Փաստ ինֆո

Կաշառք ստանալու մեջ մեղադրվող Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի և փաստաբան Էլզա Զաքարյանի գործով այսօրվա դատական նիստը տեղի չունեցավ. նիստը նախագահող դատավոր Կարեն Մարդանյանը մեկ այլ գործով խորհրդակցական սենյակում է:

Հիշեցնենք, որ դատարանը բավարարել էր դատավոր Իշխան Բարսեղյանի պաշտպանների միջնորդությունը՝ գործում եղած մի շարք փաստական նյութեր նրանց տրամադրելու վերաբերյալ և նախորդ դատական նիստում կողմերին ժամանակ էր տրամադրվել դրանց ծանոթանալու համար:

Հիշեցնենք նաև, որ ԱԱԾ-ի կողմից օպերատիվ-հետախուզական միջոցառման արդյունքում պարզվել է՝ հոկտեմբերի 27-ին` ժամը 19.35-ին, Երևան քաղաքի Արշակունյաց պողոտայի և Գարեգին Նժդեհի փողոցի խաչմերուկի գետնանցումում դատավոր Իշխան Բարսեղյանը հանդիպել է քաղաքացուն և վերջինիցս անձամբ ստացել 1000 ԱՄՆ դոլարը:

Իսկ հոկտեմբերի 28-ին` ժամը 01.45-ին, դատավոր Իշխան Բարսեղյանը ձերբակալվել է՝ խոշոր չափերով կաշառք ստանալու կասկածանքով:

Այսպիսով, Հատուկ քննչական ծառայությունը հարուցել է քրեական գործ, որի շրջանակներում դատավոր Իշխան Բարսեղյանին մեղադրանք է առաջադրվելով ՀՀ քրեական օրենսգրքի 311-րդ հոդվածի 4-րդ մասի 3-րդ կետով:

Ելնելով դատավորի կարգավիճակից, որ նա կարող է որոշակի ազդեցություն ունենալ մինչդատական վարույթում գործի օբյեկտիվ քննության վրա, նախաքննական մարմնի կողմից դատավորի նկատմամբ խափանման միջոց կալանավորումն ընտրելու վերաբերյալ միջնորդությունը բավարարվել է:

Քրեական գործով մեղադրանք է առաջադրվել նաև փաստաբան Էլզա Զաքարյանին՝ ՀՀ քրեական օրենսգրքի 313-րդ հոդվածի 1-ին մասով, և նրա նկատմամբ որպես խափանման միջոց է կիրառվել՝ չհեռանալու մասին ստորագրությունը:

Աղբյուր` Փաստինֆո