Փաստ ինֆո

Հայաստանի ազգային հավաքականն ԱԱ-2018-ի ընտրական փուլի մեկնարկային խաղում պարտությունից հետո 1-ին տնային հանդիպումն է անցկացնելու՝ հոկտեմբերի 8-ին հյուրընկալելով Ռումինիայի ընտրանուն: 3 օր անց Հայաստանի ազգային թիմը հյուրընկալվելու է Լեհաստանին:

Սպասվող հանդիպումների, առկա խնդիրների և անելիքների մասին armsport.am-ը զրուցել է Հայաստանի հավաքականի գլխավոր մարզիչ Վարուժան Սուքիասյանի հետ:

- Վերջին շրջանում հավաքականի նկատմամբ երկրպագուների հավատը նվազել է. որո՞նք են պատճառները և իրավիճակից դուրս գալու ի՞նչ ճանապարհներ եք տեսնում:

- Երկրպագուները միշտ ցանկանում են բարձրակարգ, հարձակվողական ֆուտբոլ տեսնել: Պետք է նայենք մեր «խոհանոցը»՝ մեր ֆուտբոլիստներին, թե ինչ վիճակում են, ովքեր են խաղում իրենց թիմերում: Պատմության մեջ չեմ հիշում նման դեպք, որ մեր բոլոր լեգեոնականները մի քանի խաղ պահեստայինների նստարանին լինեն: Չեմ կարծում, որ թիմերի մարզիչներն էին մեղավոր: Ես որոշ հնաբնակների կանչեցի և վիճակը տեսնելով՝ ակնարկեցի, որ մարզիչների տեղը լինեի, կրկին չէի խաղացնի: Կարելի է առանձնացնել Մխիթարյանին, ում վնասվածքները խանգարեցին: Մնացած լեգեոնականների վիճակից դժգոհ եմ: Ավելի լավ է սերնդափոխությամբ երկար պահեստայինների նստարան ունենանք և տեղացի կադրերով փորձենք խաղալ:

- Առհասարակ, բոլոր մարզիչներին կազմի հետ կապված մեղադրանք են ներկայացնում: Այդ բարդությունների մասին ի՞նչ կասեք:

- Եթե բացի Մովսիսյանից այլ ֆուտբոլիստ կա, ով մեր տեսադաշտում չի եղել, այդ հարցում մեր երկրպագուները կսխալվեն: Ասում էին Կառլեն Մկրտչյանին, Գևորգ Ղազարյանին… հրավիրեցինք, ոչ ոք ավելին չարեց: Մեղադրում էին հարձակվողական ֆուտբոլ չխաղալու համար, սակայն ԱՄՆ-ում 2 խաղերում էլ հարձակվողական ենք գործել. մեզ օգնում էին Մանուչարյանը, Բարսեղյանը: Եթե այդ ֆուտբոլիստները մեր տրամադրության տակ լինեին... պետք է ունենանք մարտավարություն, որով այնտեղ գործում էինք: Պետք է այս տղաներին մոտեցնեմ այդ մարտավարությանը: Կրկնում եմ՝ տեսանք բոլորի վիճակը:

- 3 ամիս առաջ նշեցիք, որ Մովսիսյանի հարցը փակված չէ և դեռ կանդրադառնաք. այժմ ինչպիսի՞ն է Ձեր կարծիքը:

- Այժմ էլ փակված չէ. իր հետ որոշակի բանակցություններ ենք վարում, դեռ քննարկման փուլում է: Մովսիսյանը լավ է խաղացել, նրան ծափահարել են, իսկ վերջին 2 տարում շատ վատ է խաղացել: Ֆուտբոլիստները պետք է մեղքի իրենց բաժինը վերցնեն իրենց վրա, երկրպագուներից ներողություն խնդրեն այդ տարիների համար:

- Արթուր Սարկիսովին, Ռուսլան Կորյանին և Դավիթ Արշակյանին հրավիրում էիք, սակայն այս անգամ չեք հրավիրել…

- Կորյանը միանշանակ դեռ պատրաստ չէ ամբողջական հանդիպում անցկացնել: Ակումբում վնասվածքից հետո իրեն խնայում են, արագությանը պատրաստ չէ: Արթուր Սարկիսովն իմ տակտիկական համակարգին համապատասխան չէ, իսկ Արշակյանը, տեսաք, ընդհանրապես չարդարացրեց սպասելիքները:

- 2 նոմինալ հարձակվող եք հրավիրել. 2 հանդիպումների համար բավարա՞ր է:

- Հիմա դա է. ուժեղացնում ենք միջին գիծը: Այլ մարտավարություն պետք է ընտրենք:

- Նախորդ խաղերում Մարկոսին էիք օգտագործում կենտրոնական հարձակվողի դիրքում. դա արդյո՞ք նրա դիրքն է:

- Մարկոսը կարողանում է տուգանայինի մատույցներում լավ աշխատել, հարվածներ կատարել, քողարկված փոխանցումներ կատարել: Այդ դիրքում ինքը վտանգավոր է, սակայն երևի չի խաղա այդտեղ:

- Մխիթարյանի բացակայության դեպքում Մարկոսը չէր կարո՞ղ նրա պարտականությունները կատարել:

- Մենք պաշտպանողական մարտավարություն էինք ընտրել: Դանիան ֆավորիտ է համարվում: Փակ ֆուտբոլ խաղացինք, ճիշտ է՝ շատ վատ գործեցինք: Անգամ այդքանից հետո, երբ մեր բախտը բերեց և Բեգլարյանը 11 մետրանոցը հետ մղեց, վատ խաղով կարող էինք 1 միավոր վաստակել, եթե Մարկոսն իրացներ իր պահը:

Երկրպագուներին խնդրում եմ հանգիստ լինեն, աջակցեն մեզ: Տեղի կադրերով պետք է այս 2 խաղն անցկացնել:

- Առջևում Ռումինիայի հետ հանդիպումն է: Ձեր հրավիրած ֆուտբոլիստները պատրա՞ստ են:

- Ինձ թվում է՝ այո: Նվիրվելու առումով՝ միանշանակ: Արաս Օզբիլիսը գրել է. «Թիմում խաղալն աշխատանք է, իսկ հավաքականում՝ պատիվ է»: Իրոք, այդ տղան, 100 %-ով պատրաստ չէ, սակայն արյունը եռում է: Ես շոյված եմ նրա վերաբերմունքից:

- Ռումինիայի խաղում հաղթելը նպատա՞կ է, թե ավելի շատ պետք է մտածել խաղը կայունացնելու մասին:

- Երկուսն էլ:

- Իրատեսակա՞ն է հաղթել Ռումինիային:

- Ինչո՞ւ չէ: Ցավալի է, որ վնասվածքները շատ են: Սակայն Հենրիխ Մխիթարյանի ներկայությունը երկրպագուների և ինձ համար հոգեբանական մեծ ուժ է: Նրա վարպետությունը շատ կօգնի մեզ:

Էդուարդ Քալանթարյան

Աղբյուր` armsport.am