Փաստ ինֆո

Վարուժան Սուքիասյանի որոշակի անսպասելի հրաժարականն իրարանցում առաջացրեց հայկական ֆուտբոլում: Արդեն քննարկվում են տարբեր մասնագետների անուններ:

Armsport.am-ի հետ զրույցում իրավիճակի, գլխավոր մարզչի տարբերակների մասին խոսել է հավաքականի նախկին ֆուտբոլիստ Ռազմիկ Գրիգորյանը.

«Ընտրական փուլի անհաջող մեկնարկից և Ռումինիայից կյրած 0:5 հաշվով պարտությունից հետո կարելի էր սպասելի համարել Սուքիասյանի հրաժարականը, սակայն ոչ Լեհաստանի հետ հանդիպումից հետո: Գուցե մարզիչը սպասեց, որ հավաքականը նման մարտունակ և պայքարի միտված ֆուտբոլ ցուցադրի, նոր միայն հրաժարական տա:

Ցանկացած մարզիչ մեղավոր է պարտությունների հարցում: Հաղթում է թիմը, պարտվում՝ մարզիչը: Այստեղ անձի խնդիր չկա, հարկավոր է խոսել փաստերով: Պետք է այս հարցում իրերն իրենց անուններով կոչել: Վառ օրինակ է Վարդան Մինասյանը. նրան գրեթե բոլորը սիրում էին, սակայն 1-2 անհաջող խաղ և ամեն ինչ փոխվեց: Նույնը պատահեց Սուքիասյանի հետ, քանի որ պարտությունները հաջորդեցին միմյանց:

Տեսնում ենք, որ հայկական ֆուտբոլում գլոբալ խնդիրներ կան, իսկ մենք ընկել ենք մանր բաների հետևից, այս կամ այն ֆուտբոլիստին հրավիրել-չհրավիրելով ենք զբաղված: Ազգային հավաքականը չպետք է մանկապարտեզ դարձնել:

Ես որոշ առումներով հասկանում եմ երկրպագուներին, ովքեր արդյունք են ցանկանում: Միայն թե նրանք չպետք է անցնեն անձնական վիրավորանքների սահմանը»:

Խոսելով Հայաստանի ազգային թիմի նոր գլխավոր մարզչի ընտրության մասին՝ Գրիգորյանն ասաց.

«Գտնում եմ այս իրավիճակում պետք է տեղացի գլխավորի հավաքականը: Արտասահմանցի մասնագետի դեպքում պետք է կարողանանք տրամադրել տարեկան 3-4 միլիոն եվրո աշխատավարձ, բայց դրան այնպես չէ, որ արդյունքի հարցը կլուծվի: Կա Ռուսաստանի օրինակը. տարեկան 8 միլիոն եվրո աշխատավարձով մասնագետը չգոհացրեց:

Հակված եմ Աբրահամ Խաշմանյանի տարբերակին: Նա իր աշխատած բոլոր թիմերում արդյունք է ցույց տվել: Պետք չէ մոռանալ նաև Վարդան Մինասյանին, ում աշխատանքի տարիներին մենք վառ ֆուտբոլ էինք տեսնում, ձեռագիր կար. իր հետ է կապված մի քանի տարի առաջվա վերելքը:

ՀՖՖ-ն պետք է ընտրի ամենաօպտիմալ տարբերակը: Ըստ իս՝ պետք է հաշվի առնվեն 3 կարևոր հատկություններ: Հոգեբանական առումով հարկավոր է լավագույնս պատրաստել թիմին, գրագետ լինել տակտիկա ընտրելիս: Ամենակարևորն այն է, որ միայն հավաքականի մարզիչը որոշումներ կայացնի, որովհետև վերջում ինքն է գլխավոր պատասխանատուն: Օգնականները և ֆուտբոլիստները մղվելու են 2-րդ պլան, ամփոփելու է մարզիչը»:

Աղբյուր` armsport.am