Փաստ ինֆո

Ծանոթ տղամարդու միջոցով սկեսուրի տան վրա ավազակային հարձակման գործով Արագածոտնի մարզային դատարանը կայացրել է մեղադրական դատավճիռ:

Ծանոթը՝ Մհեր Շահվերդյանը, մեղավոր է ճանաչվել Հայաստանի Հանրապետության քրեական օրենսգրքի 175-րդ հոդվածի 2-րդ մասի 3-րդ և 4-րդ կետերով՝ բնակարան ապօրինի մուտք գործելով, զենքի կամ որպես զենք օգտագործվող այլ առարկաների գործադրմամբ ավազակություն, և դատապարտվել ազատազրկման` 6 տարի 6 ամիս ժամկետով` առանց գույքի բռնագրավման:

Իսկ հարսը՝ Տաթևիկ Գրիգորյանը, մեղավոր է ճանաչվել Հայաստանի Հանրապետության քրեական օրենսգրքի 38-175-րդ հոդվածի 2-րդ մասի 3-րդ կետով՝ բնակարան ապօրինի մուտք գործելով ավազակությանն օժանդակելը, և դատապարտվել ազատազրկման` 6 տարի ժամկետով` առանց գույքի բռնագրավման:

Ըստ մեղադրանքի, Մհեր Շահվերդյանը 2016թ. օգոստոսի 1-ին նախնական համաձայնության է եկել իր ծանոթ, Թալին քաղաքի բնակիչ Տաթևիկ Գրիգորյանի հետ վերջինիս ամուսնու մորից վերջինիս կյանքի կամ առողջության համար վտանգավոր բռնություն գործադրելով զգալի չափի՝ 500.000 ՀՀ դրամ գումար հափշտակելու և այդ արարքը կատարելու նպատակով Տաթևիկ Գրիգորյանի կողմից իրեն օժանդակելու հարցում:

2016թ. օգոստոսի 2-ին ժամը 02.30-ի սահմաններում գնացել են ամբաստանյալի սկեսուրի առանձնատան մոտ և փորձել փողոցի կողմից մուտքի դռնով ապօրինի մուտք գործել առանձնատուն, սակայն դուռը փակ լինելու պատճառով չեն կարողացել մուտք գործել: Ապա հարսի խորհրդով գնացել են սկեսուրի առանձնատան հետևում գտնվող հողամասի մոտ, որտեղ Տաթևիկ Գրիգորյանի մատնացույց արած դռնակով, այնուհետև մուտքի բաց դռնով ապօրինի մուտք են գործել սկեսուրի առանձնատուն: Հարսը սպասել է առանձնատան ավտոտնակի դռան մոտ, իսկ Մհեր Շահվերդյանը, մտել է կնոջ ննջարան ու հարձակվել է անկողնում գտնվող կնոջ վրա:

Վերջինիս կյանքի համար վտանգավոր բռնություն գործադրելով՝ ձեռքերով փակել է բերանը և սեղմել պարանոցին, որի հետևանքով դիտավորությամբ կնոջը պատճառել է առողջության թեթև վնասի հատկանիշեր չպարունակող մարմնական վնասվածքներ աջ և ձախ թշային շրջանների արյունազեղումների ձևով: Հարձակման ընթացքում Մհեր Շահվերդյանը սպառնացել է աղմուկ բարձրացնելու դեպքում կյանքից զրկել կնոջն ու նրա ամուսնուն, ննջարանից վերցրած հաղորդալարերով կապկպել է կնոջը, նույն վայրից վերցրած հագուստով կապել է նրա դեմքը, ննջարանում եղած պահարանից և սառնարանի վրայից հափշտակել է 345.000 ՀՀ դրամ ընդհանուր արժեքի 205.000 ՀՀ դրամ և 20.000 ՌԴ ռուբլի գումար: Ապա կատարելով հանցակցության սահմանազանցում, առանձնատնից վերցրած, որպես զենք օգտագործվող առարկա հանդիսացող տնտեսական դանակի գործադրմամբ՝ պահելով այն կնոջ պարանոցին, փորձել է հափշտակել նաև կնոջ ձեռքին եղած, 33.000 ՀՀ դրամ արժեքի ոսկյա մատանին, սակայն իր կամքից անկախ հանգամանքներով չի կարողացել, քանի որ չի կարողացել մատանին հանել կնոջ մատից և հեռացել է:

Դատաքննությունը ամբաստանյալների միջնորդությամբ անց է կացվել արագացված կարգով՝ ամբաստանյալները հայտարարել են, որ առաջադրված մեղադրանքում իրենց մեղավոր են ճանաչում, մեղադրողն ու տուժողը չեն առարկել արագացված կարգ կիրառելու դեմ:

Դատարանն որպես Մհեր Շահվերդյանի անձը բնութագրող տվյալներ հաշվի է առել, որ նա դատվածություն չունի և զղջում է կատարածի համար, իսկ որպես Տաթևիկ Գրիգորյանի անձը բնութագրող տվյալներ, պատասխանատվությունը և պատիժը մեղմացնող հանգամանքներ, հաշվի է առել, որ նա նախկինում դատված չի եղել, խնամքի տակ են գտնվում 14 տարին չլրացած երեք երեխաները, բնութագրվում է դրական, զղջում է կատարածի համար:

Աղբյուր` Փաստինֆո