Փաստ ինֆո

«Առանց խորհրդարանի՝ օմբուդսմենի ինստիտուտը գրեթե ազդեցություն չի կարող ունենալ մեծ, համակարգային խնդիրների լուծման գործում: Մենք տարբեր ձևաչափերով ենք փորձել համագործակցել Ազգային ժողովի հետ: Առանձին դեպքերում հաջողություններ եղել են»,- Ազգային ժողովի նիստում հայտարարեց ՀՀ մարդու իրավունքների պաշտպան Կարեն Անդրեասյանը՝ ներկայացնելով «2013 թվականի ընթացքում ՀՀ մարդու իրավունքների պաշտպանի գործունեության և երկրում մարդու իրավունքների ու հիմնարար ազատությունների խախտման մասին» տարեկան զեկույցը:

Ըստ ՄԻՊ-ի, սակայն, ընդհանուր առմամբ վիճակագրությունը շատ տխուր է. 204 առաջարկներից, որ ՄԻՊ-ի գրասենյակն արել է, 2013թ. զեկույցի արդյունքներով, գործադիրի և այլ մարմինների կողմից այս պահի դրությամբ ընդունվել է ընդամենը 10-ը:

«Դա նշանակում է, իսկ իմ զեկույցն էլ ուշացել է իր տրամաբանության մեջ, որ երբ ես այսքան ուշ խոսում եմ դեռ 2013թ. մասին, գոնե կարող էի 50 խնդրի լուծման մասին այստեղ ուրախությամբ հայտնել, բայց չեմ կարող»,- ասաց նա՝ ընդգծելով, որ ցավալին այն է, որ թեև հարցադրումները հնչել են ավելի վաղ, բայց խնդիրների լուծմանը միտված համակարգային մոտեցումներ չկան:

Հաշվի առնելով զեկույցի մեծ ծավալը և ԱԺ-ում այն ներկայացնելու համար իրեն հատկացված ժամանակը՝ ՄԻՊ-ը բերեց մի քանի օրինակներ՝ նշելով, որ իր «ընտրանին շատ կոնկրետ է, շատ մոտ է մեր բոլորի կյանքին»:

ՄԻՊ-ի ընտրանին մասնավորապես վերաբերում էր ոստիկանության և դատախազության համակարգերին, առողջապահության և կրթության ոլորտներին:

«2013թ. մեզ համար եղել է շատ ծանր տարի: Քիչ են մեզ ավելի լսել և առել մեր խորհուրդները: 2014թ. այս իմաստով ունի դրական միտումներ, դրա մասին ես կխոսեմ մյուս տարի, եթե հնարավորություն տրվի, բայց այս տարի ամենավատ երկու կառույցները, որոնք չեն կարողանում գիտակցել այս ինստիտուտի հետ աշխատելու ձևն ու սովորույթը, ՀՀ գլխավոր դատախազությունն է և ՀՀ առողջապահության նախարարությունը: Մնացածների հետ որոշ դեպքերում գոնե լինում է որոշ արդյունքների հասնել»,- ընդգծեց Կ.Անդրեասյանը:

Անդրադառնալով, մասնավորապես, ոստիկանության համակարգին՝ Կ.Անդրեասյանը նշեց, որ դրական զարգացումներ շատ են եղել, ինչի մասին ինքը խոսել է, սակայն դեռ կան բազմաթիվ խնդիրներ: Դրանցից մեկը, ըստ նրա, չի կարող որևէ մեկը չընդունել: «Ոստիկանության առանձին բաժիններում դեռ շարունակվում է պահպանվել բռնությունը: Եվ այստեղ քաղաքական ոչ մի, կարծում եմ, սիմպատիաների հարց չի, որպեսզի մենք ընդունենք, որ կա այդ խնդիրը, եղել է և շատ երկրներում է լինում»,- նշեց ՄԻՊ-ը:

Ըստ նրա՝ իրենց առաջարկը շատ կոնկրետ և պարզ էր՝ ոստիկանության համապատասխան բաժիններում տեղադրել տեսաձայնագրող սարքավորումներ, ինչի մասին գրված է եղել ՄԻՊ-ի զեկույցում:

«Ի պատասխան մեր այդ առաջարկությանը՝ ընդամենը դրվել են տեսախցիկներ, որոնք օն-լայն  ռեժիմով ցույց են տալիս այնտեղ անցուդարձը, բայց այն խցերում, որտեղ կարող են ապտակել, չգիտեմ՝ ծեծել, չկա այդ տեսախցիկը, ձայնագրող սարքը, որը հետագայում կօգնի, որպեսզի մարդիկ ավելի իրենց պաշտպանված զգան: Ոստիկանապետի հետ մեր արագ արձագանքման ծառայության որոշակի աշխատանքների շնորհիվ, այո՛, ես կարող եմ փաստել, որ 2013թ. կամ 2014թ. առաջին կիսամյակի տվյալներով՝ ոստիակնությունում բռնություններն էապես նվազել են: Բայց նույն խնդրին անդրադառնալով՝ դատախազությունը քայլեր չի ձեռնարկել, որպեսզի անի իր գործը, որովհետև 365 դեպքերում եղել է բողոք, որ այնտեղ մարդկանց ծեծում են, բռնություն են գործադրում, և զարամանալի թիվ է, թե ինչքանով է գործ հարուցվել՝ ընդամենը 12 »,- հայտարարեց Կ.Անդրեասյանը՝ ընդգծելով, դա զավեշտալի թիվ է:

Այս պահին ՄԻՊ-ը պատասխանում է պատգամավորների հարցերին: Հերթագրվել է 18 պատգամավոր:

Ի դեպ, զեկույցը քննարկումից հետո կընդունվի ի գիտություն՝ առանց որևէ փաստաթղթի ընդունման: