Փաստ ինֆո

Հանցավոր համագործակցության գործով այսօրվա դատական նիստին չէին ներկայացրել պաշտպանության նախկին փոխնախարար Վահան Շիրխանյանին:

Հիշեցնենք, որ հունիսի 23-ին նշանակված դատական նիստին դատարանը Վահան Շիրխանյանի նկատմամբ կիրառել էր միանգամից երեք դատական սանկցիա՝ երկու անգամ նախազգուշացնելուց հետո՝ երեք ժամով հեռացրել էր նիստերի դահլիճից:

Պատճառն էլ այն էր հանդիսացել, որ Շիրխանյանը, ով սայլակով է բերվում դատարան, ոտքի չէր կանգնել։

Այսպիսով, դատարանը՝ նախագահությամբ Արմեն Բեկթաշյանի, դատավարության մասնակիցներին հայտնեց, որ գործին ներգրավվել է նոր դատախազ՝ Էդգար Ասատրյանը:

Դատախազին բացարկի հարցի քննության ժամանակ էլ ամբաստանյալ Վահան Շիրխանյանի պաշտպան Հայկ Ալումյանը դատարանից պահանջեց իր պաշտպանյալին վերադարձնել դահլիճ, քանի որ նախ վաղուց լրացել է սանկցիա ժամկետները, ապա դատախազին բացարկ հայտնելու վերաբերյալ իր պաշտպանյալի կարծիքը պետք է իմանա, որպեսզի դիրքորոշում հայտնի հարցի վերաբերյալ:

Պաշտպանն իր խոսքում նշեց, որ դատարանը ժամկետները հաշվելիս կոպտորեն խախտում է քրեական դատավարության օրենսգրքի 173-րդ հոդվածի պահանջը և այս պահին դատավարությունն առանց Շիրխանյանի շարունակելը կոպտորեն խախտում է նրա իրավունքները և որ նրան անհապաղ պետք է վերադարձնել դատական նիստերի դահլիճ:

Հարցի վերաբերյալ նախագահողը որպես պարզաբանում ասաց, որ Շիրխանյանի նկատմամբ սանկցիան կիրառվել է 3 ժամով և դեռևս չի լրացել ժամկետները, երբ լրանա, նրան դահլիճ կբերեն, և առաջարկեց պաշտպանին դատախազի բացարկ հայտնելու վերաբերյալ կարծիք հայտնել:

Ըստ նախագահողի՝ պաշտպանն իր գործողություններով ձգձգում է դատական նիստերը, Ալումյանն էլ հայտարարեց, որ դատարանն է ամեն ինչ անում, որպեսզի դատավարությունը ձգձգվի, սակայն այդ ձգձգման պատճառն այնպես է ներկայացվում, թե, իբրև, մեղադրյալները կամ փաստաբաններն են, այն դեպքում, երբ դատարանը շատ լավ գիտի, որ Շիրխանյանը չի կարողանում ոտքի վրա կանգնել, դա մեկնաբանեց իբրև անհարգալից վերաբերմունք ստեղծելով նման իրավիճակ, այնինչ բժշկական էպիկրիզում, որը դատարանի տրամադրության տակ ևս կա, պարզ երևում է, որ Շիրխանյանը չի կարողանում ոտքի վրա կանգնել:

«Նշված օրն էլ Շիրխանյանին դատարանից հեռացնելուց հետո դատական նիստը ձախողեցիք, իսկ հիմա էլ ուզում եք տպավորություն ստեղծել, որ դատական նիստը ձախողվում է պաշտպանի պատճառով»,- ասաց Հայկ Ալումյանը՝ հավելելով, որ լքում է դատական նիստերի դահլիճը:

Դատարանն էլ պաշտպանի այս գործողությունը գնահատեց որպես պաշտպանի իրավունք և 2 ժամով ընդմիջեց դատական նիստը՝ նշելով, որ կա հանրային պաշտպան ներգրավվելու մասին որոշում և կընմիջեն հանրային պաշտպան ապահովվելու համար:

Նշենք նաև, որ դատական նիստին ներկա չէին նաև 3 պաշտպան՝ Սիրուշ Աղվանյանը, Հերմինե Միքայելյանը և Թամարա Բաղդասարյանը:

Աղբյուր` Փաստինֆո