Փաստ ինֆո

ՀՀ նախկին փոխվարչապետ և պաշտպանության նախկին փոխնախարար Վահան Շիրխանյանը մարտի 27-ին թույլատրվել է տեղափոխել «Դատապարտյալների հիվանդանոց» քրեակատարողական հիմնարկ՝ բուժման շարունակականությունը և բժշկական դինամիկ հսկողությունն ապահովելու նպատակով: 

Վահան Շիրխանյանը, ով մեղադրվում է ՀՀ քրեական օրենսգրքի 223-րդ հոդվածի 2-րդ մասով, 235-րդ հոդվածի 3-րդ մասով և 35-300-րդ հոդվածի 1-ին մասով, 2015թ. դեկտեմբերի 21-ից գտնվում է կալանքի տակ, դատարանը բավարարելով նախաքննական մարմնի միջնորդությունը` նրա նկատմամբ որպես խափանման միջոց է ընտրել կալանավորումը:

Հանցավոր համագործակցության գործը 2016թ. նոյեմբերի 14-ից դատարանում է, և մինչ այսօր Շիրխանյանը դատարան չի ներկայացել, վերջինիս պաշտպան Հայկ Ալումյանը սկզբում ահազանգում էր, որ իր պաշտպանյալը երկար չի կարող նստել, կանգնել առհասարակ չի կարողանում:

Այս ողջ ընթացքում Շիրխանյանի առողջական վիճակի վերաբերյալ պաշտպան Հայկ Ալումյանը ահազանգում է, որ նրա վիճակը վատթարանում է, տեղաշարժման հետ կապված խնդիրներ ունի, անկողնային ռեժիմի հիվանդ է և ոչ թե հրաժարվում է մասնակցել դատական նիստին, այլ ի վիճակի չէ:

Եվ որպեսզի նիստերը չխափանվեն, պահանջում են, որ Շիրխանյանին պատգարակով տեղափոխեն դատարան: Շիրխանյանի առողջական վիճակի և այս ընթացքում կատարված հետազոտությունների մասին «Փաստինֆո»-ն զրուցեց ՀՀ ԱՆ քրեակատարողական վարչության հանրային կապերի բաժնի պետ Գոռ Ղլեչյանի հետ:

-Ի՞նչ բժշկական օգնություն է ցուցաբերվել վերջին շրջանում կալանքի տակ գտնվող Վահան Շիրխանյանին և արդյո՞ք ստացիոնար բուժման անհրաժեշտություն կա:

- Կալանավորված անձ Վահան Շիրխանյանի առողջական վիճակի և նրան տրամադրվող բժշկական օգնության եղանակների ու բուժման ընթացքի վերաբերյալ Քրեակատարողական ծառայությունը բազմիցս հանդես է եկել հրապարակային հայտարարություններով ու պարզաբանումներով:

Մասնավորապես, փետրվարի 23-ին Վ.Շիրխանյանը տեղափոխվել է «Էրեբունի» ԲԿ` պետության կողմից երաշխավորված անվճար բժշկական օգնության շրջանակներում ստորին վերջույթների դուպլեքս, ինչպես նաև ստացիոնար պայմաններում այլ հետազոտություններ անցնելու նպատակով: Պարզվել է, որ ստացիոնար բուժման անհրաժեշտություն չկա և մարտի 3-ին Շիրխանյանը դուրս է գրվել «Էրեբունի» ԲԿ-ից: 

-Նշեցինք, որ ըստ այդ հետազոտությունների, ստացիոնար բուժման անհրաժեշտություն չի եղել, այդ դեպքում ի՞նչպես է գնահատվել նրա վիճակը, ամբուլատոր պայմաններում բուժման անհրաժեշտությո՞ւն ևս չի եղել:

- Բժիշկների կողմից նշանակվել է դեղորայքային բուժում, խորհուրդ է տրվել շարունակել բուժումը՝ բժշկի հսկողության տակ, ինչպես նաև ցուցվել է կատարել իմունոլոգիական անալիզի որոշում` anti-CCP: Եվ ըստ նյարդավիրաբույժի` հակացուցումների բացակայության դեպքում անհրաժեշտ է կատարել նաև գոտկասրբանային հատվածի ՄՌՏ-հետազոտություն, բացի այդ նշանակվել է նաև նեղ մասնագետների կողմից հսկողություն:

-Պարոն Ղլեչյան, բացի թվարկված հետազոտությունները Քրեակատարողական վարչության կողմից ի՞նչ գործողություններ են ձեռնարկվել, քանի որ Վահան Շիրխանյանի պաշտպան Հայկ Ալումյանն այս ամիսների ընթացքում անընդմեջ ահազանգում է, որ իր պաշտպանյալի առողջական վիճակը գնալով վատթարանում է:

-Մարտի 13-ին ՀՀ ԱՆ ՔԿ վարչության կողմից գրություն է ուղարկվել ՀՀ առողջապահության նախարարություն` ռևմատոլոգի, նեյրովիրաբույժի և անգիովիրաբույժի խորհրդատվություններ կազմակերպելու համար և օրեր անց՝ մարտ 22-ին Վահան Շիրխանյանը զննվել է անգիովիրաբույժ Կ.Պետրոսյանի կողմից, որի եզրահանգմամբ նշանակվել է դինամիկ հսկողություն, աստիճանական ակտիվացում և դիկլոֆենակի քսուք, իսկ հաջորդ օրը՝ մարտի 23-ին, Շիրխանյանը զննվել է սրտաբան Հ.Հեքիմյանի կողմից: Սրտաբանի եզրահանգմամբ՝ տարվող պլանային բուժական միջամտությունների մեջ փոփոխության կարիք չի եղել:

Վահան Շիրխանյանի հետազոտությունները շարունակվել են, մարտի 24-ին պետության կողմից երաշխավորված անվճար բժշկական օգնության շրջանակներում «Երևան-կենտրոն» ՔԿՀ-ում կատարվել է ռևմատոլոգ Ե.Մելիքյանի խորհրդատվություն, որի արդյունքում Վ. Շիրխանյանի մոտ ռևմատիկ հիվանդությունների ախտաբանական նշաններ չեն եղել: Բժշկի կողմից բացառվել է նաև ռևմատոլոգի կողմից հետագա հսկողության և լրացուցիչ հետազոտությունների անհրաժեշտությունը: Նույն օրը կատարվել են նաև ՀՀ գլխավոր անգիովիրաբույժի և գլխավոր նեյրովիրաբույժի խորհրդատվությունները:

Անգիովիրաբույժի կողմից նշանակվել է դեղորայքային բուժում և քայլելու ժամանակ էլաստիկ կոմպրեսիա: Կավա-ֆիլտրի առկայությամբ ՄՌՏ հետազոտության կատարումը հնարավոր կլինի միայն թույլ հզորության սարքավորմամբ: Նեյրովիրաբույժի կողմից դեղորայքային բուժման հետ զուգահեռ նշանակվել է գոտկա-սրբանային հատվածի ՄՌՏ-հետազոտություն 0,3 տեսլա հզորությամբ սարքավորմամբ:

Ի դեպ, այս հետազոտությունը կատարելու համար ևս Քրեակատարողական ծառայությունը դիմել է Առողջապահության նախարարությանը` այն պետպատվերի շրջանակներում իրականացնելու համար:

-Ի վերջո այս բոլոր հետազոտությունների արդյունքում ի՞նչ որոշում է կայացվել՝ Վահան Շիրխանյանը շարունակելո՞ւ է գտնվել բժիշկների հսկողության ներքո:

-Հիմնվելով կատարված խորհրդատվությունների արդյունքների վրա, ինչպես նաև բուժման շարունակականությունը և բժշկական դինամիկ հսկողությունը ապահովելու նպատակով Վահան Շիրխանյանին մարտի 27-ին թույլատրվել է տեղափոխել «Դատապարտյալների հիվանդանոց» ՔԿ հիմնարկ:

Հիշեցնենք, որ երեկ Գլխավոր դատախազությունը հանդես եկավ պաշտոնական հաղորդագրությամբ որում նշվում է, որ հաշվի առնելով այն հանգամանքը, որ Վ. Շիրխանյանի առողջական վիճակի վերաբերյալ ներկայացված փաստաթղթերում առկա հետևությունների արժանահավատությունը վիճարկելու պայմաններում դրանց ստուգումը, ինչպես նաև Վ. Շիրխանյանի՝ դատական քննության ներկայանալու անհնարինության վերաբերյալ նրա պաշտպանի ներկայացրած պատճառաբանությունները կարող են հերքվել կամ հաստատվել բացառապես դատաբժշկական փորձաքննության միջոցով, ինչպես նաև հաշվի առնելով այն հանգամանքը, որ Վ. Շիրխանյանի դատաքննության չներկայանալու արդյունքում խախտվում է տվյալ գործում ներգրավված այլ ամբաստանյալների՝ ողջամիտ ժամկետում դատաքննության իրավունքը, իսկ Վ. Շիրխանյանի պաշտպանը, ի հիմնավորումն իր պաշտպանյալի բացակայության վերաբերյալ արված հայտարարությունների, փորձաքննություն նշանակելու միջնորդություն չի ներկայացնում, մեղադրող դատախազն ինքը միջնորդել է նշանակել դատաբժշկական փորձաքննություն՝ պարզելու համար Վ. Շիրխանյանի՝ դատարան ներկայանալու, դատական նիստերին մասնակցելու հնարավորությունը:

Ուստիև, դատարանը 2017 թվականի մարտի 17-ի որոշմամբ՝ մեղադրողի միջնորդությունը բավարարվել է՝ հիմք ընդունելով տվյալ գործում ներգրավված դատավարության մասնակիցների իրավունքների պաշտպանության և դատավարության բնականոն ընթացքն ապահովելու անհրաժեշտությունը:

Նշենք նաև, որ ըստ «Արմենպրես» լրատվական գործակալության, Եվրոպական դատարանը մերժել է դիմումատու Վահան Շիրխանյանի՝ 2016 թվականի սեպտեմբերի 16-ին Մարդու իրավունքների եվրոպական դատարան ներկայացրած դիմումը:

Վ. Շիրխանյանը խնդրել էր որոշում կայացնել իր նկատմամբ Դատարանի կանոնների 39-րդ կանոնով սահմանված միջանկյալ միջոց կիրառելու վերաբերյալ:

Եվրոպական դատարանը 2017 թվականի փետրվարի 9-ին ծանուցել էր ՀՀ կառավարությանը՝ պահանջելով ներկայացնել Վահան Շիրխանյանին տրամադրված բժշկական օգնությանը և սպասարկմանը վերաբերող փաստաթղթերի պատճենները, ինչը սահմանված կարգով ուղարկվել էր Եվրոպական դատարան: Արդյունքում, 2017 թվականի մարտի 24-ին Եվրոպական դատարանը, ուսումնասիրելով դիմումատու Շիրխանյանի և ՀՀ կառավարության կողմից ներկայացված նյութերը, որոշել է մերժել դիմումատուի խնդրանքը միջանկյալ միջոց կիրառելու վերաբերյալ:

Աղբյուր` Փաստինֆո