Փաստ ինֆո

Կաշառք ստանալու մեջ մեղադրվող Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի և փաստաբան Էլզա Զաքարյանի գործը մակագրվել է նոր դատավորի. այն կքննի նույն դատարանի նորանշանակ դատավոր Վաչե Մարգարյանը:

Ավելի վաղ տեղեկացրել էինք, որ գործով նախորդ դատավոր Կարեն Մարդանյանը ՀՀ Նախագահի մարտի 1-ի հրամանագրով նշանակվել է վերաքննիչ քրեական դատարանի դատավոր:

Քրեական գործով վերջին դատական նիստը կայացել է փետրվարի 9-ին, որի ժամանակ դատարանը, պաշտպանական կողմի միջնորդությունը բավարարելով, նրանց է տրամադրել գործում առկա մի շարք փաստական նյութեր՝ ձայնասկավառակների և փաստաթղթերի տեսքով:

Ըստ պաշտպանական կողմի՝ իրենց չէր տրամադրվել այդ բոլոր փաստական նյութերի օրինակները, ուստիև՝ միջնորդել էին դատարանին իրենց ևս տրամադրել:

Նկատի ունենալով, որ լազերային ձայնասկավառակները կնքված են, դատարանը որոշում էր կայացրել դրանք բացել և դատական նիստի կարգով տրամադրել պաշտպանական կողմին:

Հիշեցնենք, որ ԱԱԾ-ի կողմից օպերատիվ-հետախուզական միջոցառման արդյունքում պարզվել է, որ 2016թ. հոկտեմբերի 27-ին` ժամը 19.35-ին, Երևան քաղաքի Արշակունյաց պողոտայի և Գարեգին Նժդեհի փողոցի խաչմերուկի գետնանցումում դատավոր Իշխան Բարսեղյանը հանդիպել է քաղաքացու և վերջինիցս անձամբ ստացել 1000 ԱՄՆ դոլարը:

Իսկ հոկտեմբերի 28-ին` ժամը 01.45-ին, դատավոր Իշխան Բարսեղյանը ձերբակալվել է՝ խոշոր չափերով կաշառք ստանալու կասկածանքով:

Այսպիսով, Հատուկ քննչական ծառայությունը հարուցել է քրեական գործ, որի շրջանակներում դատավոր Իշխան Բարսեղյանին մեղադրանք է առաջադրվելով ՀՀ քրեական օրենսգրքի 311-րդ հոդվածի 4-րդ մասի 3-րդ կետով:

Ելնելով դատավորի կարգավիճակից, որ նա կարող է որոշակի ազդեցություն ունենալ մինչդատական վարույթում գործի օբյեկտիվ քննության վրա, նախաքննական մարմնի կողմից դատավորի նկատմամբ խափանման միջոց կալանավորումն ընտրելու վերաբերյալ միջնորդությունը բավարարվել է:

Քրեական գործով մեղադրանք է առաջադրվել նաև փաստաբան Էլզա Զաքարյանին՝ ՀՀ քրեական օրենսգրքի 313-րդ հոդվածի 1-ին մասով, և նրա նկատմամբ որպես խափանման միջոց է կիրառվել՝ չհեռանալու մասին ստորագրությունը:

Աղբյուր` Փաստինֆո