Փաստ ինֆո

Կոտայքի մարզի ընդհանուր իրավասության դատարանում ընթացող դատավարության հերթական նիստում այսօր ուշագրավ հայտարարություններ արեց Վարդան Պետրոսյանի պաշտպան Նիկոլայ Բաղդասարյանը` պաշտոնատար անձանց մեղադրելով չարաշահումների մեջ:

Ամեն ինչ սկսվեց նրանից, որ ապացույցների հետազոտման ընթացքում դատարանը  հրապարակեց քննիչ Հ. Հակոբյանի կողմից կազմված տուժող Արթուր Հակոբյանի վարած «Նիվա» ավտոմեքենայի զննության արձանագրությունն այն մասին, որ վթարից հետո ավտոմեքենան գտնվել է վթարված վիճակում, դռները հնարավոր չի եղել բացել, իսկ վարորդի նստարանին եղել է կողային հայելին:

Զննության արձանագրության հրապարակումից հետո Վարդան Պետրոսյանի պաշտպան Նիկոլայ Բաղդասարյանը հայտարարեց, որ մեքենայի վրա տեղադրված գազի բալոնը տեղադրվել է առանց համապատասխան թույլտվության: Բացի այդ, ըստ Նիկոլայ Բաղդասարյանի, թեև մեքենայի վրա գազի բալոն է տեղադրված եղել և մեքենան շահագործվել է գազով, բայց համապատասխան հիմնարկի ղեկավարությունը այդ մեքենայի համար բենզինի կտրոններ է դուրս գրել:

«Ներկայացված է, թե Նիվա մակնիշի ավտոմեքենան ինչքան վազք է ունեցել գազի բալոնը տեղադրելուց մինչև վթարի տեղը, այդ տարբերությունը հանելով մենք տեսնում ենք, թե ինչքան է այդ տրանսպորտային միջոցը գազի բալոնով շահագործվել, փոխարենը ստացվել է պաշտանատար անձանց կողմից տրված բենզինի կտրոններ, այսինքն` կարելի է հաշվել, թե ինչքան գումար վարկային կազմակերպության կողմից, որը ստացվում է ՀԲ-ի կողմից, յուրացվել է»,- հայտարարեց փաստաբանը։ Վերջինիս այս դիտարկմանը դատավոր Վաղինակ Մկրտչյանն արձագանքեց, թե գործը հարուցվել է 282-րդ հոդվածով, և «թե ով ինչ լրացուցիչ գումար է տվել, այստեղ չենք քննարկում»:

Սակայն Նիկոլայ Բաղդասարյանը, շարունակելով խոսքը, հայտարարեց, թե այս փաստի վերաբերյալ նախաքննական մարմինը ոչ մի քննություն չի կատարել: «Ներկայացված փաստաթղթերը եկել են հիմնավորելու, որ իրենք 1.5 տարի չեն տեսել, երբ  յուղ են տեղադրել և այլն, որ մեքենայի մեջ գազի բալոն է տեղադրված: Բացառված է, որ պետական մարմինը չտեսներ, որ տեղադրված է գազի բալոն, և փոխարենը գազ լիցքավորեին, լիցքավորել են բենզին»,- ասաց Նիկոլայ Բաղդասարյանը` պնդելով, որ գործում կա ապացույց, որ բալոնն անօրինական է տեղադրված, ինչն իրենց համոզմամբ տվյալ տրանսպորտային միջոցի շահագործման խախտում է և «ոչ թե պայման, պատճառ է հանդիսացել տուժողների մահվան»: «Այսինքն, եթե գազի բալոնը  տեղադրված չլիներ Նիվա մակնիշի ավտոմեքենայի բեռնախցիկում, ապա տուժողները չէին մահանա այս վթարի արդյունքում»,- եզրակացրեց փաստաբանը:

Պաշտպանի այս հայտարարությանն արձագանքելով՝ տուժող կողմի շահերի ներկայացուցիչ Ռուբեն Բալոյանը նշեց. «Ես բազմիցս հայտարարել եմ` գազի բալոնն այս վթարի հետ կապ չունի: Սա այս դատավարության հաջորդ սերիան է, և պաշտպանական կողմը փորձում է մատուցել, որ եթե գազի բալոնը չլիներ, վթարը տեղի չէր ունենա, այսինքն` գազի բալոնն է մեղավոր էս ամեն ինչում»: Ռուբեն Բալոյանը նաև նշեց, որ գործում կա դատաբժշկական փորձագետի եզրակացություն, թե մահն ինչի հետևանքով է եղել, բայց քանի որ այս ապացույցը դատաքննության այս փուլում դեռ հրապարակված չէ, դատավորը խնդրեց կողմերին զերծ մնալ դրա շուրջ հայտարարություններ անելուց:

Իսկ մեղադրող դատախազ Արթուր Սարգսյանն էլ հայտարարեց, որ Նիկոլայ Բաղդասարյանի հիշատակած փաստերի վերաբերյալ գործին կցված փաստացի ապացույցներ չկան: «Այս փաստաթղթերում որևէ հարց չկա գազի բալոն են դնում, թե չեն դնում, ընդամենը մեքենայի տեխնիկական սպասարկման հետ կապված ծախսերն են»,- նշեց դատախազը` հավելելով, որ Նիվա մակնիշի ավտոմեքենայի տեխնիկական սպասարկման փաստաթղթերը վկայում են, որ ավտոմեքենան ամեն ամիս համապատասխան տեխնիկական սպասարկում է անցել:

Հիշեցնենք, Արթուր Հակոբյանի վարած Նիվա մակնիշի ավտոմեքենան պատկանել է «Գյուղատնտեսական ծրագրերի իրականացման գրասենյակ» պետական հիմնարկին, որն այժմ 2 600 000 ՀՀ դրամ վնասի փոխհատուցման հայց է ներկայացրել դատարան ընդդեմ Վարդան Պետրոսյանի:

Ի դեպ, գազի բալոնի ու հատկապես դրա` երեխաների մահված պատճառ լինելու մասին քննարկումը հավասարակշռությունից հանեց տուժողի իրավահաջորդ, վթարում զոհված երեխաներից մեկի հայր՝ Արթուր Հակոբյանին, ով դատական նիստի ավարտին, դիմելով Նիկոլայ Բաղդասարյանին, ասաց. «Մի քիչ քեզ հավաք պահի, թե չէ գիտես` սրա վերջը ինչ է լինելու: Չմոռանաք, որ երկու հատ 16 տարեկան երեխու գլուխ եք կերել: Իսկ ով որ մոռանում ա, թող իրա ընտանիքին լինի»: Տուժողի այս հայտարարությանը Վարդան Պետրոսյանի կողմնակիցներից մեկն արձագանքեց. «Դեռ պետք է պարզել, թե ով է կերել էդ երեխու գլուխը»: Բարեբախտաբար, դատական կարգադրիչների միջամտությամբ հնարավոր եղավ կանխել հասունացող բախումը:

Գործի դատաքննությունը կշարունակվի հաջորդ ուրբաթ` հունիսի 20-ին, ժամը 15:00: