Փաստ ինֆո

Ղրղզստանի քաղաքացի Յահիե Մաշրափովը, ում մեղադրում էին Ստամբուլում ահաբեկչական ակտին մասնակցելու մեջ, մտադիր չէ թուրքական ԶԼՄ-ների դեմ դատարան դիմել, սակայն պահանջում է պատիվն արատավորող ոչ հավաստի տեղեկությունների հերքում: Այս մասին նա հայտնել է Ինտերֆաքսին:

«Թուրքական ԶԼՄ-ները տարածել են իմ անձնագրի լուսանկարը և գրում են, որ ես մասնակցել եմ ահաբեկչական ակտին, ինչպես կարելի է մերկապարանոց ասել ու գրել: Չէ՞ որ թուրքական ոստիկանությունն ինձ հարցաքննել է և համոզվել, որ ես ոչ մի ահաբեկչական ակտի չեմ մասնակցել»:

Ըստ նրա, ինքը ժամանել է Ստամբուլ դեկտեմբերի 28-ին և դեկտեմբերի 30-ին արդեն մեկնել հետ՝ Ղրղզստան: «Հարազատների ու ընկերների հետ Նոր տարին տոնելուց հետո հունվարի 1-ին՝ ապրանք գնելով, նորից մեկնել եմ Ստամբուլ, վերադարձել եմ հունվարի 3-ին: Այդ օրը, երբ ես նստել եմ ինքնաթիռ, ինձ մոտեցել են երկու հոգի և խնդրել դուրս գալ անձնագրի հետ միասին: Երբ դուրս եմ եկել, տեսել եմ մոտ 20 մարդու, որոնց թվում կային և ոստիկաններ և քաղաքացիական հագուստով մարդիկ»,- նշել է Մաշրափովը:

«Նրանք ստուգել են անձնագիրս, հարցաքննել, լուսանկարել ինձ ու իմ անձնագիրը: Հետո ներողություն խնդրել ու ասել, որ սխալվել են, ինձ նորից նստեցրել ինքնաթիռ, որից հետո մենք Ստամբուլից մեկնել ենք Բիշկեկ՝ մեկ ժամ ուշացումով»:

Հունվարի 3-ին Մաշրափովը՝ ժամանելով Ղրղզստան, հարցաքննվել է հանրապետության իրավապահ մարմինների կողմից: Ահաբեկչական ակտին նրա մասնակցության ապացույցների բացակայության հետ կապված նա ազատ էր արձակվել:

Թուրքական ուժայինների կողմից Մաշրափովը ստուգում անցել էր մինչև Ստամբուլից Բիշկեկ թռչելը: Ինչպես պարզվել է, նա հետախուզվող ահաբեկչի ֆոտոռոբոտին է նման եղել:

Ղրղզստանի ԱԳՆ-ն պատրաստակամություն է հայտնել աջակցել Թուրքիայի իրավապահ մարմիններին ահաբեկչական ակտին մասնակցելու մեջ կասկածյալի որոնման մեջ և կոչ է արել ԶԼՄ-ներին պահպանել անմեղության կանխավարկածի սկզբունքը՝ ահաբեկչական ակտերի հետ կապված դեպքերը լուսաբանելիս:

Աղբյուր` Փաստինֆո