Փաստ ինֆո

«Մենք Մարդու իրավունքների պաշտպանի հետ մանրամասն քննարկել ենք այս նախագիծը, և 2015թ. բյուջեի առանձնահատկությունն այն է, որ մենք այն ներկայացրել ենք առանց տարաձայնությունների»,- Ազգային ժողովի մշտական հանձնաժողովների՝ հոկտեմբերի 30-ի համատեղ նիստում` 2015թ. պետբյուջեի նախագծի նախնական քննարկումների ժամանակ,  հայտնեց ՀՀ ֆինանսների առաջին փոխնախարար Պավել Սաֆարյանը:

Արձագանքելով «Ժառանգություն» խմբակցության անդամ, նախկին արտգործնախարար Ալեքսանդր Արզումանյանի հարցին, Պ.Սաֆարյանը վստահեցրեց, որ այս տարի ՄԻՊ գրասենյակի ֆինանսավորման ավելացման համար «պատերազմներ» չկան:

ՄԻՊ տեղակալ Տաթևիկ Խաչատրյանն էլ իր հերթին նշեց, որ ավելի գումար չեն պահանջել, թեև գումարը երբեք շատ չի լինում:

Ի դեպ` ՄԻՊ Կարեն Անդրեասյանը նախապես տեղեկացրել էր, որ գտնվում է աշխատանքային գործուղման մեջ, և հայտնել, թե ցավում է, որ չի կարող անձամբ ներկա գտնվել բյուջետային քննարկմանը:

Այս կապակցությամբ պատգամավոր Ա.Արզումանյանը նկատեց, որ միանում է «Հայ ազգային կոնգրես» խմբակցության անդամ Նիկոլ Փաշինյանի նախօրեին հնչեցրած առաջարկին` «բյուջեի նախագծի քննարկումների ժամանակացույցը կազմելիս այնպես լինի, որ պատգամավորները կարողանան հարցեր տալ ոլորտի պատասխանատուին»:

«Հիմա ասվեց` ցավում է ՄԻՊ-ը: Երեկ ցավում էին Երևանի քաղաքապետը, Սյունիքի մարզպետը: Երեկոյան կցավա արտգործնախարարը»,-հեգնեց նա` նկատի ունենալով քննարկումներին նշված անձանց բացակայությունները: Պատգամավորը հայտնեց, թե ՄԻՊ-ի տեղակալի ներկայացման ոճի կամ իրազեկվածության հետ կապված որևէ խնդիր չկա. «Հարցը սկզբունքն է` մենք էլ մեր օգնականներին չենք ուղարկում»:

Նշենք, որ 2015թ. Մարդու իրավունքների պաշտպանի աշխատակազմի ծախսերի համար նախատեսված է 249,6 մլն դրամ, ինչը 26,4 մլն դրամով ավելի է, քան 2014թ.: Ըստ զեկուցող` ՀՀ ֆինանսների նախարարի առաջին տեղակալի, ավելի շատ աճել են ընթացիկ ծախսերը, ընդ որում` 29 մլն դրամով աշխատավարձերի մասով: 2014թ-ի համեմատ շուրջ 3 մլն դրամով նվազել են կապի, գրասենյակային նյութերի, գույքի, սարքավորումների ծախսերը:  

Նշվեց նաև, որ ՄԻՊ-ի գրասենյակի 2015թ-ի պետական ֆինանասավորման, ինչպես և պետական կառավարման ամբողջ համակարգի պահպանման ծախսերի աճը, հիմնականում պայմանավորված է ընթացիկ տարվա հուլիսի 1-ից աշխատավարձերի բարձրացմամբ և օգոստոսի 1-ից էլեկտրաէներգիայի սակագների աճով: ՄԻՊ գրասենյակի ծախսերն այլ էական փոփոխություններ չեն կրել:

Լուսանկարը՝ Ֆոտոլուրի