Փաստ ինֆո

«Հին Էրիվանի» սեփականատեր Մանվել Տեր-Առաքելյանը դիմում է ներկայացրել ՀՀ գլխավոր դատախազ  Գ. Կոստանյանին և ՀՀ ԱԱԾ տնօրեն  Գ. Հակոբյանին՝ խնդրելով «Յունիբանկի»  վարչության  նախագահ Վ. Աթայանի գործողություններին օբյեկտիվ գնահատական տալ:

«Խնդրում եմ Ձեր  անմիջական ցուցումով քննության  առարկա դարձնել իմ կողմից մատնանշված ապացույցները, և եթե արդյունքում հիմնավորվի, որ Վ. Աթայանի գործողություններում առկա է քրեորեն պատժելի արարք,  ապա լուծել Վարդան Աթայանին քրեական պատասխանատվության ենթարկելու հարցը»,-նշվում է դիմումում:

Դիմող Տեր-Առաքելյանը՝  ներկայացնելով  ապացույցները, այն է՝  Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2014թ-ի օգոստոսի 1-ին և 29-ին «Հին Էրիվան Հոլդինգ» ՍՊԸ-ի սնանկության գործով տեղի ունեցած դատական նիստի կրիչը,  նշում է, որ «Յունիբանկ» ՓԲԸ-ի և Վ. Աթայանի ներկայացուցիչ Հայկ Հարությունյանը դատաքննության ընթացքում, դատարանին, մասնավորապես,  հայտնել է  բառացիորեն հետևյալը. «…  քանի որ,  ինչպես ես մատնանշեցի,  Բանկի ղեկավարությունը Մանվել Տեր-Առաքելյանի հետ եկել է ջենթլմենական պայմանավորվածության՝ Բանկի ղեկավարությունը հանձնարարել է բանկի աշխատակցուհուն, որպեսզի համապատասխան կատարվեն գանձումները այն չափով, որոնք որ նախատեսված են եղել չկնքված համաձայնագրերով և այդ ձևակերպումները տրված են եղել»:

Ապա գործարարը մեջբերում է  23.06.2014 թվականին, Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի  դատական նիստի արձանագրությունից, մասնավորապես,  Վ. Աթայանի ներկայացուցիչ Հայկ Հարությունյանի ելույթից հատված՝  «... այդ համաձայնագրերը, որոնց վրա պնդել է ընկերությունը և Մանվել Տեր-Առաքելյանը, այդ համաձայնագրերը երբևիցե կնքված չեն եղել:...»:  

Գործարարը  նշվածից եզրահանգում է, որ   «Հ. Հարությունյանը դատարանին հայտնում է այն մասին, որ  բանկի վարչության նախագահ Վարդան Աթայանը՝ չունենալով «Հին Էրիվան Հոլդինգ» ՍՊԸ-ի հետ կնքված պայմանագիր, այնուամենայնիվ բանկի օպերատորին, անձամբ, ցուցում է տվել ընկերության հաշվից գանձումներ կատարել չկնքված համաձայնագրերով  և օրինական ուժ չունեցող,  ջենթլմենական համաձայնության վրա»։ 

Ակնհայտ է,  գտնում է Մանվել Տեր-Առաքելյանը, որ Վարդան Աթայանը իրավունք չուներ կիրառել չկնքված որևէ համաձայնագիր, և «իր պաշտոնական լիազորությունները չարաշահելով՝  բանկի օպերատորին պարտադրել,  որպեսզի վերջինս շեղվի համակարգչային ծրագրով նախատեսված համաձայնագրերի դրույքաչափերից և գանձում կատարի, հատուկ խոշոր գումար 32.000.000-ից ավելի»։

Բանկի համապատասխան աշխատակցուհուն նշված ցուցումը տալով, ըստ «Հին Էրիվանի»  սեփականատիրոջ, Վարդան Աթայանը իր լիազորությունները օգտագործել է բանկի շահերին հակառակ: «Նշված ապացույցի հետազոտման և գնահատման արդյունքում,  հնարավոր է, որ հիմնավորվի այն հանգամանքը, որ Վ. Աթայանի գործողություններում առկա լինի հանցագործության հանցակազմի հատկանիշներ»,- նշում է գործարարը՝ ընդգծելով, որ «փաստորեն իմ կողմից վկայակոչած ապացույցը էական նշանակություն ունի Վ Աթայանի գործողություններին օբեկտիվ գնահատական տալու համար»: