Փաստ ինֆո

Օրերս շրջանառության մեջ դրվեցին Ֆելմիրա Դավթյանի նամակներն՝ ուղղված տարբեր երկրների կառավարություններին, այդ թվում, որքան էլ որ զարմանալի լինի, Ադրբեջանի կառավարությանը, «Հեյդար Ալիև» հիմնադրամին և ադրբեջանական լրատվամիջոցներին:

Նամակներում դատապարտյալը գրում էր, թե «սարքված 300 դոլար կաշառքի համար ինձ 666 օր պահել են բանտում և ամեն կերպ ստորացրել են»:

Ո՞վ է Ֆելմիրա Դավթյանը, ինչի՞ համար է դատապարտվել և որոնք են նրա բողոքի հիմքերը: Համաձայնեք, որ ամեն բողոքավոր չէ, որ կդիմի հակառակորդ պետության հոգածությանը: Ընդ որում՝ այնպիսի մի պետության, որը կարելի է ասել առաջամարտիկ է մարդու իրավունքների, այդ թվում՝ խոսքի ազատության, խախտումների, քաղաքական հայացքների համար հետապնդումների ասպարեզում: Նրա դատական գործի ուսումնասիրությունը ցույց տվեց, որ տվյալ դեպքում դժգոհությունը մեղմ ասած օբյեկտիվ չէ:

Այսպես, 2009թ. ՀՀ ոստիկանության քննչական գլխավոր վարչության հատկապես կարևոր գործերով քննության վարչությունում հարուցվել էր քրեական գործ՝ ՀՀ քրեական օրենսգրքի 311-րդ հոդվածի 2-րդ մասի հատկանիշներով (կաշառք ստանալը)՝ Երևանի պետական համալսարանի Իջևանի մասնաճյուղի մինչհամալսարանական կրթության և հեռակա ուսուցման բաժնի վարիչ Ֆելմիրա Դավթյանի կողմից իր պաշտոնեական դիրքն օգտագործելով կաշառք ստանալու դեպքի առթիվ:

Ըստ օրինական ուժի մեջ մտած դատավճռի՝ Ֆ. Դավթյանը նույն մասնաճյուղի հեռակա ուսուցման բաժնի «Տնտեսագիտություն» մասնագիտության երկրորդ կուրսի ուսանող, գործով վկա Էդգար Ամիրյանի 5 քննությունները ու 2 ստուգարքները դրական գնահատելու համար 2009թ. մարտի 16-ին նրանից պահանջել է 100 հազար դրամ կաշառք: Ուսանողն այս մասին գրավոր հաղորդում է տվել ԱԱԾ՝ հայտնելով նաև, թե պահանջված կաշառքը, ըստ պայմանավորվածության, երբ պետք է փոխանցի բաժնի վարիչին: Ազգային անվտանգության ծառայությունն էլ օրենքով սահմանված կարգով գրանցել է հայտարարությունը, քիմիական փոշիով հատուկ մշակման ենթարկել 10 հատ 10 հազար դրամանոց թղթադրամներ ու տվել Էդգարին՝ Ֆելմիրա Դավթյանին որպես կաշառք փոխանցելու համար:

