Փաստ ինֆո

Երևանի Մալաթիայի նախկին թաղապետ Վահան Զատիկյանի որդու՝ Սեդրակ Զատիկյանի սպանության պատվերի արդեն երկրորդ գործով այսօր Մալաթիա-Սեբաստիա վարչական շրջանների դատարանը ամբաստանյալ Նարեկ Խաչատրյանին մեղավոր ճանաչեց մեղադրանքում ու դատապարտեց 15 տարվա ազատազրկման:

Ճիշտ այդքան տարվա ազատազրկում էր միջնորդել մեղադրողն իր մեղադրական ճառում: Ըստ մեղադրողի, ՀՀ քրեական օրենսգրքի 38-104-րդ հոդվածի 2-րդ մասի 8-րդ կետով՝ պատվերով սպանությանը դրդելը, մեղադրանքն ամբողջ ծավալով ապացուցված է ու հիմնավորված:

Իսկ տուժողի իրավահաջորդի ներկայացուցիչ, փաստաբան Վաղարշակ Գևորգյանը՝ կատարելով տուժողի իրավահաջորդի հանձնարարությունը, միջնորդել էր ամբաստանյալի նկատմամբ նշանակել հոդվածով նախատեսված առավել խիստ պատիժ, այսինքն՝ ցմահ ազատազրկում:

Ամբաստանյալի պաշտպան, փաստաբան Վարդուհի Էլբակյանն իր պաշտպանական ճառում միջնորդել էր արդարացնել իր պաշտպանյալին: Ըստ պաշտպանի, գործում չկան մեղադրանքը հիմնավորող վերաբերելի ու թույլատրելի ապացույցներ:

Ամբաստանյալն իրեն մեղավոր չի ճանաչում առաջադրված մեղադրանքում և այդ մասին նա այսօր հայտարարել է նաև իր վերջին խոսքում: Ն.Խաչատրյանն դատարանում ավելի վաղ հայտարարել էր. «9 տարի սպասել եմ, որ գամ արդարացվեմ: Իմ մասին որևէ մեկը ցուցմունք տվե՞լ է»:

Նշենք, որ Նարեկ Խաչատրյանի վերաբերյալ գործը Սեդրակ Զատիկյանի սպանության վերաբերյալ արդեն երրորդ գործն է՝ սպանության պատվերի մեկ այլ գործով արդեն կա օրինական ուժի մեջ մտած դատավճիռ, որով Ստեփան Հակոբյանը մեղավոր է ճանաչվել նույն՝ ՀՀ քրեական օրենսգրքի 38-104-րդ հոդվածի 2-րդ մասի 8-րդ կետով և դատապարտվել ազատազրկման 15 տարի ժամկետով:

Ավելի վաղ՝ բուն սպանության գործով 2007թ. կայացված դատավճռով սպանության մեջ մեղադրվող Արսեն Առուշանյանը դատապարտվել է ցմահ ազատազրկման, իսկ Արթուր Հովհաննիսյանն ու Լուսինե Ղևոնդյանը՝ տևական ազատազրկման՝ սպանությանը օժանդակելու համար:

Սեդրակ Զատիկյանը սպանվել էր 2006թ. հունիսի 22-ին` Սեբաստիա փողոցում: Արձակված կրակահերթից մահացել էր նաև պատահական մի անցորդ՝ երեք անչափահաս երեխաների մայր Կարինե Սարգսյանը:

Լուսանկարը՝ Yerkir.am-ի

Աղբյուր` Փաստինֆո