Փաստ ինֆո

ՀՀ ազգային ժողովի 2017 թվականի ընտրությունների նախընտրական քարոզարշավի ընթացքում Արմավիրի մարզի Ջրառատ համայնքում տեղի ունեցած զինված միջադեպի՝ Երանոսյաններ և Մելիքյաններ բախման վերաբերյալ հարցերին փոխոստիկանապետ Լևոն Երանոսյանն այսօր Ծիծեռնակաբերդի բարձունքում լրագրողների հարցերն անպատասխան թողեց:

Փոխոստիկանապետը դեպքի վերաբերյալ հարցերից ոչ մեկին չպատասխանեց, անպատասխան մնացին հարցերը, թե ի՞նչ մասնակցություն են ունեցել միջադեպին Լևոն Երանոսյանն ու նրա եղբայրը, ճի՞շտ է, որ նրա եղբայրը զենքը պահել է գյուղացու գլխին, ինչո՞ւ են ընտրական շրջանում վախի մթնոլորտ ստեղծում Հայաստանում:

Նշենք, որ իրավիճակը փորձեց փրկել փոխոստիկանապետ Հունան Պողոսյանը, ով ասաց, որ նախաքննություն է ընթանում և խորհուրդ տվեց հետևեք նախաքննության ընթացքին:

Հիշեցնենք, որ փետրվարի 14-ին էլ Ջրառատում տեղի ունեցած դեպքերն էլ շարունակությունն են փետրվարի 12-ի դեպքերի, երբ հայտնի դարձավ, որ ՀՀԿ ներկայացուցիչ Սամվել Գալստյանի կողմից սպառնալիքներ է հնչեցվել գյուղի բնակիչների հասցեին, հնչել է մեկ կրակոց:

Այս մասին ՕՐՕ-ն հաղորդագրություն տարածեց՝ ներկայացնելով տեղի ունեցածը՝ որպես զինված հարձակում դաշինքի համակիրների վրա:

Ապա հայտնի դարձավ, որ Լեռնիկ Երանոսյանը, ով ոստիկանության ներքին զորքերի գնդապետ է, ծեծի հետևանքով ստացած վնասվածքներով հայտնվել է հիվանդանոցում:

Նշենք, որ ՕՐՕ-ի համակիրներ Մելիքյանների ազգականների մեջ կան սպորտով զբաղվողներ, ովքեր և Երանոսյանի «հախից» փորձել էին գալ բռունցքներով, և որպեսզի Երանոսյանը հանդարտեցնի իրավիճակը և նրանց «ձեռքից պրծնի», իր անձնական «Մակարով» տեսակի ատրճանակից օդ է կրակել։

Այս դեպքից ընդամենը երկու օր անց Ջրառատում հաջորդ բախումը գրանցվեց. կողմերի ընտանիքիների կրտսեր անդամները միմյանց հասցեին հայհոյանքներ են հնչեցրել, ծագել է վիճաբանություն և ծեծկռտուք, ինչից հետո էլ 3 անձ, տարբեր աստիճանի վնասվածքներով, հայտնվեցին հիվանդանոցում. ոտքի շրջանում հրազենային վիրավորում է ստացել Հակոբ Մելքոնյանը, վերջինիս հորեղբայրը, ով վիրավորում է ստացել դանակահարության հետևանքով, իսկ հորեղբոր անչափահաս որդին վիրավորում է ստացել ծեծի հետևանքով:

Եվ քանի որ Մելիքյանները ՕՐՕ-ի համակիրներ են, ՕՐՕ-ն այս ամենը ներկայացնում է այնպես, իբրև հալածյալի կարգավիճակում է հայտնվել, թեև լարվածությունը ոչ թե գաղափարական է, այլ՝ անձնական։ Պարզվում է, որ Հակոբ Մելքոնյանը նախկինում հավակնել է գյուղապետ ընտրվել, բայց հաղթել է Երանոսյանի ազգականը՝ Սամվել Գալստյանը, և տարաձայնություններն սկսել են խորանալ։

Մեր տեղեկություններով՝ գործի շրջանակներում նախօրեին ձերբակալված Տիգրան Սարգսյանը գյուղապետ Սամվել Գալստյանի տեղակալն է:

Աղբյուր` Փաստինֆո