Փաստ ինֆո

Նյու Յորքի Կարնեգի կորպորացիայի նախագահ, «Ավրորա» մարդասիրական նախաձեռնության համահիմնադիր եւ «Ավրորա» մրցանակի ընտրող հանձնաժողովի անդամ Վարդան Գրեգորյանը կարծում է, որ մարդիկ իրենց օրինակով պետք է ցույց տան, որ հասարակության, մարդկության համար են, այլ ոչ թե՝ լոկ իրենց շահերի: «Արմենպրես»-ի հաղորդմամբ՝ այս մասին նա ասաց Aurora Dialogues քննարկումների շրջանակում լրագրողների հետ զրույցում:

«Ցավում եմ, որ այնպիսի օրեր ենք ապրում, որ մարդիկ ոչնչի չեն հավատում, որովհետեւ նրանց դավաճանել են, խաբել են, նրանք այնքան հիասթափված են, որ չեն հավատում: Երբ որ այսպիսի վիճակում ենք, ստեղծում ենք դատարկություն, որ չի լցվում որեւէ բանով: Ինչպես երեկ ասացի, մենք ներկայիս բանտարկյալներն ենք, ապագայի մասին գաղափար չունենք, անցյալի մասին տեղեկություն չունենք, միայն զբաղված ենք մեր գործերով:

Պետք է գաղափարական խորհուրդ ունենաս ինքդ քո մեջ, որը հավատ կբերի քեզ ինքդ քո հանդեպ»,-նշեց նա:

Հարցին, թե ինչ է կարծում այն մտահոգությունների մասին, որ Հայաստանը նման խնդիրներ ունենալով հանդերձ մեծ գումարներ է փոխանցում խնդիրներ ունեցող այլ երկրներին, Վարդան Գրեգորյանը պատասխանեց.

«Մենք՝ հայերս, միշտ ազգայնացրել եւ սահմանափակել ենք ինքներս մեզ, պետք է միջազգային ձեւով մտածել. Կոնգոյում արդեն խոսում են Հայոց ցեղասպանության մասին, զբոսաշրջիկները, ովքեր երբեք այստեղ չեն եկել, գալիս են, արտասահմանի հայերն ասում են, որ օտարները նույնիսկ ճանաչում են մեզ:

Մենք սահմանափակվել ենք մեր մեջ եւ կարծում ենք, որ բոլորը պետք է օգնեն մեզ, բայց, նախևառաջ մենք մեզ պետք է օգնենք: Ես, որ գալիս եմ Հայաստան, տեսնում եմ կազինոները: Մեկը չի քննադատում՝ ինչու են այդքան կազինո կառուցել պալատի նման:

Այո, Հայաստանն առաջադիմիլ է, շատ խնդիրներ էլ ունի, բայց փոխանակ կազինո կառուցեն, դրանց հիսուն տոկոսը թող գնա դպրոցներին»,-ասաց Վարդան Գրեգորյանը՝ հավելելով, որ շատ հպարտ է աշխարհի տարբեր ծայրերից մարդկանց Հայաստան բերելու համար:

Լուսանկարը՝ Armenpress-ի

Աղբյուր` Փաստինֆո