Փաստ ինֆո

Գեղարքունիքի մարզի ընդհանուր իրավասության դատարանը Սասուն Կարապետյանին մեղավոր է ճանաչել ՀՀ քրեական օրենսգրքի 104-րդ հոդվածի 1-ին, 235-րդ հոդվածի 1-ին և 268-րդ հոդվածի 1-ին մասերով, այն է՝ սպանություն, ապօրինի կերպով ձեռք բերված զենք-ռազմամթերք կրելը և առանց իրացնելու նպատակի թմրամիջոցի ապօրինի շրջանառություն: Սասուն Կարապետյանն ընդհանուր առմամբ դատապարտվել է 10 տարվա ազատազրկման:

Ս.Կարապետյանից հօգուտ քաղաքացիական հայցվորների պետք է բռնագանձվի 2.000.000 ՀՀ դրամ՝ որպես հուղարկավորության և դրա հետ կապված ծախսերի փոխհատուցման գումար:
Իսկ ամբաստանյալ Սարգիս Գալստյանը մեղավոր է ճանաչվել ՀՀ քրեական օրենսգրքի 334-րդ հոդվածի 1-ին մասով՝ հանցագործությունը պարտակելը, և դատապարտվել ազատազրկման 2 տարի 2 ամիս ժամկետով:

Նկատի ունենալով, որ Սարգիս Գալստյանը 20.11.2014 թվականից գտնվել է արգելանքի տակ և նշանակված պատիժը փաստացի կրել է, դատարանը դատավճռով վերացրել է նրա նկատմամբ ընտված խափանման միջոց կալանավորումը և Սարգիս Գալստյանին անհապաղ ազատել կալանքից՝ դատական նիստի դահլիճում:
Իրեղեն ապացույց ճանաչված «ԱԿ-74» տեսակի 5,45մմ տրամաչափի ինքնաձիգն իր պահունակով, որը գտնվում է ՀՀ ոստիկանության ՓՔ վարչությունում, դատավճիռն օրինական ուժի մեջ մտնելուց հետո, պետք է թողնվի վերջինիս տնօրինմանը:

Ըստ մեղադրանքի, Սասուն Կարապետյանը 2014 թվականի հոկտեմբերի 12-ին ժամը 16.20-ի սահմաններում Վարդենիս քաղաքի Վազգեն Սարգսյան փողոցում գտնվող անվադողերի վերանորոգման կետի մոտ, Վարդենիս քաղաքի բնակիչ՝ Արման Մանուկյանի կողմից, իր ընկերոջ Սարգիս Գալստյանի դեմքի շրջանին հարվածելուց և նույն օրը ժամը 16.30-ի սահմաններում Արման Մանուկյանի կողմից իրեն ձեռքով հարվածելուց, ապա փայտով իր «ԲՄՎ» մակնիշի առանց հաշվառման համարանիշի ավտոմեքենային հարվածելուց վիրավորված, նույն օրը ժամը 17-ի սահմաններում, որպես հատուցում Արման Մանուկյանի կողմից իրեն պատճառված անպատվությանը, ապօրինի կրելով իր կողմից ապօրինի ձեռք բերված և պահած հրազեն հանդիսացող «ԱԿ-74» տեսակի ինքնաձիգը` լիցքավորված ռազմամթերք հանդիսացող փամփուշտով, հանդիպել է ընկերոջը՝ Սարգիս Գալստյանին, այնուհետև վերջինիս անձնական օգտագործման «Մերսեդես» մակնիշի ավտոմեքենայով, առջևի աջ նստատեղին նստելով, միասին գնացել են Արման Մանուկյանի բնակության վայր: Այնտեղ ցուցադրաբար ավտոմեքենան կայանել են Գրիշա Մանուկյանի բնակարանից շուրջ 150 մետր հեռավորության վրա, ինչը նկատելով Գրիշա Մանուկյանը, Արման Մանուկյանը և նրանց ընկերները, Գրիշա Մանուկյանի վարած «Նիվա» մակնիշի ավտոմեքենայով մոտեցել ու կանգնել են Սարգիս Գալստյանի ավտոմեքենայի դիմաց: Սասուն Կարապետյանն ապօրինաբար Արման Մանուկյանին կյանքից զրկելու դիտավորությամբ վերցնելով «ԱԿ-74» տեսակի ինքնաձիգը մեքենայի առջևի աջ նստատեղից իջել և մոտեցել է «Նիվա» մակնիշի ավտոմեքենայի առջևի աջ նստատեղում նստած Արման Մանուկյանին, հայհոյել ու ինքնաձիգի փողն ուղղելով Արման Մանուկյանի կրծքավանդակի ուղղությամբ կրակոց է արձակել և ապօրինաբար Արման Մանուկյանին պատճառել հրազենային, գնդակային, թափանցող միջանցիկ մահացու վնասվածք, ապա ինքնաձիգը ձեռքին արագ մոտեցել է իրեն արդեն իսկ սպասող Սարգիս Գալստյանի ավտոմեքենայի առջևի աջ նստատեղի բաց դռանը, նստել ավտոմեքենայի առջևի աջ նստատեղին և Սարգիս Գալստյանի հետ դիմել է փախուստի` իրենց հետ տանելով ինքնաձիգը:

Իսկ Արման Մանուկյանին եղբայրը` Գրիշա Մանուկյանը տեղափոխել է Վարդենիսի հոսպիտալ, որտեղ Արման Մանուկյանը ժամը 18.05-ին ընդունվել է մահացած վիճակում:

Դրանից բացի, Սասուն Կարապետյանն առանց իրացնելու նպատակի ապօրինի ձեռք է բերել և իրենց բնակարանի ննջասենյակի պատուհանագոգին ապօրինի պահել է 0.95 գրամ հաստատուն քաշով «Մարիխուանա» տեսակի թմրամիջոց, որը 2014 թվականի հոկտեմբերի 14-ին ժամը 11-ին կատարված խուզարկության ընթացքում նշված վայրից հայտնաբերվել է ոստիկանության աշխատակիցների կողմից:

Դատարանը եզրահանգել է, որ ոչ Սարգիս Գալստյանին առաջադրված մեղադրանքում, ոչ մեղադրական եզրակացության նկարագրական մասում նկարագրված չէ, որ Սարգիս Գալստյանը՝ հանդիպելով Սասուն Կարապետյանին, վերջինիցս տեղեկացել է, որ նա ցանկանում է սպանել Արման կամ Գրիշա Մանուկյաններին ու գիտակցաբար օժանդակել է Սասուն Կարապետյանին՝ խոստանալով նրան իր ավտոմեքենայով տանել Արման կամ Գրիշա Մանուկյանների մոտ, որպեսզի Սասուն Կարապետյանը կատարի սպանությունը:
Հակառակը մեղադրական եզրակացության մեջ՝ նկարագրական մասում նշված է, որ Սարգիս Գալստյանը և Սասուն Կարապետյանը հանդիպելով ընդամենը որոշել են դարձյալ հանդիպել Արման Մանուկյանին:

Ամբաստանյալների համաձայնությունը, պայմանավորվածությունը, համաձայն մեղադրանքի, եղել է ընդամենը հանդիպման գնալու շուրջ, որևէ մեկին սպանելու, վնասելու, ծեծելու մտադրություն, դիտավորություն, համաձայնություն, համաձայն մեղադրանքի, Սասուն Կարապետյանի և Սարգիս Գալստյանի միջև չի եղել:

Ինչպես նախաքննությամբ, այնպես էլ դատաքննությամբ չի հիմնավորվել ամբաստանյալ Սարգիս Գալստյանի կողմից ՀՀ քրեական օրենսգրքի 38-104-րդ հոդվածի 1-ին մասով՝ սպանությանն օժանդակել, նախատեսված հանցավոր արարք կատարելու հանգամանքը: Սակայն դատաքննությամբ հիմնավորվել է, որ ամբաստանյալ Սարգիս Գալստյանը կատարել է հանցավոր արարք՝ նախատեսված է ՀՀ քրեական օրենսգրքի 334-րդ հոդվածի 1-ին մասով՝ հանցագործությունը պարտակելը: Ուստի դատարանը գտել է, որ վերջինիս արարքը ՀՀ քրեական օրենսգրքի 38-104-րդ հոդվածի 1-ին մասից պետք է վերաորակել ՀՀ քրեական օրենսգրքի 334-րդ հոդվածի 1-ին մասով:

Ամբաստանյալ Սասուն Կարապետյանի պատճառաբանությունն այն մասին, որ ինքը տուժող Արման Մանուկյանին դիտավորությամբ կյանքից չի զրկել, այլ կատարել է անզգույշ սպանություն, դատարանը անհիմն է համարել:

Ըստ դատարանի վերլուծությունների, քաղաքացիական հայցվորները չեն ներկայացրել որևէ գրավոր ապացույց հանգուցյալ Արման Մանուկյանի հուղարկավորության հետ կապված ծախսերի վերաբերյալ, հետևաբար դատարանը գտել է, որ 4.500.000 ՀՀ դրամի ներկայացրած հուղարկավորության ծախսերից Սասուն Կարապետյանից պետք է բռնագանձվի ողջամիտ գումար՝ 2.000.000 ՀՀ դրամի չափով, որպես հուղարկավորության և դրա հետ կապված ծախսերի փոխհատուցման գումար:

Աղբյուր` Փաստինֆո