Փաստ ինֆո

Մատուցողուհու սպանության աղմկահարույց գործով այսօր դատարանը բավարարեց ամբաստանյալ Դավիթ Թամրազյանի պաշտպան, փաստաբան Կրոմվել Գրիգորյանի միջնորդությունը լրացուցիչ վկաներ հրավիրելու ու հարցաքննելու մասին:

Վկաները տուժող Մարիամի հետ նույն բնակարանում համատեղ բնակված Արաքսյան է, Դավիթ Թամրազյանի դեմ ցուցմունքներ տված նրա ընկերուհի, գործով առանցքային վկա Միլենայի մայրը և ամբաստանյալի մայրն ու քույրը:

Ինչպես «Փաստինֆո»-ի լրագրողի հետ զրույցում նշեց Կրոմվել Գրիգորյանը, մասնավորապես, Արաքսյայի ցուցմունքներով հերքվում է շարժառիթի վերաբերյալ քննության վարկածը:

Վարույթն իրականացնող մարմինը ողջ նախաքննության ընթացքում ամբաստանյալի ընկերուհիներ՝ տուժող Մարիամի ու Միլենայի միջև միջադեպը փորձել է ներկայացնել որպես Դավիթ Թամրազյանի ու տուժողի միջև միջադեպ, և որպես սպանության շարժառիթ նշել վրեժը՝ իբրև թե միջադեպի օրը Մարիամը Դավիթի մոր հասցեին անվայել բառեր է ասել:

Սակայն նույն այդ վարույթն իրականացնող մարմինը նախաքննության ընթացքում հարցաքննել է Արաքսյային, ով ներկա է եղել միջադեպին՝ դա դատաքննության ժամանակ հաստատել են թե՛ Միլենան և թե՛ Դավիթ Թամրազյանը: Նախաքննության ընթացքում Արաքսյան իր ցուցմունքում հայտնել է, որ Դավիթը կանգնած էր դրսում, իսկ քննիչի այն հարցին, թե Դավիթի կամ նրա մոր հասցեին որևէ անվանարկող բան լսել եք, վկան հայտնել է, որ ոչ, չի լսել, անվանարկող բառ եղել է Միլենայի հասցեին: Վկան, որի ցուցմունքներով հերքվում է շարժառիթը, չի էլ դատակոչվել, նշեց պաշտպանը:

Կ.Գրիգորյանն ընդգծեց, որ դատահոգեբուժական փորձաքննությամբ Դավիթը նորմալ անձնավորություն է, վկայի հարցաքննությամբ շարժառիթը դուրս է գալիս, իսկ առանց շարժառիթի հնարավոր չէ, որ նորմալ մարդը գնա ու մարդ սպանի:

Առանցքային վկա Միլենան ու նրա մայրը իրար հակասող ցուցմունքներ են տվել: Դատաքննության ժամանակ պաշտպանի հարցին, թե ինչպես է եղել, որ իմացել եք, որ Դավիթը Մարիամին սպանել է և նրան որպես Ձեզ ուզող տղայի կանչել եք Ձեր տուն, Միլենան հայտնել է, որ նման բան չի եղել: Ըստ Միլենայի, Դավիթն ու իր հարազատները իրենց տուն են եկել ընդամենն իրեն շնորհակալություն հայտնելու, որ իրենց տղային պաշտպանել է: Մինչդեռ Միլենայի մայրը ՀՔԾ-ում սույն գործի հետ կապված ցուցմունք է տվել, ըստ որի իր միջոցով Միլենան է հրավիրել Դավիթին՝ «որպես իմ աղջկան ուզող տղայի»: «Այսինքն՝ այն վարկածը, որ Դավիթը «Վալնա» բարում պատմել է, որ ինքն է սպանել Մարիամին, այդ հեքիաթը վերանում է: Եթե դու իմացել ես, որ նա է սպանել, մորդ ասեիր, որ այս մարդասպանին ոնց ես ասում, որ որպես ինձ ուզող տղայի կանչեմ: Ո՞նց են բոլորի ներկայությամբ սեղանի շուրջ նստած ամուսնության առաջարկ արել Դավիթին»,- ասաց փաստաբանը:

Կրոմվել Գրիգորյանը գտնում է, որ եթե Դավիթը հեռատես լիներ, չէր մերժի ամուսնության առաջարկը, մի երկու ամսից կասեր՝ դու գնա քո, ես՝ իմ ճանապարհով, և նա Դավիթի դեմ ցուցմունք չէր տա:

Ըստ Կրոմվել Գրիգորյանի, մերժումը, Դավիթ Թամրազյանի փեսայի՝ Միլենային ուղղած վիրավորական բառերը՝ այդ վարքի տեր լինելով՝ ուզո՞ւմ ես գնալ Դավիթենց տուն որպես հարս, ինչպես նաև խոստացված երեք հազար դոլարը դրդել են, որպեսզի նա սուտ ցուցմունք տա Դավիթի դեմ:

Ըստ պաշտպանի, Միլենան Դավիթի մոր ու քրոջ ներկայությամբ Դավիթին ասել է, որ իրենց ծանոթ Մաշտոցի ոստիկանության բաժնի պետն իրեն ասել է՝ «եթե գաս ցուցմունք տաս, որ «Վալնա» բարում Դավիթը քեզ պատմել է, որ ինքն է Մարիամին սպանել, երեք հազար դոլար փող կստանաս»:

Կ.Գրիգորյանն անդրադարձավ նաև Դավիթ Թամրազյանի հագուստները փորձաքննության չուղարկվելու հանգամանքին: «Քննիչն անգրագետ պատասխան է տալիս, քանի որ հետքեր չկային: Ւնքը իրավունք չունի, փորձագետն է որոշում հագուստի վրա հետքեր կա՞ն, թե՞ չկան: Մեր հաղորդման հիման վրա հիմա այդ հագուստները՝ ապացույցները, թաքցնելու հետ կապված քրեական գործ է հարուցվել քննիչի նկատմամբ: Հագուստները մինչև հիմա իրենց մոտ են, դատարան չեն ուղարկվել»,- ասաց Կրոմվել Գրիգորյանը:

Աղբյուր` Փաստինֆո