Փաստ ինֆո

Կոտայքի մարզի ընդհանուր իրավասության դսատարանում շարունակվող Վարդան Պետրոսյանի նկատմամբ հերթական դատական նիստն այսօր շարունակվեց դատակոչված վկաների հարցաքննությամբ:

Առաջինը դատարանի դահլիճ հրավիրվեց Ոստիկանության Նաիրիի բաժնի ավագ տեսուչ Մկրտիչ Թարվերդյանը, ով դեպքի օրն օպերատիվ խմբի կազմում մեկնել է դեպքի վայր, ներկա է եղել և մասնակցել քննչական գործողություններին, մասնավորապես` դեպքի վայրի զննությանը:

Հարցին, թե ովքեր են եղել քննչական գործողությանը մասնակցած ընթերակաները, ոստիկանը դժվարացավ հստակ պատասխանել` ասելով, որ եղել են շարքային քաղաքացիներ, երկու հոգի, որոնցից մեկը տարիքով, մյուսը` երիտասարդ, սակայն չկարողացավ նկարագրել նրանց` ասելով միայն, որ տարիքով ավագը սպիտակ մազերով էր:

Վկան դժվարությամբ հիշեց նաև, թե վթարված ավտոմեքենաների մասերը, ապակիների կտորները ճանապարհի ո՞ր հատվածում են թափված եղել:

Իսկ ամենահետաքրքիր փաստն այն է, որ վկա ոստիկանը` քննչական գործողությանը մասնակցելով հանդերձ, «մոռացել է» ստորագրել քննիչի կազմած արձանագրությունը:

«Մոռացել եմ ստորագրեմ, մտածեցի վերջում կստորագրեմ, մյուս մասնակիցները ստորագրեն, վերջացնեն, նոր ես կստորագրեմ»,- դատարանում հայտարարեց Մկրտիչ Թարվերդյանը, ապա հավելեց. «Հաջորդ առավոտյան գնացի, քննիչին ասեցի մոռացել եմ, տուր ստորագրեմ, ասեց՝ արդեն պատճենահանվել ուղարկվել է դատախազություն»:

Այս պահին վկայի հարցաքննությունը դատարանում դեռ շարունակվում է: Վարդան Պետրոսյանի պաշտպան Նիկոլայ Բաղդասարյանը, վկայակոչելով դեպքին կցված լուսանկարներն ու տեսանյութերը, հայտարարում է, որ ընթերականերից մեկը լուսանկարներում բացակայում է:

«Նա գոյություն չունի»,- ասաց փաստաբանը՝ միաժամանակ հավելելով, որ դեպքի վայրում ներկա ոստիկաններն էլ քննչական գործողություններին չեն մասնակցել, այլ ուղղակի ներկա են այնտեղ: