Փաստ ինֆո

Երրորդմասցի Լյովիկի ու նրա ընկերների սպանության գործով այսօրվա դատական նիստում ևս շարունակվեց վկաների հարցաքննությունը:

Դատակոչված վկաներից երկուսը «Նուբարաշեն» ՔԿՀ-ի անվտանգության ապահովման բաժնի երրորդ կարգի մասնագետներին էին: Վերջիններս դեպքի օր՝ 2015թ. մարտի 4-ին, ծառայության մեջ են եղել և գտնվել են քրեակատարողական հիմնարկում:

Վկաները պնդեցին, որ դեպքի ժամանակ իրենք դուրս չեն եկել ՔԿՀ-ից և միայն դեպքի հաջորդ օրն առավոտյան, երբ ծառայությունն ավարտել են ու ՔԿՀ-ի վարչական շենքից դուրս են եկել, տեսել են, որ իրենց երկուսի մեքենաներն էլ վնասվել են:

Կրակոցների հետևանքով վկաներից մեկի ավտոմեքենայի անիվն է ծակվել, իսկ մյուսի՝ ավտոմեքենայի կողային ապակին վնասվել:

ՔԿՀ աշխատակիցները դեպքի օրը տեղեկացել են, որ սպանություն է եղել, սակայն դատարանում նրանք հայտնեցին, որ կրակոցների ձայներ չեն լսել, այնինչ նախաքննական մարմնին ցուցմունք տալիս հայտնել էին, որ կրակոցների ձայներ են լսել:

Հակասության վերաբերյալ նրանցից մեկն ասաց, որ դեպքից երկար ժամանակ է անցել, չի հիշում, իսկ մյուսը պնդեց, որ չի լսել:

Վկա ՔԿՀ-ի աշխատակիցները կալանքի տակ գտնվող ամբաստանյալների վերաբերյալ նշեցին, որ ՔԿՀ-ում բոլորից լավ իրենք են իրենց դրսևորում:

Վկա Սլավիկ Շահբազյանն էլ դատարանում հայտնեց, որ ամբաստանյալ Սարգիսն իր տունն անշարժ գույքի գործակալության միջոցով վարձակալել է, որի դիմաց վճարել է յուրաքանչյուր ամիս 1000 ԱՄՆ դոլար: Սակայն տունը վարձակալած երիտասարդը մեկ-երկու ամիս անց տանտիրոջը հայտնել է, որ ցանկանում են դուրս գալ տանից:

Վկան ճանաչում էր ամբաստանյալներին և հայտնեց, որ նրանց հետ որքանով որ առնչվել է, ոչ մի վատ բան չի տեսել:

Վկայի ցուցմունքներում առկա էական հակասությունների պատճառով մեղադրող դատախազը միջնորդեց հրապարակել նրա նախաքննական ցուցմունքը, ինչին առարկեց ամբաստանյալների պաշտպան Լուսինե Սահակյանը: Ըստ պաշտպանի՝ ժամավաճառությամբ են զբաղված, քանի որ վկայի ցուցմունքները մեղադրանքի հետ կապ չունեն:

Այդուհանդերձ, մեղադրողի միջնորդությունը բավարարվեց և հրապարակվեց վկայի նախաքննական ցուցմունքը, ըստ որի՝ վկայի տունը վարձակալած Սարգիսը զանգահարել է ու ասել, որ տատիկը մահացել է, և որ տունը հանձնում են, ինչը անակնկալ է եղել վկայի համար:

Նշենք նաև, որ պաշտպան Լուսինե Սահակյանը ամբաստանյալների գույքի վրա դրված կալանքը հանելու միջնորդությամբ հանդես եկավ՝ նշելով, որ խոսքը գնում է «օպել» մակնիշի ավտոմեքենայի մասին, ինչը պետք է օտարվի:

Վկաների հարցաքննությունը, ինչպես նաև պաշտպանի միջնորդության վերաբեյալ մեղադրանքի կողմի կարծիքը դատարանը կլսի հաջորդ դատական նիստում:

Ինչպես ավելի վաղ տեղեկացրել էին, գործով ընդհանուր առմամբ դատակոչվել է 55 վկա:

Ըստ մեղադրանքի՝ 2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը և Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու և ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգերից կրակահերթ են արձակել (առնվազն 82 փամփուշտ) Լևոն Ղազարյանի, Դրաստամատ Թադևոսյանի և Մեսրոպ Նազարյանցի ուղղությամբ, որի հետևանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադևոսյանը «Էրեբունի» բժշկական կենտրոն տեղափոխվելու ճանապարհին մահացել են:

Նշենք նաև, որ բոլոր երեք ամբաստանյալները «Գաստիկ»-ը՝ Վահան Հակոբյանը, «Տլե»-ն՝ Սարգիս Հախանումյանն ու «Ծգլ»-ը՝ Սարգիս Գրիգորյանը առաջադրված մեղադրանքում իրենց մեղավոր չեն ճանաչում:

Աղբյուր` Փաստինֆո