Փաստ ինֆո

Թուրքական լիրան շարունակում է արժեզրկվել դոլարի նկատմամբ: Այս պահին լիրա-դոլար հարաբերությունը նոր ռեկորդային ցուցանիշի է հասել՝ 1 դոլար - 3.47 լիրա: 2016թ. տարեսկզբի համեմատ լիրան արժեզրկվել է 19 տոկոսով: Այս մասին տեղեկանում ենք Ermenihaber.am-ից:

BBC Türkçe-ի համաձայն՝ դոլարի թանկացման արդյունքում Թուրքիան նաև մեծ  կորուստներ է կրել փոխարժեքների տարբերության պատճառով:

Թուրքիայի կենտրոնական բանկի կողմից հայտարարված միջազգային ներդրումային դիրքի բացասական արժեքը լիրայի արեզրկման պատճառով էապես մեծացել է:

2016թ. սեպտեմբերին Թուրքիայի արտաքին կապիտալը կազմում էր 221.3 մլրդ դոլար, իսկ արտաքին պարտավորությունները՝ 610.9 մլրդ դոլար: Դա նշանակում է, որ սեպտեմբերի վերջի դրությամբ Թուրքիայի միջազգային ներդրումային դիրքի բացասական մեծությունը կազմել է 389.6 մլրդ դոլար: Լիրայի առկա (3.47) փոխարժեքի համաձայն դա  կազմում է  1.354.000.000.000 լիրա:

Իսկ եթե 2016թ. տարեսկզբին առկա լիրայի փոխարժեքը (1 դոլար- 2.92 լիրա) պահպանվեր ողջ տարվա ընթացքում, ապա սեպտեմբերին Թուրքիայի միջազգային ներդրումային դիրքի բացասական մեծությունը կկազմեր 1.138.000.000.000 լիրա:

Այսինքն, տարեսկզբից մինչ օրս Թուրքիայի արտաքին ներդրումային դիրքում միայն տարադրամի փոխարժեքի փոփոխության պատճառով հասցված վնասի չափը կազմում է 216 մլրդ լիրա:

Ըստ աղբյուրի՝ թուրքական լիրայի փոխարժեքի անկումը պայմանանվորված է մի շարք գործոններով: Դրանցից են .

- Այն հավանականությունը, որ 2017թ.  գարնանը Թուրքիայում հանրաքվե կարող է անցկացվել:

- ԱՄՆ-Թուրքիա հարաբերություններում առկա լարվածությունը:

- Այն հանգամանքը, որ Թուրքիայում հայտարարված արտակարգ դրությունը շարունակվում է և դեռ կարող է երկար շարունակվել:

Աղբյուր` Փաստինֆո