Փաստ ինֆո

 2015թ. սոցիալական պաշտպանության ոլորտի ծախսերը նախատեսված են շուրջ 385,6  մլրդ դրամ կամ բյուջեի ընդհանուր ծախսերի 29 տոկոսը: 2014-ի նկատմամբ աճը կկազմի շուրջ 23,5 մլրդ դրամ:

Այս մասին Ազգային ժողովի մշտական հանձնաժողովների՝ հոկտեմբերի 31-ի համատեղ նիստում` 2015թ. պետբյուջեի նախագծի նախնական քննարկումների ժամանակ, հայտնեց ՀՀ ֆինանսների առաջին փոխնախարար Պավել Սաֆարյանը:

Ըստ նրա՝ աճը հիմնականում պայմանավորված է աշխատավարձերի գծով ծախսերի ավելացմամբ: Մասնավորապես, 2015թ. հուլիսի 1-ից Հայաստանում նվազագույն աշխատավարձի չափը նախատեսվում է 55 հազար դրամ` ներկայիս 50 հազար դրամի փոխարեն:

Բացի այդ, 2014թ. հուլիսի 1-ից պետական ծառայողների վարձատրության նոր համակարգի ներդրմամբ պայմանավորված՝ պետբյուջեում նախատեսվում են լրացուցիչ ծախսեր`2014թ. նկատմամբ շուրջ 41 մլրդ դրամ:

2015թ. քաղաքացիական ծառայողների աշխատավարձերի միջին չափը կկազմի 293 հազար դրամ` 2014թ. 300 հազար դրամի փոխարեն:  

2014թ. նկատմամբ սոցոլորտի ծախսերի աճը, բացի այդ, պայմանավորված է աշխատանքային միջին կենսաթոշակների`5 դրամ աճով: 2015թ. հունվարի 1-ից աշխատանքային կենսաթոշակների միջին չափը նախատեսված է 41 հազար դրամ` 2014թ. 36 հազարի փոխարեն:

Հաջորդ տարվա հուլիսի 1-ից բարձրանալու են նաև սպայական անձնակազմի կենսաթոշակների ամսական չափը և կազմելու է 61, 4 հազար դրամ:

Այսպիսով` 2015թ. սպայական անձնակազմի տարեկան միջին կենսաթոշակի տարեկան չափը կկազմի 57,7 հազար դրամ` 2014թ-ի տարեկան շուրջ 46 հազարի փոխարեն:

2015թ. լրացուցիչ ծախսեր են նախատեսված նաև 2014թ-ի օգոստոսի  1-ից ընտանեական նպաստների` 1 հազար դրամով աճի շարունակականությունն ապահովելու համար:

Հաջորդ տարի ընտանեական նպաստի չափը կպահպանվի 30,5 հազար դրամ` 2014թ-ի մինչև օգոստոսի 1-ի 29,5 հազար դրամի դիմաց: