Փաստ ինֆո

Կոտայքի մարզի ընդհանուր իրավասության դատարանի դատավորները հրաժարվել են քննել իրենց գործընկերոջ՝ կաշառք ստանալու մեջ մեղադրվող նույն դատարանի դատավոր Գագիկ Հեբոյանի քրեական գործը։

«Փաստինֆո»-ի հաղորդմամբ՝ գործը դատարան է ուղարկվել մայիսի 14-ին եւ այս ընթացքում արդեն 4 տարբեր դատավորի է մակագրվել գործը, ովքեր մեկը մյուսի հետեւից ինքնաբացարկ են հայտնել։

Այսպես՝ քրեական գործը դատարան մուտք լինելուց հետո՝ մայիսի 15-ին մակագրվել էր դատարանի նախագահ Հովհաննես Ավագյանը, ով իր նախաձեռնությամբ մայիսի 16-ին ինքնաբացարկ է հայտնել

«Գործով ամբաստանյալ Գագիկ Հեբոյանը հանդիսանում է ՀՀ Կոտայքի մարզի առաջին ատյանի ընդհանուր իրավասության դատարանի դատավոր, ում անձնապես ճանաչում եմ դեռևս 2006 թվականից:
2015 թվականին ինքս նշանակվել եմ ՀՀ Կոտայքի մարզի առաջին ատյանի ընդհանուր իրավասության դատարանի դատավոր, իսկ 2018 թվականից զբաղեցնում եմ նույն դատարանի նախագահի պաշտոնը: Դատավորի պաշտոնում աշխատանքային լիազորություններս իրականացնելու շուրջ հինգ տարիների ընթացքում դատավոր Գագիկ Զենիկի Հեբոյանի հետ հաճախ գործնական և անձնական բնույթի շփում ենք ունեցել և այդ ընթացքում ձեռք ենք բերել նաև ընկերական հարաբերություններ: Առկա պայմաններում, գտնում եմ, որ դատավոր Հ.Ավագյանիս անաչառության վերաբերյալ կասկածները, թե՛ սուբյեկտիվ և թե՛ օբյեկտիվ մոտեցմամբ գնահատման արդյունքում, չեն կարող հիմք հանդիսանալ արձանագրելու, որ դատավորի կողմից առաջարկվող երաշխիքները բավարար են այդ կապակցությամբ առաջացած ցանկացած օրինաչափ կասկած բացառելու համար»,- ինքնաբացարկի որոշման մեջ արձանագրել է Հ.Ավագյանը:

Մայիսի 17-ին գործը մակագրվել է դատավոր Գեղամ Մարգարյանին, ով մայիսի 20-ին նույնպես ինքնաբացարկ է հայտնել։ «Քրեական գործով որպես ամբաստանյալ է հանդիսանում նաև Գագիկ Զենիկի Հեբոյանը, ում հետ նախագահող դատավորս 2008թ.-ից աշխատել եմ Կոտայքի մարզի ընդհանուր իրավասության դատարանում: Մասնավորապես` աշխատել եմ, որպես գրասենյակի գործավար, այնուհետև, նույն դատարանում աշխատել եմ որպես դատավորի օգնական և վերջինիս հետ գտնվել եմ մտերիմ հարաբերությունների մեջ: 2017 թվականի մարտ ամսից նույն դատարանում նշանակվել եմ որպես քրեական գործերով դատավոր և Գագիկ Հեբոյանի հետ աշխատել ենք հարևանությամբ գտնվող սենյակներում, գրեթե ամեն օր միասին շփվել ենք, քննարկել մեր, թե նեղ անձնական և, թե կենցաղային հարցերը: Միասին մասնակցել ենք, ինչպես մեր անձնական, այնպես էլ ընկերական և համայնքում կազմակերպված միջոցառումներին և գրեթե ողջ համայնքը տեղյակ է, որ մենք հանդիսանում ենք նույն դատարանի նստավայրում աշխատող գործընկերներ»,- նշել է դատավորը:

Մայիսի 21-ին գործը մակագրվել է դատավոր Վարդան Ստեփանյանին, ով եւս մայիսի 22-ին ինքնաբացարկ է հայտնել՝ նույն պատճառաբանությամբ. ամբաստանվող դատավորին ճանաչում է դեռևս 2002 թվականից, երբ որպես վերահսկողության վարչության պետ աշխատում էի ՀՀ արդարադատության նախարարությունում:

նույն օրը՝ մայիսի 22-ին այն մակագրվել է Գոռ Շահբազյանին, որը հաջորդ օրը՝ մայիսի 23-ին նույնպես որոշում է կայացրել ինքնաբացարկի մասին։ Այս պահին գործը որեւէ այդ դատավորի չի մակագրված։

Ավելի վաղ տեղեկացրել ենք, որ դատավոր Գ.Հեբոյանը մեղադրվում է առանձնապես խոշոր չափերով կաշառք ստանալու համար՝ ՀՀ քրեական օրենսգրքի 311-րդ հոդվածի 4-րդ մասի 2-րդ և 3-րդ կետերով, իսկ փաստաբան Վահագն Դանիելյանը՝ դատավորի կողմից առանձնապես խոշոր չափերով կաշառք ստանալուն օժանդակելու համար՝ ՀՀ քրեական օրենսգրքի 38-311-րդ հոդվածի 4-րդ մասի 2-րդ և 3-րդ կետերով:

Նախաքննության վարկածի համաձայն՝ դատավորն իր վարույթում քննվող քաղաքացիական գործով հայցվորի օգտին գործողություն կատարելու, այն է` վերջինիս 3.580.000 ՀՀ դրամ պետական տուրքը վճարելուց ազատելու դիմաց, 2019թ. մարտի 6-ին նրանից պահանջել է առանձնապես խոշոր չափերի` 1.714.160 ՀՀ դրամին համարժեք 3500 ԱՄՆ դոլար կաշառք:

Քաղաքացու հետ սակարկելու արդյունքում Գագիկ Հեբոյանը նրա հետ վերջնական պայմանավորվածություն է ձեռք բերել հիշյալ գործողությունը կատարելու դիմաց 1.224.400 ՀՀ դրամին համարժեք 2500 ԱՄՆ դոլար կաշառք ստանալու վերաբերյալ: Խուսափելով կաշառքի առարկան անձամբ վերցնելուց և բացահայտվելուց` դատավորը դիմել է իր ծանոթ փաստաբանի` Վահագն Դանիելյանի օժանդակությանը. 2019թ. մարտի 27-ին հիշյալ քաղաքացին ԱԱԾ-ի կողմից իրականացված օպերատիվ-հետախուզական միջոցառման շրջանակներում 2500 ԱՄՆ դոլար կաշառքի գումարը տվել է փաստաբանին, ով նույն օրը այն փոխանցել է դատավորին:

Գ. Հեբոյանի նկատմամբ որպես խափանման միջոց է կիրառվել կալանավորումը, իսկ Վ. Դանիելյանի նկատմամբ որպես խափանման միջոց ընտրված կալանավորումը 08.05.2019թ.-ին փոխարինվել է այլընտրանքային խափանման միջոց գրավով:

Աղբյուր` Փաստինֆո