Փաստ ինֆո

ԱՄՆ նախագահ Բարաք Օբաման երեքշաբթի երեկոյան հանդես է եկել վերջին՝ որպես պետության ղեկավար, ամերիկացիներին ուղղված ուղերձ-խոսքով՝ ամփոփելով իր ութամյա նախագահության արդյունքները:

Ինչպես հաղորդում է «ՌԻԱ Նովոստի»-ն, Օբամայի կարծիքով, արդյունքները շատ դրական են. ընդհանուր ջանքերի շնորհիվ «Ամերիկան ավելի լավ ու ավելի ուժեղ է դարձել», քան եղել է 2009թ.:

Գլխավոր միտքը, որ փորձում էր հասցնել համերկրացիներին հեռացող նախագահը, «ամերիկյան ժողովրդավարության մեծությունն» ու ներքին ու արտաքին սպառնալիքներից այն պաշտպանելու անհրաժեշտությունն էր: Վերջիններից են «իսլամական ֆանատիկոսներն» ու «որոշ արտասահմանյան մայրաքաղաքներում ինքնակալները»:

Ռուսաստանին ու Չինաստանին Օբաման անվանել է Միացյալ Նահանգների մրցակիցներ, որոնք, սակայն, չեն կարող համեմատվել ԱՄՆ-ի հետ աշխարհում ազդեցության աստիճանով:

Հունվարի 20-ին Օբամայի փոխարեն նախագահի պաշտոնը կզբաղեցնի նրա գլխավոր քաղաքական ընդդիմախոսներից մեկը՝ հանրապետական Դոնալդ Թրամպը: Նոյեմբերին մինչ այդ ընտրովի պաշտոններ չզբաղեցրած միլիարդատեր Դոնալդ Թրամփը հաղթել է նախագահական ընտրություններում՝ զիջելով Դեմոկրատական կուսակցությունից իր մրցակցուհի Հիլլարի Քլինթոնին ընտրողների ձայների թվով, սակայն գերազանցելով նրան ընտրիչների ձայներով:

Օբաման չի համաձայնել ԱՄՆ ընտրված նախագահի կարծիքի հետ, թե ազատ առևտրի համաձայնագրերը կհանգեցնեն աշխատատեղերի կորստի: «Ես համաձայն եմ, որ մեր առևտուրը պետք է լինի ոչ պարզապես ազատ, այլ նաև ազնիվ: Սակայն տնտեսական աղետների հաջորդ ալիքը կգա ոչ արտասահմանից: Այն կլինի մեքենայացման արագ ընթացքի արդյունքը, որը վերացնում է միջին դասի մակարդակի շատ լավ աշխատատեղեր»,- ասել է գործող նախագահը:

Դա Տրանսխաղաղօվկիանոսյան գործընկերության համաձայնագրից դուրս գալու Թրամփի առաջարկի ուղիղ պատասխանն էր, որը փաստորեն կթաղի մի քանի տարի Օբամայի կողմից առաջ քաշվող գաղափարը:

Էլ ավելի մեծ կրքոտությամբ հեռացող նախագահը պաշտպանել է իր գլխավոր «զավակին»՝ առողջապահության բարեփոխումը, որը հնարավորություն է տվել միլինավոր աղքատ ամերիկացիներին բժշկական ծառայություններին հասանելիություն ունենալ, սակայն շատ ուրիշների համար այդ ծառայությունները դարձրել են ավելի թանկ, ինչպես հաստատում են հանրապետականները:

«Չապահովագրված ամերիկացիների թիվը երբեք ավելի քիչ չի եղել, քան հիմա: Առողջապահության արժեքը աճում է ամենադանդաղ տեմպերով 50 տարվա ընթացքում: Եթե որևէ մեկը կկարողանա ծրագիր ներդնել, որը կլինի ավելի լավը, քան այն փոփոխությունները, որ մենք կատարել ենք մեր առողջապահական համակարգի հետ, որը կկարողանա նույնքան մարդկանց ներառել ավելի քիչ արժեքով, ես հրապարակավ կպաշտպանեմ այն»,- խոստացել է Օբաման:

Աղբյուր` Փաստինֆո