Փաստ ինֆո

«Հայինկասացիա» ՓԲԸ-ից առանձնապես խոշոր չափերի հափշտակության գործով ամբաստանյալ Սաթենիկ Սարգսյանի նոր ներգրավված պաշտպան Արման Թամրազյանը կծանոթանա Երևանի Արաբկիր և Քանաքեռ-Զեյթուն վարչական շրջանների դատարանի դատավճռի հետ միասին 11 հատոր կազմող գործի նյութերին: ՀՀ վերաքննիչ քրեական դատարանը՝ դատավոր Եվա Դարբինյանի նախագահությամբ, այսօր այդ պատճառով հետաձգեց գործով ամբաստանյալների վերաքննիչ բողոքների քննությունը մինչև հունվարի 24-ը: Գործում որպես ամբաստանյալներ Անահիտ, Արմինե, Արմեն Գրիգորյանների և Սարգիս Դանիելյանի պաշտպան ներգրավվեց նաև փաստաբան Վարդուհի Էլբակյանը:

Ըստ մեղադրանքի, «Հայինկասացիա» ՓԲԸ գլխավոր հաշվապահ Անահիտ Գրիգորյանն իր նախկին հարևան Ժորա Պապիկյանի անվամբ կազմավորել է «Արուսյակ» կոոպերատիվը՝ վերջինս ձևակերպվել է որպես կոոպերատիվի գլխավոր հաշվապահ և նախագահ, կոոպերտիվի կնիքը պահվել է Անահիտ Գրիգորյանի մոտ: 2003-2009թթ. ընթացքում «Արուսյակ» կոոպերատիվը որևէ գործունեություն չի ծավալել, Անահիտ Գրիգորյանը կազմել և Ժորա Պապիկյանի միջոցով հարկային մարմիններին մշտապես ներկայացրել է զրոյական հաշվետվություններ:

Օգտվելով իր ղեկավարության կողմից իր նկատմամբ վստահությունից՝ Անահիտ Գրիգորյանը «Հայինկասացիա» ՓԲԸ-ի առանձնապես խոշոր չափերի գումարներ հափշտակելու դիտավորությամբ, 2003-2009թթ. ընթացքում պարբերաբար կազմել է 348 հատ վճարման կեղծ հանձնարարագիր, որոնց  հիման վրա «Հայինկասացիա»-ի հաշվարկային հաշվից, որպես կատարված աշխատանքների դիմաց վճարումներ, «Արուսյակ» կոոպերատիվի հաշվարկային հաշվին փոխանցել է 947 704 500 դրամ ընդհանուր գումար: Ընդ որում, վճարման հանձնարարագրերից 24-ը մի շարք այլ փաստաթղթերի հետ ներկայացրել է «Հայինկասացիա» ՓԲԸ գործադիր տնօրեն Վիկտոր Գրիշյանի, իսկ 23-ը՝ նրա տեղակալ Ռուբեն Սիմոնյանի հաստատմանը, ովքեր առանց ուսումնասիրելու ստորագրել են ներկայացված փաստաթղթերը: Մնացած վճարման հանձնարարագրերում, ըստ մեղադրանքի, Անահիտ Գրիգորյանը կեղծել է հիշյալ անձանց ստորագրությունները, իսկ 2008թ. օգոստոս-սեպտեմբեր ամիսներին Ա.Գրիգորյանի հանձնարարությամբ ևս 8 հանձնարարագրերում տնօրենի ստորագրությունները կեղծել է «Հայինկասացիա» ՓԲԸ-ի գլխավոր հաշվապահի տեղակալ Սաթենիկ Սարգսյանը:

«Արուսյակ» կոոպերատիվի հաշվարկային հաշվին փոխանցված գումարները կանխիկացնելու և յուրացնելու նպատակով Ա. Գրիգորյանը 2003-2009թթ. ընթացքում, կեղծելով նաև կոոպերատիվի նախագահ Ժորա Պապիկյանի ստորագրությունը, կազմել է կոոպերատիվի 247 հատ դրամարկղային կտրոն, որոնք հանձնել է «Հայինկասացիա» ՓԲԸ գլխավոր հաշվապահի տեղակալ Սաթենիկ Սարգսյանին, հաշվապահ գանձապահ Աղավնիկ Խաչատրյանին, անձնակազմի կառավարման և անվտանգության կազմակերպման բաժնի ավագ տեսուչ, իր եղբոր դուստր Արմինե Գրիգորյանին, եղբորորդի Արմեն Գրիգորյանին և ամուսնուն՝ Սարգիս Դանիելյանին ու գործընկերուհի Լիլիկ Հակոբյանին, նրանց միջոցով կանխիկացրել և հափշտակել է ընդհանուր առմամբ 930 230 500 դրամ գումար: Ընդ որում, Անահիտ Գրիգորյանի հափշտակությանը օժանդակած Սաթենիկ Սարգսյանը առաջինին հանձնել է իր անվամբ կազմված 44 կտրոններով բանկից ստացված 257 613 000 դրամը /որից 25 550 000 դրամը՝ իր իսկ կեղծած 8 հանձնարարագրերի հիման վրա/, Աղավնիկ Խաչատրյանը՝ 123 կտրոններով ստացված 328 378 000 դրամը, Արմինե Գրիգորյանը՝ 72 կտրոններով ստացված 277 551 000 դրամը, Արմեն Գրիգորյանը՝ 9 կտրոններով ստացված 40 021 000 դրամը, իսկ Սարգիս Դանիելյանը՝ 3 կտրոններով ստացված 5 704 000 դրամը: Անահիտ Գրիգորյանի խնդրանքով 6 կտրոնների հիման վրա բանկից 9 980 000 դրամ գումար է ստացել և Անահիտ Գրիգորյանին է փոխանցել նաև Լիլիկ Հակոբյանը, ով իրազեկված չի եղել գումարի հափշտակության մասին:

Ըստ մեղադրանքի, յուրացման փաստը քողարկելու նպատակով Անահիտ Գրիգորյանը գումարների ստացման մասին բանկային փաստաթղթերն ու վճարման հանձնարարագրերը պատշաճ հաշվապահական ձևակերպում չի տվել ու թաքցրել է:

Բացի այդ, 2008-2009թթ. հաշվապահ-գանձապահ Աղավնիկ Խաչատրյանը տարբեր գործարքների դիմաց դրամարկղային մուտքի օրդերներով կանխիկ գանձելով 7 349 100 դրամ, Անահիտ Գրիգորյանի պահանջով գումարը փաստացի չի մուտքագրել դրամարկղ ու հանձնել է Անահիտ Գրիգորյանին, այսինքն՝ օժանդակել է վերջինիս կողմից գումարի յուրացմանը:

2003-2009թթ. առանձանպես խոշոր չափի՝ 937 579 600 դրամ ընդհանուր գումարի հափշտակությունը թաքցնելու նպատակով Անահիտ Գրիգորյանը կատարել է այլ կեղծիքներ ևս՝ փոխանցված գումարները հաշվապահորեն ձևակերպել է որպես «ԱԱՀ կանխավճարներ», այնուհետև տարբեր հաշիվների հետ բազմաթիվ թղթակցությունների և հաշվապահական ձևակերպումների միջոցով ծախսագրել է, որի արդյունքում հափշտակության փաստերը տևական ժամանակ չեն բացահայտվել:

Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը՝ դատավոր Լ. Ավետիսյանի նախագահությամբ, 25-10-2012թ. դատավճռով Անահիտ Գրիգորյանին դատապարտել էր ինը տարվա ազատազրկման՝ ամբողջ գույքի բռնագրավմամբ, Սաթենիկ Սարգսյանին՝ յոթ տարվա ազատազրկման՝ գույքի 1/2-րդ մասի բռնագրավմամբ, Աղավնիկ Խաչատրյանին և Արմինե Գրիգորյանին՝ չորս տարվա ազատազրկման՝ գույքի 1/2-րդ մասի բռնագրավմամբ: Արմեն Գրիգորյանը և Սարգիս Դանիելյանը նույնպես դատապարտվել են չորս տարվա ազատազրկման՝ առաջինը գույքի 1/3-րդ մասի, իսկ երկրորդը՝ գույքի 1/4-րդ մասի բռնագրավմամբ։

Դատավճռով Անահիտ Գրիգորյանից հօգուտ տուժող «Հայինկասացիա» ՓԲԸ-ի որպես հանցագործությամբ անմիջականորեն պատճառված վնաս պետք է բռնագանձվի քսան միլիոն ինը հարյուր վաթսուներեք հազար հինգ հարյուր (20.963.500) ՀՀ դրամ, Սաթենիկ Սարգսյանից և Անահիտ Գրիգորյանից  համապարտությամբ՝ երկու հարյուր հիսունյոթ միլիոն վեց հարյուր տասներեք հազար (257.613.000) ՀՀ դրամ, Աղավնիկ Խաչատրյանից և Անահիտ Չեչերիկի Գրիգորյանից համապարտությամբ՝ երեք հարյուր երեսունյոթ միլիոն յոթ հարյուր քսանյոթ հազար հարյուր (335.727.100) ՀՀ դրամ, Արմեն Գրիգորյանից և Անահիտ Գրիգորյանից համապարտությամբ՝ քառասուն միլիոն քսանմեկ հազար (40.021.000) ՀՀ դրամ, Արմինե Գրիգորյանից և Անահիտ Գրիգորյանից համապարտությամբ՝ երկու հարյուր յոթանասունյոթ միլիոն հինգ հարյուր հիսունմեկ հազար (277.551.000) ՀՀ դրամ, Սարգիս Դանիելյանից և Անահիտ Գրիգորյանից համապարտությամբ՝ հինգ միլիոն յոթ հարյուր չորս հազար (5.704.000) ՀՀ դրամ:

Վերաքննիչ բողոքներում ամբաստանյալներն ընդհանուր առմամբ միջնորդում են մեղմացնել դատարանի նշանակած պատիժը, այն պայմանականորեն չկիրառել կամ կրճատել պատիժը՝ ՀՀ ԱԺ «Համաներում հայտարարելու մասին» որոշման դրույթների կիրառմամբ: