Փաստ ինֆո

Կազմակերպված խմբի կողմից ապօրինի զենք ռազմամթերք պահելու մեջ մեղադրվող Ժիրայր Սեֆիլյանի և մյուսների գործով այսօրվա դատական նիստը տեղի ունեցավ ընդմիջումներով և պաշտպաններից մեկի բացակայությամբ:

Գործով երկրորդ անգամ է դատական նիստ տեղի ունենում և այսօր նախագահող դատավոր Տաթևիկ Գրիգորյանը դատական նիստը սկսեց՝ կողմերից հետաքրքրվելով， թե արդյոք կան դատարանին ինքնաբացարկի միջնորդություններ:

Մեղադրանքի կողմը դատարանին ինքնաբացարկի միջնորդություն չհայտնեց, սակայն պաշտպանական կողմը շտապեց դատարանին ինքնաբացարկ հայտնել և անգամ չբարձրաձանեցին, որ իրենց գործընկերներից մեկը բացակայում է, իսկ մյուս փաստաբանը, ով ներկայացել է՝ գործին դեռևս ներգրավված չէ:

Ասել է թե դատավարության բոլոր մասնակիցները նիստին ներկա չէին, իսկ դատարանն անգամ այդ հարցը քննարկման չառավ՝ ամբաստանյալի կարծիքը չլսեց իր պաշտպանի բացակայության պայմաններում արդյոք նա չի առարկում նիստը շարունակելուն: Նման  պայմաններում նիստը շարունակվեց, դատարանին ինքնաբացարկ հայտնեցին, որը մերժվեց, ապա ամբաստանյալ Գևորգ Սաֆարյանի նկատմամբ դատական սանկցիա կիրառվեց՝ նստած տեղից հայտարարություններով հանդես գալու համար:

Դատարանը նախ նրան նախազգուշացրեց, սակայն ամբաստանյալը շարունակեց նույն պահվածքը և այս անգամ դատարանը անհարգելի գնահատեց և նրան 3 ժամով հեռացրեց դատական նիստերի դահլիճից:Ապա  սանկցիաներ կիրառվեցին Ժիրայր Սեֆիլյանի և Ներսես Պողոսյանի նկատմամբ՝ վերջիններս էլ դատարանի դահլիճ ներս մտնելիս հրաժարվեցին ոտքին կանգնել:

Նկատենք, որ մեղադրող դատախազը դատարանի ուշադրությունը հրավիրեց այն հանգամանքի վրա, որ բացակայում է ամբաստանյալներից մեկի փաստաբանը և դատարան է ներկայացել փաստաբան, որը դեռևս գործին ներգրավված չէ:

Ի վերջո， դատարանը որոշեց հանրային պաշտպանի գրասենյակից ներկայացած փաստաբան Արթուր Ալիխանյանին ներգրավել որպես Գալուստ Գրիգորյանի，իսկ պաշտպան Տիգրան Եգորյանի բացակայության պատճառով  դատական նիստը հետաձգվեց:

Ավելի վաղ տեղեկացրել ենք, որ ամբաստանյալ Ներսես Պողոսյանի պաշտպան Արայիկ Պապիկյանը նախագահող դատավոր Տաթևիկ Գրիգորյանին ինքնաբացարկի միջնորդություն էր հայտնել:

Մասնավորապես, պաշտպանը կասկած հայտնեց, որ դատավորը կողմնակալ վերաբերմունք ունի, ինչը կարող է ազդել գործի քննության վրա: Ըստ պաշտպանի՝ դատարանը որոշում է կայացրել Ներսես Պողոսյանի նկատմամբ որպես խափանման միջոց կալանավորումն ընտրելու վերաբերյալ և պատճառաբանել է, որ մեղադրյալի կողմից վարույթն իրականացնող մարմնից թաքնվելու հավանականությունը շարունակում է մնալ բարձր:

Պաշտպանի ինքնաբացարկի միջնորդության հիմքում դրված էր այն, որ քրեական գործը բաղկացած է 36 հատորից, և դատարանը 12 օրվա ընթացքում, որոնցից 5-ը ոչ աշխատանքային օրեր են եղել, գործը վարույթ է ընդունել ծանոթացել դրանց հետ, ասել է թե գործի նյութերն ուսումնասիրել է 7 օրվա ընթացքում:

Քրեական գործի ծավալը և դատարանի ծանրաբեռնվածությունը հաշվի առնելով պաշտպանն ընդգծեց՝ ակնհայտ է, որ դատարանը քրեական գործի դատական քննության նշանակելու որոշումը կայացրել է առանց գործի նյութերի լիարժեք ուսումնասիրման, իսկ ինչ վերաբերում է Ներսես Պողոսյանի նկատմամբ ընտրված խափանման միջոց կալանավորմանն, ապա դատարանն այն անփոփոխ թողնելու մասին որոշումը կայացվել է առանց պատճառաբանման:

Պաշտպան Արայիկ Պապիկյանի միջնորդությանը միացավ նաև Ժիրայր Սեֆիլյանի պաշտպան Տիգրան Հայրապետյանը՝ նշելով, որ այս գործը ուսումնասիրված և հետազոտված չլինելու պայմաններում դատարանը որոշումներ է կայացրել:

Պաշտպանի գնահատմամբ՝ մինչ այս դատարանի կողմից կատարված բոլոր գործողությունները ձևական են եղել և միտված են եղել արդար դատաքննություն իրականացնելու պատրանք ստեղծելուն:

Դատարանի ինքնաբացարկի միջնորդությանն առարկել էր մեղադրող դատախազ Պետրոս Պետրոսյանը:

Նշենք նաև, որ գործը քննվում է Շենգավիթ վարչական շրջանի ապակեպատ դահլիճում և մեկ անգամ չէ որ նշված դահլիճում լսելիության հետ կապված խնդրին անդրադարձել ենք, սակայն հարկ ենք համարում նշել, որ դահլիճում ներկաները ևս աղմկում են， ինչը ևս հնարավորություն չի տալիս դատական նիստի ընթացքին առանց խոչընդոտների հետևել:

Աղբյուր` Փաստինֆո