2009 թվականի մարտի 27-ին՝ ժամը 10:30-ի սահմաններում, պայմանավորվածության համաձայն, Էդգար Ամիրյանը հանդիպել է Ֆելմիրա Դավթյանին՝ նրա իսկ աշխատասենյակում, և հանձնել ԱԱԾ կողմից նախապես քիմիական մշակման ենթարկված թղթադրամները ու դուրս եկել: Քիչ անց նույն աշխատասենյակ են մտել ԱԱԾ աշխատակիցները և հատուկ սարքի միջոցով զննություն կատարելու արդյունքում Ֆ. Դավթյանի ցուցամատի և բութ մատի, ինչպես նաև աշխատասեղանի աջ դարակից հայտնաբերել են քիմիական փոշու հետքեր, իսկ գումարը հայտնաբերվել է ոչ ավել ոչ պակաս՝ Ֆ. Դավթյանի սեռական օրգանում (...)՝ հրավիրված մանկաբարձ-գինեկոլոգի կողմից: Ընդ որում, գործում առկա է արձանագրություն, որը փաստում է, որ ԱԱԾ օպերատիվ վարչության աշխատակիցը ընթերակաների ներկայությամբ մշակել է 10 հատ 10 հազար դրամանոց թղթադրամները: Դրանք հստակ համարակալված են եղել, թղթադրամի երեսի դիմանկարի աջ կողմում՝ սպիտակ դաշտի վրա, քիմիական մատիտով գրվել է «կաշառք» բառը, և թղթադրամները երկու կողմից մշակվել են հատուկ քիմիական նյութով: Գործում առկա է նաև արձանագրություն առ այն, որ քիմիական մշակման ենթարկված թղթադրամներն ընթերակաների ներկայությամբ հանձնվել են Է. Ամիրյանին:

Հարկ է նշել, որ նամակագիր Ֆելմիրա Դավթյանի տոնայնությունը անճանաչելի փոփոխություններ է կրել՝ դրանում համոզվելու համար բավարար է թերթել քրեական գործի թերթերը: Այսպես, 2009թ. մարտի 30-ին որպես մեղադրյալ հարցաքննության ժամանակ Ֆելմիրա Դավթյանն ընդունել է կաշառք վերցնելու հանգամանքը, զղջացել և խնդրել մեղմ վերաբերվել իրեն: Իսկ մինչ դատաքննությունը սկսվելը միջնորդել է գործը քննել արագացված դատաքննության կարգով: Հիշեցնենք, որ նման կարգ կիրառվում է միայն այն դեպքում, երբ ամբաստանյալը ընդունում է անխտիր բոլոր ապացույցները, որոնք ընկած են մեղադրանքի հիմքում: Փոխարենը՝ ամբաստանյալը դատապարտվում է հոդվածով նախատեսված նվազագույն պատժաչափի: Ֆ. Դավթյանի դեպքում էլ բացառություն չի եղել՝ նա Տավուշի մարզի առաջին ատյանի դատարանի /դատավոր Սամվել Մարդանյան/ 2009թ. հուլիսի 28-ի դատավճռով դատապարտվել է երեքուկես տարվա ազատազրկման, ինչպես նաև 2 տարի ժամկետով զրկվել է ՀՀ բուհերի համակարգում կազմակերպական-տնօրինչական գործառույթներ իրականացնող պաշտոններ զբաղեցնելու իրավունքից: Ի դեպ, քրեական օրենսգրքի 311-րդ հոդվածի երկրորդ մասը նախատեսում է ազատազրկում 3-7 տարի ժամկետով՝ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով՝ առավելագույնը 3 տարի ժամկետով: Ակնհայտ է, որ դատարանը նրան դատապարտել է հոդվածով նախատեսված նվազագույն պատժաչափի:

Նշենք, որ սա առաջին դեպքը չէր, որ Ֆելմիրա Դավթյանը հայտնվում էր իրավապահների տեսադաշտում: Նա աչքի էր ընկել նաև տարիներ առաջ՝ 1997թ., ԵՊՀ Իջևանի մասնաճյուղի տնօրեն Շավարշ Մարգարյանին զրպարտելու գործով, որը մինչդատական վարույթում կարճվել է՝ «Համաներում հայտարարելու մասին» որոշմամբ:

Թերևս հիրավի միայն բարոյական նման նկարագիր ունեցող մարդը կարող էր իրեն թույլ տալ օգտվել հայրենի իրավապահների ներողամիտ վերաբերմունքից և ապա «օգնություն» հայցել մի երկրից, որի առաջին դեմքը համայն աշխարհի հայերին համարել է իրենց թիվ 1 թշնամին: