցված է:

Փարատելու համար իրենց կասկածները, որ այդ ամենն արվում է երիկամը մեկ այլ անձի վաճառելու նպատակով, Ն. Մաղաքյանը և Կ. Կարապետյանը համապատասխան փաստաթղթում նշելով, որ իրենք երիկամի հեռացմանը համաձայնում են, քանի որ այլընտրանք չունեն, նշել են. «…ուստի խնդրում ենք ձախ երիկամը հեռացնել և վերադարձնել մեզ»: Փաստաթղթի տակ բուժող բժիշկ Ժ. Մեսրոպյանի և բաժնի վարիչ Ս. Զաքարյանի անուն ազգանուններն են և վերջինիս կողմից դրված կնիքը, ինչը նշանակում է, որ նրանք տեղեկացված են եղել երիկամը վերադարձնելու պահանջին ու չեն առարկել: Սակայն վիրահատությունից հետո հրաժարվել են վերադարձնել` պատճառաբանելով, թե երիկամը փորձաքննության թե հետազոտության են ուղարկել, իսկ իրենց այդ քայլը օրենսդրության որևէ կետով կամ դրույթով չեն հիմնավորել: Հենց սա էլ տեղիք է տվել Կ. Կարապետյանի կասկածներին, որ երիկամը վաճառել են ինչ-որ մեկին:

Հեղինակ` Արթուր Հովհաննիսյան