Փաստ ինֆո

Ակնհայտ է, որ կոնկրետ Անդրիաս Ղուկասյանի պարագայում կա հստակ հետապնդում՝ կապված նրա քաղաքական հայացքների հետ: Այս մասին լրագրողների հետ այսօրվա հանդիպմանը հայտարարել է զանգվածային անկարգություններ կազմակերպելու մեջ մեղադրվող Ա.Ղուկասյանի պաշտպան Ինեսսա Պետրոսյանը: Նա հավելել է, որ շուրջ երեք ամիս է իր պաշտպանյալը գտնվում է անազատության մեջ, իսկ դատարաններն էլ քաղաքական պատվեր են կատարում, չեն բավարարում նույնիսկ գրավ կիրառելու պաշտպանական կողմի միջնորդությունները:

Եվ դա այն դեպքում, որ ակնհայտ է, որևէ զանգվածային անկարգություն կազմակերպելու մասին խոսք չէր էլ կարող գնալ, ուղղակի «ոստիկանության շինծու ցուցմունքների հիման վրա կազմվեցին այդ անհիմն և ապօրինի մեղադրանքները»:

«Կարծես իրենց համար կյանքի և մահու խնդիր լինի, որ Անդրիաս Ղուկասյանը պետք է գտնվի անազատության մեջ»,- հայտարարել է Ինեսսա Պետրոսյանը։

Պաշտպանը նկատել է, որ երկու այլ մեղադրյալների պարագայում նրանց անգամ հնարավորություն է տրվում արտերկրում վերապատրաստվել, ինչը շատ ողջունելի է: «Բայց միևնույն ժամանակ անհասկանալի է մեր պաշտպանյալ Ղուկասյանի նկատմամբ այդ վերաբերմունքը, հետապնդումը։ Աստեղ կա խնդիր՝ կոնկրետ Անդրիաս Ղուկասյանին պահել ապօրինի անազատության մեջ»,- ասել է Ի.Պետրոսյանը։

Պաշտպանը հայտնել է, որ շուտով Ա.Ղուկասյանի գործի հետ կապված իրենք գանգատ են ներկայացնելու Մարդու իրավունքների եվրոպական դատարան՝ հստակ է, որ տեղի են ունեցել Մարդու իրավունքների եվրոպական կոնվենցիայի խախտումներ։

Աղբյուր` Փաստինֆո